عيشة سعيدة

7

#عيشة_سعيدة7
Shahd Alsalman
اخذو كل شي لابستة من معدن و ذهب فتشوني زين وكلولي انه باجر موعد التحليل بالطب العدلي حتة يشوفون اذا فعلا كلامي صح واكو اثار اعتداء او لا ..
جنت احس ماخذيني لكبر او حفرة جبيرة وظلمة وما اعرف شنو منتظرني بيها اول مفتت للزنزانة
باوعت كلهم صافنين علية ويريدون يفتهمون شنو موضوعي وليش وحدة بعمري هنا حسيت كلها دتسأل هالسؤال بداخلها فتت مشيت شوية اريد اشوف وين اكدر اكعد ماكو شي لا كرسي لا فراش لا طبلة ولا شي وكعدت بالكاع مثلي مثل الموجودات باوعت اشكالهم اللي لابسة من غير هدوم واللي وجهها مخيف عبالك فعلا مجرمة واللي ممهتمة لاحد واللي تدخن واللي نايمة ولا تدري شكو ماكو اجتني وحدة تريد تسال وتعرف
- شسمج
باوعتها بقلق ومردت اجاوبها
- شبيج خرسة
- لا بس ما اريد احجي اسفة
ضحكت ضحكة بصوت عالي
- ديلة عساس شون ميتة احجي وياج وعافتني ودارت وجهها تهز بيديها وراحت ..

صفنت شون وصلت لهنا وليش الدنيا عوجة ويا العدل وليش اقرب الناس واللي لازم يحافظون علية و اني امانة عدهم هيج سوو بية وخالتي شون كدرت تتهمني وتذبني بهيج مكان جان من الاول خليتوني اعيش وحدي او اذا كلش كلبكم علية خلوني بميتم وخلص
كل هالاسئلة والافكار ببالي ما عدا افكاري باللي جاي ومصيري خلصت سادس ومنتظرة النتيجة و تالي راح مستقبلي والنتيجة ...
حصرتني بجية وضميت رجلي لجسمي وختلت راسي بيدية وبجيت ع الصامت و مطلعت اي صوت خفت ازعجهم او يحجون علية او يجوز يضربوني ما اعرف شنو ممكن يتصرفون وياية اشكالهم تخوف مثل اللي نشوفهم بالتلفزيون ..
ورة شوي حسيت وحدة خلت ايدها على راسي وتحجي وياية
-كافي اذا انت ممسوية شي ومظلومة راح تطلعين منا حتى لو بقيتي سنين راح يظهر الحق هذا ابتلاء من الله ولازم تحمدي علي يمكن وراه خير الج ويمكن هو سبب براحتج بعدين
- رفعت راسي وبعدني ابجي واحجي بس اني دافعت عن نفسي وشرفي اني مسويت شي ولا جنت اريد اكتلة او اضربة او حتى احتك بي ليش الدنيا متروسة تجار مخدرات وقتلة وحرامية وجايين علية اني اللي ما اذيت احد ليش كادرين علية لان اني وحدي لا ظهر لا سند لا اب لا ام لا اخ ليش ؟؟
حسيتهم انتبهو علية وصار هدوء المكان كانما ديريدون يسمعون جواب لسؤالهم اللي بداخلهم
رجعت دنجت واكمل بجي بس هالمرة بصوت عالي وبشهكة حتى هم انقهرو وكامو يبجون واكو بيهم اللي سكتت وبلشت تدخن واللي دارت راسها ونامت كانما دتنهزم من شي ماذيها
كالتلي المرية السند هو الله ولا تخافين هو يوكف للكل حتى ولو بعد حين حيظهرلج حقج.

حسيت ارتاحيت لكلامها وهديت شوي بس احتاجيت انام كتلها اريد انام تعبانة كلش فتحت ايديها بمعنى نامي بحضني وبدون شعور حضنتها و دمعت و هي تمسد على راسي وصوتها ناصي جانت دتقرة دعاء او ايات ما ادري لان غطيت بالنوم جني منايمة سنين حضنها مثل حضن ماما دافي وحنين ما اعرف ليش ارتاحيتلها بس متاكدة هي مظلومة مثلي ولاعبة بيها الدنيا لعب ..

مرت الايام بين التحقيق وبين الفحوصات وبين النقل من مركز لمركز ومواجهة واعترافات وتصديق اقوال اخذ تقريبا شهر ونص بس اللي فهمتة انه كدرو يثبتون كلامهم وانه التهمة لابستني مية بالمية وطبعا كل اقوالهم وشهاداتهم زور وخاصة خالتي وابنها وما اعرف التحليل اللي سويتة يمكن بي غلط او الاثار الموجودة تبين غير شي ما اعرف
كل يوم يفوت احسة سنة علية وما اعرف شنو طلعت نتيجتي بالسادس كعدت افكر اذا مكملة معناها حتى فات وكت انه اقرة واعيد الامتحان يا رب خلصني من هالسجن اني مظلومة تعبت ما كمت انام زين ونفسيتي تعبت اكثر كل شي هنا يعيش الانسان بكأبة كل يوم اسمع قصة وكل يوم تجي وحدة شكل بس اللي صار انه الكل حبوني واتقربو وحدة للوخ بسببي جنا دائما نحجي ونسولف واتعمد انه احجي بمواضيع برغم كل همي وتعبي بس كل وحدة بيهم ولو جان عدها شي او ما عدها فبداخلهم انسانة نست نفسها بسبب ظروفها القاسية وعدة الوكت وصار شهرين وبهالفترة كل يوم افكر شون اتصل بعمتي بلكت تكدر تساعدني مدا اتحمل ابقى هنا اريد اطلع حتى اكمل حلمي واحقق لاهلي نجاحي واحسهم يفتخرون بية حتى وهم ميتين بس مراح يصير هالشي نسوني يمكن واحتمال مو على بالهم او لهتهم الدنيا عني حتى مودة ما شفتها ولا وصلتني و بعد فترة ايام تحدد موعد المحكمة حتى نعرف الحكم
انحكمت ب 10 سنة سجن لان كل الادلة ضدي وهمين اتهموني بمحاولة سرقتهم ولان عمري بعد شهور يالا يكون 18 فتحدد بأقل من هالمدة مع اشغال شاقة والقرار جان قابل للطعن
بس منو حيطعن بي اني وحدي لا محامي ولا شي لكن الله موجود مينساني بلاني وهو يدبرني ..