عيشة سعيدة

14

#عيشة_سعيدة14
Shahd Alsalman
مرحبا اني مهند كلت احجيلكم شوية لحد ما تكعد شهودة ..
اسمي مهند 28 سنة درست ادارة واقتصاد قسم محاسبة واشتغل بشركة اهلية اجنبية والها فروع بمصر والعراق وبهواية دول
عشت بالبصرة فترة طويلة عند بيت جدي بحكم دراسة اهلي وشغلهم و بعد فترة سافرنا للخارج صارت لاهلي فرصة شغل مرتبة وكملت دراستي هناك و اشتغلت وبعد ما رجعنا للعراق نقلت اوراقي وكل شي لهنا والحمدلله وضعي ممتاز كشاب اول حياتة
اني طويل وجسمي متناسق بس عظمي خشن شعري اسود وعيني عسلي فاتح وحنطاوي
جنت كل فترة اسمع امي تخابر بنت خالي المتوفي بس مشايفها ولا حاجي وياها وبعدين صار عندي شغل خلاني اضطر اسافر لغير دولة بعد ما رجعت وكملت شغلي طلبت من امي احجي ويا بت خالي ما اعرف ليش عندي هالفضول اعرفهاواشوف شكلها احنا ما متشاوفين ابد بس يمكن بسبب حب امي وابويا الها او مدحها دائما ما اعرف ؛
حجيت وياها ..
من اول ما سمعت صوتها حسيتها طفلة صغيرة بخجلها وسكوتها من سمعت صوتي وبعدها عرفت منو اني وحجيت وياها بس احس كلماتي طارو من بالي ولا كانو حاجي ويا بنية قبل .. طبعا اني ما عندي علاقات ولا هيج شي مجرد زمالة شغل او دراسة لان اخاف على اختي ولان عندي قناعة اللي احبها لازم تكون زوجتي ..
بقينا على تواصل بالتلفون بس مجان اكو فرصة لقاء بينا بحكم سفرنا مرات احسها حزينة كلش لدرجة اسمع الخنكة بصوتها بس هي متبين هالشي ابقى اشاقيها واداهرها بس تبقى هي حزينة ما الومها لوحدها وصعبة فقدت اهلها وهي بهالعمر مالها احد ..
بعد فترة انكطعت عنا كل ما ندك محد يجاوب واللي يجاوب يكول انه هي مسافرة للشمال او طالعة يم صديقتها او هواية اعذار زين ليش مترجع تتصل نزلنا للعراق بس كلبنا نار شنو صايرلها منعرف وامي تكول اكو مصيبة كلبي حاسني امي اي شي تحسة دائما بمحلة.
وصلنا البصرة طبعا بعد شهر بينما كدرنا نرتب وضعنا وخلال هالشهر ما عرفنا وين هي ولا سمعنا صوتها.. و ابويا كال روح ويا امك واني يم اختك ابقى دوروها وجيبوها وياكم وفعلا رحنا ووصلنا لبيت خالتها استقبلونا بوجه ناشف ومن نسال على شهد محد يجاوب بس مودة بنتهم حبابة كلش جنت اوصيها دائما على شهد ومبين اكو شي من نظرات عيونها ومن نجيب طاري شهد تريد تحجي وامها تسكتها اخر شي دخلتها جوة والمشكلة حتى ما طببتنا يعني مبين كأنو ضامين شي
اخر شي كالت شهد انهزمت ويا واحد وولت الله لا ردها وطردتنا وطبت فار دمي شدتحجي هاي دنندار ونرجع امي شافت جارة قديمة تعرفها نزلت سلمت عليها والمرة كالت شصار من شهد عبالها احنا نعرف امي سالتها شنو الصار بالضبط كالتلها كل الوضع وشون اخذوها للسجن رجعت حجتلي وهي تبجي نزلت كسرت بابهم عليهم وتعاركت وياهم وبطلعتهم طلعت مودة ونطت امي ورقة وكاتبة العنوان بيها ويا مركز وامي كالت خلص هدة وعاطت بية لان فقدت كلش
طلعنا منهم وكالت مودة كاتبة هيج عنوان المركز وكاتبة اخوها الاعتدى عليها وهي ضربتة بسجين تدافع عن نفسها بس تهموها و ماخذين منها التلفون لهذا مكدرت تحجي ويانة وكاتبة رقم جوارينهم حتى نكدر نتصل بيها ونفتهم منها ورحنا للمركز وسالنا وهي بعد التحقيقات متحولة لعدة مراكز وبعد وين يالا كدرنا نلكاها وطبعا انتقلنا بغداد بعد منكدر نتركها وجان لازم نفتهم الفلم ونطلعها من المشكلة اللي هي بيها طلبنا موعد زيارة وصدفة صديقي جوارينا جان من جنا بالخارج طلع اخوه المسؤول عن السجن ونسقلنا الزيارات وساعدنا هواية..
دخلنا وجنا ننتظر شهد تجي وهي متعرف احنا جايين
مدنج ومتوتر وخايف عليها بنفس الوقت رفعت راسي شفت بنية طولها متوسط شعرها طويل ووجها مثل الملايكة تنطي شبه لمي عز الدين جسمها متناسق بس مبين عليها التعب والذبول ما اعرف جذبتني الها مدري وكعت بحبها تهت بتفاصيلها وبعيونها الحايرة واول مرة احس هالاحساس تجاه بنية دخلت للقاعة متفاجئة بامي ومعرفتني بين على وجهها انه مستحية عبالها دا انتظر احد لحد ما امي كالتلها و تسالمنا بس يا الله شكد حلوة من تضحك وهي باجية وكعدنا بعد ما حجتلنا بس مو كل الصار استحت مني وما شفت بحياتي هيج خجل وحياء كأنو طفلة بس بهيئة شابة ومرت الايام والمحامي صديقي حاول يسوي كل شي وظل اتصالي ويا مودة حتى نحصل التقرير اللي ضامي اهلها ولو نسخة او شي ومتكدر هي تطلع شاهد سري لحد ما انخطبت بعد كدرت تطلع والحمدلله خطيبها ابن اوادم وقبل يساعدنا وقبل تشهدلها بعد ما ضمن ما عليها اذية
طبعا افتهمت انه وضع شهد الصحي مو تمام والصدمة اثرت بيها من بعد وفاة اهلها وتعبت هي كلش من الانتظار والقلق فلازم تحافظ على هدوئها وما تتوتر او تتعصب او تخاف لان توصل الاغماء وتدخل غيبوبة احيانا ما اعرف شنو ممكن اكول بالنسبة لخوفي عليها احسها قطعة مني كل يومي مشغول بيها
اخذت كلبي من شفتها تعبانة وتخبلت من وكعت كبال عيني واغمى عليها وجانت حالتها النفسية كلش مو زينة وعرفت وضعها الصحي من هذا اليوم وبعد ما تعالجت وتقريبا رجعت صحتها رجعت للسجن ويوم اللي عرفت انه رجل خالتها النذل جان يخليها تكدي و مقصرين عليها تخبلت ومتت الف موتة شون اكو هيج ناس وهي بنية وجمالة من دمكم ولحمكم كل كلمة جانت تكولها وياها غصة ودمعة تشك كلبي واحس الهوا خانكني واتمنى لو احضنها واحسسها بالامان
والحمدلله طلعت من السجن بعد المعاناة
طلعت بس بعد طلعتها عرفتها اكثر وتعلقت بيها اكثر وطبعا طول فترة السجن توصيني على كتب ..
هي ذكية عاطفية بس قوية كتومة وحنينة وتفكر بالكل اخر شي نفسها وتحفظ المعروف تخاف الله
كل شي شفتة بيها خلاني اسميها ملاكي قررت اكون صديق الها حتى لا تحس نفسها وحدها
فد يوم طلعنا للكلية حتى نسوي اوراق القبول حتة ننقلها للبصرة تفاجئت من طلبها انه تريد توصل لناس لان ما نعرفهم احنا اني هم خليتها تكمل وتحجيلي القصة اسمعها واكول بداخلي شكد مريتي بقساوة بس حنيتج وصدقج باقي انطتني الورقة باسمائهم وعنوانهم جانت تريد تخلص صاحبتها من الظلم والسجن شفت العنوان وحفظتة وعقجت الورقة حطيتها يمي انصدمت من تصرفي كتلها الله العالم شسوت انت متعرفين الناس شونهم حسيتها انقهرت وبقت تحجي وتكول اني مو صغيرة وضاجت مني بس اني راح اساعدها وراح اسوي كل شي يفرحها اكيد لكن جان هدفي اولا تأمن بية وثانيا توثق من كلامي من اكللها اي شي تريدة هي مجاب وثالثا اريدها ترتاح ومتفكر بشي غير مستقبلها ومن كملنا كلية واجراءات واتفقنا انه تبقى بالاقسام لمدة سنة وتحول بصرة هيج جان النظام والقانون بوقتها طلعنا وكلت خلي اهديها شي لان اول كلية صارت فحبيت ننزل سوك ونشتري هدوم الها بس اللي صار انه هي متقبلت الموضوع وبجت ورجعنا للسيارة بس هي تصيح وتبجي وتحسست كلش وعزت نفسها عليها بس شفتها مضغوطة وتعبانة ويمكن موقف الصبح اثر بيها كلش وديتها للكاظم زرنا وصلينا ووراها تسوكنا مناك حسيتها مرتاحة وحاولت انسيها و نست وهالمرة اندمجت وياية براءتها عالم ثاني شكرتني واعتذرت مني ..
من ثاني يوم دورت على اهل نجاة ولكيتهم حجيتلهم وحننت كلبهم جانو شوية متعصبين بس من درو وضعها بالسجن وهيج صاير بيها وكتلهم اني من طرف صديقتها اتفاعلو وياية و رادو محامي كتلهم عندي وما خليتهم يدفعون شي والحمدلله لكينا زوجها وطلعت بسرعة واصلا الادلة كلها وياها ولبعد شهر ونص وطلعت نجاة حبيت افاجئ شهد رحت لبيت نجاة وترخصت من اهلها اوديها لشهد وقبلو وبالطريق كعدت تحجيلي شون صارت صداقتهم وشون عاشت شهد وياهم وغيرت السجن عليهم ومن طلعت منهم شون ضاجو وحجيتلها شون اني ضوجتها من كتلها ما ادور عن.اهلج
وكالتلي شصار بينهم هي وشهد وشكد حاولت وياية علمود ارجع لوضعي و ضحكتني من كالتلي شون استفزتها وكتلتها وطلعت بيها كل الغضب والعصبية واتذكرت منظر عيونها من جذبت علية مباوعتلي وكالتلي اتزحلكت ووكعت فعرفت انه من تجذب ترتبك لهذا متباوع لعين احد
وصلنا للمكان اللي حتتلاكى بي ويا شهد
كتلها انتظري هنا رايح اجيبها واجي ورحت للبيت اخذتها كتلها حنطلع وبالطريق كتلها حنتعشى بس هي مستغربة والحلو بيها ما تلح ولا تسال هواية تكول اول وتالي راح اعرف رحت خليت السيارة بالكراج وقبلها كتلها انتظري هنا بس اطبك واجي وجبت نجاة وتمشينا باتجاهها بقت صافنة وبعدين كمزت وبين البجي والضحك وممصدكة نفسها دتشوفها وطالعة براءة حضنتني قوي ما اعرف شحسيت بلحظتها تمنيت ما تخلص ولا توخر عني ما ادري شبية والحمدلله انه شفتها فرحانة هيج
ظلت تشكرني وتندعيلي وفرحانة كل الوقت وتكلي متخيلت انت هيج حتسوي ابد عبالي فعلا نسيت الموضوع او متريد تساعد ..
بعد فترة صارت الجامعة وبلشت هي دوام واهلي انتقلو بصرة اما اني اجرت شقة على كد 8 شهور ودفعت مقدم حتى ابقى قريب منها اخاف عليها ووصيتها ممنوع تطلع وتطب ونبهتها من العلاقات والولد كأنه اني ابوها وهي عاقلة ممحتاجة توصية بس واحد يذكر
باول كم يوم دكتلي واني جنت رايحلها لدوامها وجانت تحجي واباوعلها ضايجة ومحتصرة دتكول داكة لامي وممجاوبتها وهي متدري بية هنا اصلا من تقربتلها حسيت فرح الدنيا كلة بعيونها عرفتني على شعبتها البنات والولد وضجت كلش من شفت الولد وحجتلي عنهم ما ادري ليش غرت ..
عدت الايام وقبل لا تصير امتحاناتها مال نص السنة اجتني رسايل تهديد من ارقام غريبة وكل ما اتصل ينغلق ومدا اكدر اوصل للرقم الصحيح كلها تهدد بية وتهدد انه تاذي شهد كمت اخاف عليها ومنا جاية الامتحانات وما اعرف شون راح ادبرها ويا دوامي كمت كل شوي اتصل بيها لحد ما سالتني مهند شنو صاير ليش متوتر وتخابر كل شوية احد كايلك راح يصيرلي شي وكالتها بالشقا وضحكت واني من توتري عطت بيها وكتلها متعيد هالحجي وما اريد اكللها حتى لا تتوتر اريد تركز بالقراية والحمدلله خلصت الامتحانات ورجعنا للبصرة وماكو شي
وخلصت العطلة ورجعنا بغداد وهي بلشت دوامها دا اريد ادكلها وتلفوني انغلق بس كلبي مقبوض واحس بخنكة شحنتة شوية ومتحملت اخذت اجازة ورحتلها من دا اسوق فتحت تلفوني وشفت رسالة منها راح تطلع بعدني دا اقراها ودكتلي كلت الو وسمعت صوت شخطة سيارة وهي كامت مترد بس اسمعها تكول شتريد مني ومعليك بية عرفت صايرلها شي و سمعت صوت عياطهاودتكلة اني طلعت دا اشتري مي من المحل القريب على كليتنا ويا صديقاتي
افتهمت هي دتوصفلي مكان وعرفتة والمشكلةيمة قطعة بيها بناء هيكل يعني فارغ وخفت لا يفوتها بي ويسويلها شي
اريد بس اطيرلها وبعد ما حسيت المسافة بعيدة حيل مدري قريبة بس الخوف هيج يسوي لكيت البنات واكفات وشكلهم يدورون لشي ووجوهم مخطوفة الوانها
نزلت واخذت حديدة حاطها جوة الكرسي خاف يصير شي وشافوني البنات صاحو مهند شهد مدري وينها عفية هسة جانت هنا
شفت السيارة الطابكة اعوج باوعت شهد محصورة بالحايط والكلب موجه عليها السجين مخليها على خصرها وساد حلكها ومتقرب عليها وعرفتة من التهديدات هالسكير هو نفسة جلال ابن خالتها بس كل ما اروح لبيتة واحجي ويا اهلة يكلولي مسافر محد يعرفلة طريق
هديت عليهم بالحديدة واكفيلة ولد اثنين مبينين تعبانين ولو جسمهم رياضي بس بوخة جريتة منها واباوعلها وكعت على حيلها كوة تتنفس والبنات اجن يتصايحن ويعيطن وراحو لشهد واني ملخته كتل وعلى اصواتنا اجوي اهل المحلات القريبين والبشارع من سمعو البنات كالو ديخطف صديقتنا ملخوهم تملخ من الغيرة العدهم كسروهم
وجروني منة كوة وصعدو سيارتهم وولو
رجعت لشهد اصيح عليها واعيط واني من خوفي واسال بيها شسوالج ومتجاوب بس تبجي بشهكة لحد ما صديقتها كالت خل نروح لبيتكم وبعدين نفتهم شوف حالتها وديكوموها فدا اباوع لصديقتها اللوخ شعرها اسود وشكلها مو راحة ومدتسوي اي رد فعل بس وجهها اصفر ومشايفها قبل بعدني صافن عليها وانتبهت لشهد دايخة تذكرت هي متتحمل هيج داصيح شهد ماكو انتهت ووكعت لزمتها كبل وشلتها للمستشفى وصلنا
مغذي وابر وفحصها الطبيب نفس الحالة وصدمة وهبوط حاد لحد ما كعدت جانت خايفة وتبجي وتعيط حضنتها واجوي ينطوها ابرة وتصيح ما اريد من ضربوها رخت بين ايدي ونامت راحو البنات بعدين لبيوتهم وشكرتهم وبقيت يمها
جنها ملاك نايم او طفل صغيروني محاس بالدنيا شكو لزمت ايدها وغفيت شوي وكعدت لكيتها توها دتحس وحجيت وياها وصحت للدكتور
كملنا الفحص والدكتور كال تكدر تطلع رجعنا لشقتي لان القسم الداخلي مسدود هيج وقت
وجبنا اكل وكعدنا نحجي وكتلها نتفرج فلم بس اني تعبان جنت ونمت بنص الفلم اني وكاعد ورة شوي حسيت براسها على زندي وجتفي شلت ايدي وحضنتها ونمنا ..
كعدت الصبح نايمة هي بحضني وما اريدها تكعد اريد ابقى اباوعلها واصفن بجمال نومتها
كمت احجي ويا نفسي ليش هيج اني وياج احس مرتاح وليش ما اكدر اتركج شنو مسوية بية انت يا بنية ..
بعد كل شي صار وكل الاحداث المرت هي بيها باقية على حنيتها ودفو حضنها يكفي بلد بس غير اكلب الدنيا ع البلد هذا حضنها الي وحدي
كدرت اميز مشاعري وعرفت الاحسة مو اعجاب ولا صداقة هذا حب وحب اناني همين حتة من اهلي اغار عليها من كلشي اضوج يتقربلها بس شلون راح تحس احبها شوكت حتعرف واخاف اكللها وما تتقبل وتبتعد عني واخسرها واني اموت بلياها احس الهوا يخنكني اذا ما اشوفها او اسمع صوتها هي حبي الاول والاخير ومراح اتقبل تبعد عني خليها صديقتي وقريبة مني ولا اخسرها للابد ..
بعد هالحادث بقيت اتحرى عن هالبنية ام شعر الاسود واسال شهد كل يوم عنها واحذرها منها ومنين ووين بيتهم وكمت اراقب بيها
المفاجأة طلعت هي صاحبة جلال فاتو لعمارة هي وياه ومبين الشي البينهم مو نظيف يعني علاقة محرمة انتظرتهم يطلعون ولحكتها اشرتلها وفتحت جامتي كتلها تعالي صعدي طبعا هي جمدت بمكانها لان شافتني ذيج المرة فتعرفني صعدت يمي
- بس تجذبين وتحجين شي غلط عندي صورج انت وهذا الكلب واكول لاهلج فاحجي احسنلج شنو علاقتج بي؟؟
- ما عندي وما اعرفة
شوفتها صورها هي وياه
- زين كتيلي حتى اخوج ياسر اعرفة على عشيق اختة وترة ياسر صديقي واذا وصلتة انت تعرفين شيسوي بيج مو؟
خافت وكامت تبجي
- هو مهددني بصور وفديوات واني علمود هالشي قبلت وساعدتة و لحيت عليهم للبنات بالطلعة حتى يجي ويخطفها مقابل انه يمسح الصور واتفقت وياه عليها لشهد
- عفية عليج هيج كلش حلو وهسة افتحي بلوتوث فتحتة لبلوتوث تليفونها
ونقلت الفديو الها لان جنت اصورها بلا متدري
- دزي الة وكليلة اذا يتقرب مرة لوخ لشهد اوديكم اثنينكم ورة الشمس وخاف ميدري ترة اكو حرس سريين لشهد اني مخليهم واي حركة غلط اثنينكم بالسجن اذا انجرحت بالغلط احملكم المسؤولية وطردتها من السيارة ونبهتها تعوف شهد ومتحجي وياها
والحمدلله تركتها وخلصنا منهم وحطيتلها حراس حتى ما يظل بالي عليها اذا اكون مو يمها هم يمها بس مكتلها حتى لا تتقيد .