عيشة سعيدة

11

#عيشةسعيدة11
Shahd Alsalman
مرو 5 شهور ويا طولها ويا ثكلها وما بطلت دعاء او صلاة اعرف الله ميترك المظلوم ويكول
"اذكروني اذكركم"
والزيارات متخلص لحد اليوم اللي اجة بي المحامي وكالي ابشري ترة لكينا التقرير وطبعا مو بسهولة بس كدرنا نلكاه ومودة ويانة وست نهلة هم جاية بعد كم يوم والاحلى انه المحكمة قريبة جدا موعدها بعد 12 يوم بالضبط اني كيفت
- الله يبشرك بالخير
- واكو خبر لاخ حلو وصاني مهند اوصلة الج لان اليوم طالع بشغل مكدر يجي
- الله يسهلة ؛ شنو الخبر ؟
- طلعلج بالقبول المركزي هندسة حاسبات الجامعة التكنلوجية
- كول والله
- والله وهسة انت باش مهندس شهد على سن ورمح وضحكنا
- ما اعرف شون اشكركم والله وتعبتكم كالي بالعكس هذا واجب وانت تستاهلين الخير
واترخص وراح
رجعت صليت ركعتين لوجه الله وشكرتة
وحجيت للبنات وفرحولي كلش ودعولي اطلع على خير من هالشدة
بعد 12 يوم
صار موعد المحكمة وهالمرة تغيرت الادلة لصالحي وبيت خالتي اتخبلو
و من دخلت ست نهلة استغربو منها ومن جيتها حجت كل شي وبعدها الشاهد السري اللي هي مودة والحكم بعد اسبوع بالجلسة النهائية
واجة وكت النطق بالحكم وهالمرة جان الي برائتي واسقاط التهمة عني وهو وابو انحكمو بمدة سجن او دفع كفالة وطبعا جان بطلب من عمتي انه تشتكي عليهم وما تسحب الشكوة و رادت ياخذون جزائهم

رجعت لزنزانتي حتى الم اغراضي واسوي اجراءات الخروج
فحجيت للبنات ولميت اغراضي وكتبي وطلعت بعد ما كملت الاجراءات وودعت كل البنات ونجاة كتلها يجي يوم وتطلعين لا تخافين الله موجود ومردت اكللها راح ادور اهلج حتى لا تعيش بأمل وصيت البنات وحدة ع اللوخ وطلعت واني ابجي حبيتهم وتعودت عليهم وصارو جزء من حياتي بس لازم اكمل مشواري ..
طلعت شميت الهوا وشفت الشمس ماكو احلى من شعور الانتصار والحرية والراحة بعد التعب حسيت ملكت الكون كلة
ورحت ويا بيت عمتي اللي استقبلوني بهلاهل وطش الجكليت والاحضان و مهند فرحان بالسيارة بس يركص ومعلي الاغاني ومسايعتة الكاع من الفرحة ويباوعلي كل الوكت رحنا مطعم اكلنا وتغدينا بس اكلت قليل ف مهند شال لكمة قوزي بيدة وحشاها بحلكي يلة اكلي ربربي وراج هندسة ويضحك مثل النسوان العجايز موتني ضحك
الحمدلله جان احلى يوم رجعنا لبيتهم حلو وهادي ونظيف وجوة يجنن وكل شي جان مرتب والي غرفة اني ومراوي

سبحت وبدلت وسالت ع القبلة وصليت وذبيت نفسي ع الفراش اني وبلبس الصلاة ونمت راحة ما بعدها راحة ونومتي طولت لليل محاسة
كعدت عطشانة باوعت ساعة 2 ونص مروة نايمة واني استحي اروح بعدني توني اول يوم
كمت لان عطشانة كلش ما اكدر ما اشرب مي طلعت للمطبخ باوعت وين الكلاص والمي ظلمة واعتمدت على ضوة الكمر الخفيف سحبت كلاص وشربت مي باوعت مهند كاعد وساكت ومتجتف وصافن ع الشباك واعتقد اكو سماعات بأذنة ورابطها على mp3 جانت كلش مودتة بذاك الوكت بس محاس بوجودي فدا ارجع الكلاص واروح صاحني
-شهد
-يبو شكد عيب بداخلي اممم نعم جيت اشرب مي والله لوما عطشت ما اطلع صدكني وما ادري بيك انت هنا
ما ادري شبية ارتبكت مثل الجاهل المسوي مكسورة
هو ديتقدم علية خلة ايدة على حلكي وباوعت بعينة عاكس الضوة لوجهة وعلى عيونة شكد عينة بيها حنية مثل عيون بابا
-بس اسكتي شوكت تجوزين من هالحالة
هزيت راسي يعني معناها حسكت
وخر ايدة وجرني
-تعاي اكعدي
خلالي كدامة كرسي وكعدنا
- انت نعسانة ؟
-لا
- نحجي ؟
- اي
- شهودة اني هنا سندج واخوج وصديقج و بير سرج وشنو تريدين اكون الج حطيها دائما ببالج
- متقصر وما اعرف شون اشكرك والله
- باوعتلها صفح وكملت واذا تريدين حبيبج ما عندي مانع
صفنت شديحجي هو تدارك الموقف وضحك واني ضحكت
- جديات ما اريد شي يضوجج او يقهرج ومتجين تكليلي ماشي لان راح ازعل منج هواية ترة
- ان شاء الله
باجر نسولف اكثر يلة كومي ارتاحي نامي
- ان شاء الله تصبح على خير
طلعت بس انداريت كتلة شكرا مهند على كل شي ويا ريت اعرف اردلك هالمعروف
- ههههه خبلة يلة نامي تصبحين على خير
- بس ...
رجعت انداريتلة
-  بس ؟
- تكدرين تردي بعدين
مفتهمت شيقصد وما سالتة ابتسمت ورحت نمت للصبح ارتاحيت كلش وما حسيت الا ساعة 8 الا عشرة سمعت صوت مهند يكول وينة يمعودة يلة والله تاخرت يا يمة طلعت وبكفشة شعري واتثاوب دا افرك عيني حسيت سنطة شفت عمتي وعمي ومهند صافنين علية ولازمتهم الضحكة على منظري
- شبيكم؟؟
واني مستمرة اتثاوب طكوها بضحكة بصوت عالي اني انتبهت وهم ضحكت وياهم
- شبيك تصيح مهند؟
- سويجي ماكو
- وذاك شنو بحباسية بنطرونك هو مخلي و ممنتبه وما يطلع صوت فمديشوفة وخابص اهلة اجة علية
- والله انت عيون صكر وباسني
اني فتحت عيني وبقيت جمدانة وطلع وراح واستحيت من عمي وعمتي بس هم مدايرين بال جن الشي الصار عادي رجعت بدلت وغسلت وساعدت عمة ومروة بالدوام جانت فدا اسولف ويا عمتي
- عمة شون راح اداوم ؟
- باعي احنا راح نروح للبصرة ونسكن هناك ودنحاول نسوي اوراقج لهناك
-بس وبيت اهلي ؟
-بي ناس
- يا ناس عمة هو مماجري
- لا ماجري وصار فترة همين وذولة ثاني عائلة تسكن بي ومن زمان
- لعد ليش هيج مجانو ينطوني فلوسة ؟؟وخلوني ... ولزمتني العبرة مكدرت اكمل
- عمة انسي الفات مات وكولي حسبي الله ونعم الوكيل كلها تكضي وتخلص وياخذون جزائهم الحقراء
- الله كريم
سولفتلي شون لكوني وشون مهند من طلع الحكم لصالحي رايح وكاتلة كتلة مرتبة وكالب البيت على راسهم ولخاطر مودة عافة ما اذاه اكثر
عاد كالت باجر روحي ويا مهند للجامعة وشوفو شغلة النقل كتلها صار عمة
حضنتها
- مشتاقتلج هواية عمة
- بعد روح عمتج يا غالية يا بت الغالين انت بنتي مو بنت اخوية واني اسفة عفتج بس ظروفي اقوى عبالي اوادم وامنتج عدهم بس الله كريم
- لا عمة انتو مقصرتو

وراها صار الظهر كلمن اجة من دوامة وصبينا الاكل وتغدينا ونمنا شوي والعصر جاي وكعك وهالسوالف وخلص النهار لاول مرة واني مرتاحة وما احس اكو احد حياذيني او يطلب مني شي او يسمعني حجي محلو ...