عيشة سعيدة

22

#عيشة_سعيدة22
Shahd Alsalman
اليوم خطبتي مجنت راضية اسوي اي شي الا الكى شهد اخذت روحي وياها من راحت بعد اعز علية من لارا واقربلي منها واعرفها راحت مظلومة ولسبب ومراح اسامح الجان السبب ولا انسى شكد انظلمت واتبهذلت بس اريد الكاها واعرفلها طريق ساعتها ارد كل شي بمكانة
مجنت اطيق مروة من الاول من اول ما عرفت شهد دائما اكول عنها الزركة مو لان هي سمرة بالعكس بس هي دمها ازرك سماني جنت اشوفة ما اعرف شنو السبب وبعد المشكلة السوتها لشهد كرهتها اكثر حتى من صارلها الحادث مو اتشمتت بيها لكن حسيتها تستاهل لان اتعدت على غير حقها ولان ظلمت مو حاقدة اني ابد بس ما اكدر احب اللي ياذي الناس وما انسى شكد جرح المقابل

بعد ما طلعنا للكنيسة جانت شهد نايمة و رحنا الصبح مثل كل احد نصلي
حسيت كلبي ناغزني كلت يا عذراء بردي كلبي ما اعرف شبية خابرت لارا حتى فزت وكتلها اشتاقيتلج واسفة كالت لا حبيبي عبالي بيكم شي وشوية سولفنا وسديت التلفون بس كابة النار بكلبي بوست شهد وكل ما اتقربلها احس اريد ابجي كلت اليوم اني مزاجي مو خوش بلكت اصلي واشعل شمعة ارتاح طلعنا كملنا صلاة وطقوس وكل شي وشوية كعدت اسولف ويا القس لان وسام طلب ايدي من ماما واحنا القس يعرفنا كلنا لهذا ردت اخذ رأية برغم اني ميالة الة واحسة خوش ولد وفعلا مدح بي الي وكالي انسان طيب ومن عائلة مستورة وانت تستاهلين شخص مثلة قررت اوافق وحجيت ويا ماما بالطريق على هالموضوع وكلت رأيي وفرحت خطية كلش وكالت رحتو مني بسرعة وان شاء الله ترتاحون بحياتكم بستها ولزمت ايدها ورجعنا

من فتت كلبي عصرني عبالك بيت مهجور فتت كبل لغرفتي لكيت شهد ماكو رحت للحمام ماكو للمطبخ ماكو صحت ماما شهد يمج ؟ كالت لا ماما وينها صيحيها خل نفرحها صحت ماكو مدا الكاها دكيتلها مغلق تلفونها ولا فايبر ولا واتس عجيب وين راحت اجتي ماما وياية انتبهت لورقة على الجرباية مالتها كالت مريم تعاي ماما تقرة وتبجي اخذتها منها وقريتها ..

بداية ما اعرف شلون اتشكر منكم واردلكم الجميل حبيتوني ودخلتوني بيتكم وحياتكم حافظتو علية وداريتوني برغم كل شي ما خفتو على نفسكم من اي مشكلة ما فد يوم حسيت انتو صديقاتي و خالة وعمو جانو بمثابة اهل الي
لارا حبيبتي جنتي الي عقل لمن اكون بحاجة نصيحة تعلمت منج هواية امور وسندتيني بكل شي وجنت نعم الصديقة والاخت الله يسعدج بحياتج

مريومة الوكيحة احبج بكد هالدنيا واخاف عليج من كل شي برغم ادري انت سبعة و بكد 100 رجال واطيب من كلبج ماكو انت اختي الصغيرة ديري بالج على نفسج واهلج

خالة حبيبتي ما اعرف شدعيلج على كد ما حميتيني مثل بناتج وخفتي علية وشلتيني كل شي قليل بحقج وعمو الوردة صحيح اخر فترة بعيد عنا جان بس ما قصر وياية وفتحلي بيتة ودائما يحجي وياية ويسال عني الله يعمر هالبيت يا رب

اتمنى تسلمولي على بيت عمتي وتكلولهم احبهم هواية ومناسية فضلهم علية بكل شي سوو الي وساعدوني بي وخلوهم يسامحوني اذا بدر مني شي

سامحوني ولا يظل بالكم علية اني بخير وبمكان زين ولا تعبون نفسكم اني اختاريت ابتعد وارسم حياة جديدة بس مراح انساكم ولو جنت كتلكم مجنتو حتقبلون سامحوني امانة وانتبهو لنفسكم الله يحميكم حبقى ادعيلكم وانتو ادعولي لا تنسوني بس لا تدوروني ولا تقلقون علية .

اقرة الرسالة والدم احسة يريد يطلع من عيوني وفورت واعصاب صرت شكد دكينالها وماكو مغلق ومغلق وما وصلنا الها وكل ما اقرة اشوف اثر دمع على الورقة وحلفت وحق هالدموع الا اردلج كرامتج وحقج يا شهد بس لازم الكاج.

رحت كبل اني وامي لحكتني لبيت عمتها ولكيتهم كلهم حتى سرى الحقيرة وبديت اصيح واعيط وكتلهم اذا متلكوها الدنيا احركها هسة وبيتكم اكلبة كلاب باوعت للكلبة سرى تضحك عيونها وفرحانة ولا هامها
وعمتها ملخت روحها بجي ولطم
مهند انسطر وبس يقرة برسالتها ويسال مكالت شي ما لمحت
ومروة واكفة ليغاد ما شفناها الا واكعة مغمى عليها

والله تمنيت ذيج اللحظة اجفص ببطنها عمو بين شهد وبين عمتها وبنته احتار خطية لان كلش يحبها وديناها مستشفى وطبيتلها اول وحدة كتلهم خلونا وحدنا وبعدني عصبية توها فتحت عيونها كتلها ها كتلتيها ومشيتي بجنازتها كامت تبجي وتصيح
جيبولي شهد عبالي تمثل او ممكن تجذب بس اتهسرت كلش وتصيح لزمت ايديها وحضنتها كتلهاا كافي اني هم وعيت على نفسي شكد عصبية وشادة وياها بقت تبجي شوي وهدت كامت تحجيلي عن شهد وانو هي تحبها وميتة من عذاب ضميرها واول مرة احسها صادقة كتلها مروة اسمعيني شهد لازم نلكاها ونرد حقها الها واني بصراحة ما عندي ثقة بيج لكن راح اكلج العندي كمت احجي وياها وهي ارتاحت واتفقنا ندورها ونكشف كل شي ..

طلعت من يمها وفاتو اهلها رجعنا للبيت بقيت ادور على خيط او امل ممكن يوصلنا الها بس ماكو شي حاولنا 4 شهور ونص احنا ندور و صارت علاقتي بمروة كلش قوية وهي واهلها قنعوني على الخطبة وحتى وسام كالي شهد اعزها واني وياج نطلع ندور واساعدكم بس خلينا نخطب حتى محد يحجي عنج وفعلا خطبنا بس بقت غصة بكلبي جانت تتمنة تشوفني مخطوبة وعروس
بيتنا مليان فرح وعرس واغاني بس سعادة بكلبي قليلة الشي الوحيد الفرحانة بي هو وسام لان يحبني ومداريني كلنا اتغيرنا بعد ما تركتنا واختفت
حال بيت عمتها كلهم مقهورين وخايفين

اما مهند قصة ثانية ضعف وتعب ودائما كئيب مكضيها دوام ونص دوامة اجايز وكام يدخن وهو بالاصل بحياتة ممسويها هامل روحة دائما
و طبيعي مشاكلة ويا سرى الحقيرة زادت اكثر و على حسب كلام مروة كل ما يفسخ ويعوفها او يكللها كل شي انتهى تبقى تتوسل بي وبامي بحجة تحبة و المشاكل الدتصير بسبب عيون الناس ويرجعون بس هي استغلالية عاشت برفاهية وعز مصاير بعد ما انخطبتلة لكن ما تطول يجي يومها وترجعلها الدنيا السوتة بالناس بس هي مسألة وقت مو اكثر ..