عيشة سعيدة

9

#عيشة_سعيدة9
Shahd Alsalman
رجعت لمكاني وجنت فرحانة كلش ومرتاحة شي كلش حلو اللي عندة اهل وعندة احد يسندة و يصدكة وخاصة لمن تكون مظلوم و ما بيك تطلع حقك ولا تكدر تثبت براءتك والسجن مو هين
ولو جنت ويا البنات وكلهم مثل خواتي وكل وحدة الها قصة شكل بس صعبة خسارة الحرية
لكيتهم على نفس الدائرة ومنتظريني واني من كد فرحتي حجيتلهم كل الصار وياية وكلهم فرحولي طبعا ..

جانت وحدة مو كلش تحبني ويا الكل تسوي مشاكل ما اعرف ليش وما حاولت اتقربلها لان تتبلى ع البنات واني مناقصني مشاكل وبصراحة اخاف منها اما البقايا فصادقتهم وعرفت مشاكلهم واحاول اساعدهم ولو اني كل الاسوي بس اسمعلهم يعني دعمي الهم معنوي اكثر من المادي وتقريبا صارو صديقات وحدة ويا اللوخ كمنا ناكل سوة نصلي سوة سوينا وقت رياضة ووقت نلعب بي ووقت ندردش ومرات نطبخ ومرات ووحدة تسال اللوخ من باب المناقشة يعني تقريبا كدرت اصلح ولو شوية من نفسيتهم بسبب طاقتي الايجابية برغم كل الظروف ابقى مبتسمة صح مهمومة بس مو ذنب احد يعيش كأبة وياية وبالتالي الله موجود مينسى احد واني مؤمنة واعرف وواثقة بكرم رب العالمين ...

بعد محجينا وكملنا سوالف دعولي ووحدة منهم كالت يعز فراكج علية واكيد ع البنات بس انت بنية بعدج وتوج خطيتي حياتج الله يوفقج ويفك اسرج حضنتني والبنات انقهرو من كلامها لان فعلا بهالمدة حسيت بحبهم الصافي البلا مصالح ولا استغلال
طبينا للزنزانة صلينا وصار وكت الغدة
اجتي نجاة المشكلجية اللي متحبنا تريد تاكل ويانة
- تعاي مكاني
ردتها فرصة اقربها النا
- شنو مكانج يعني متمننة علية بي مثلا لو مسويتلي فضل
- اني حاجزتة الج بالاصل بس انتظرتج تجين حتة نلتم كلنا
البنات صافنين علية هاي شدا احجي اني كتلها يلة تعاي
- وانت وين تكعدين
حسيتها لانت هي تنسى نفسها وراسا ترجع تصير قاسية
- يمج اكو مكان بالركن ترة ما اخذ مجال هواية وضحكو وهي حاولت تداري وجهها وبسمتها
اكلنا بس هي صافنة
- اصبلج لبن
- لا
- زلاطة ما عندج
- شعليج انت التهي بروحج وكلبت ماعونها وكامت اليمي دتريد تكوملها سكتتها ورجعتها كتلها ميخالف لمينا السفرة وكعدنا نرتاح واكو نامو شوية اجتي هي تسوي عركة كوة
- باعي عود مو تحرجيني كدامهم وتكليلي حاجزتة سوالف اللواكة جوزي منها وترة محد يحبج هنا بس انت لزكة
- زين شسوي حتى يحبوني
صفنت وسكتت
- لا تسوين محد يحبج واني اولهم
اني سكتت
- شنو لابستني
- لا العفو بس انقهرت ليش متحبوني
- تستهزأين
- من رخصتج
جرتني من ايدي ودفعتني
- شنو تعوفيني واني احجي ضربتني راشدي ولو قوي بس سكتت حسيت تريد تفرغ طاقتها واذيتها بية
- انت لو سبعة تواجهيني بالساحة مو بيناتهن ولا يم الحرس ترة ما اكتلج ولا اخليهم يكتلوج
ردت استفزها حتى تفرغ بية وتهدة وترجع لوعيها
سحبتني و رحنا للساحة جانت يبقوها للمغرب يالا تنسد
دفعتني للكاع وكعت والبنات اني اشرتلهن قبل لا اطلع انه معليكم شيصير بيناتنا وافتهمو علية
كومت نفسي ونفضت هدومي
- كدها انت؟
- انت ششايفة نفسج ؟
وظلت تضرب واني بس مغطية وجهي وما احجي وكل ما احسها تهدى استفزها لحد ما كومتني وع الحايط جرتني وبقت تضرب بكل قوتها الصراحة اذتني هههههه بس ميخالف الا اوصل حل وياها
لحد ما كتلها اهدي
وكفت ايدها من رفعتها و تتنفس بسرعة تعبت ونزلت على حيلها تبجي واني هم نزلت وياها موتتني كتل ههههههه
حضنتها وهي تحاول توخرني وتعيط واني اكللها اششش اهدي انت بامان لحد ما استسلمت وهدت وبقت تبجي بحركة
- اكرهة اكرهة حقير
- ليش
- خاني وياها اذاني واني بعت الدنيا كلها علمودة وتالي باعني ومبقالي احد
- اني يمج وما اعوفج والبنات خواتج واهلج ميتركوج ولو يدرون انت هنا يجوج
- درو وتشمتو بية
- ابوج وامج ؟
- لا عمامي كلها شمتت بية
- ذولة مو اهل اليسون هيج اني اقصد ابوج وامج يحبوج
- لعد انت مو اجتج عمتج ليش ما شمتت بيج
طلعت سامعة حجينا من سولفت للبنات
- اني ما عندي اهل غير عمتي اهلي ماتو من جنت صغيرة بالمتوسطة وهي سندي بعد الله وحتى اللي جابني هنا هم بيت خالتي بس انت اهلج الله يخليهم الج موجودين
وخرت وباوعتلي بقهر
- انت يتيمة؟؟؟
- اي
ودنجت وحاولت ابجي حتى استدرج عطفها وحسيت عاطفتها بذيج اللحظة ووعيها صحو وحضنتني وتشهك بالبجي وظلت تتعذر
- انت تشبهين الخاني وياها واني حاقدة عليج بسببها وبسببة واكره البنات لان جانت صديقتي حيل متصورت بيوم تغدر بية هيج
بعدين وخرتها
- احنا كلنا مظلومين حتى لو سوينا شي بس ظروفنا صعبة وكل انسان يغلط بس محد يرحم احد
- كالت حاجبج وخشمج ينزفون كومي خلي اداويج
- تعرفين؟
- اني ممرضة اصلا
كمنا وسندتني ومن فتنا البنات سون نفسهن نايمات حتى يشوفن شحيصير بعدين داوتني واني ابالغ بوجعي ومو كلش متأذية بس حتى لا تنسة هي وجعتني وتصحة كل ما تعوف نفسها للالم التعيشة
واللي افتهمتة انه هي هنا لان كاتلة البنية صديقتها الخانها زوجها وياها لان ذيج رادت تكتلها بالسجين حتى لا تفضحها يم اهلها فصار دفاع عن النفس مثلي
بس زوجها الشاهد الوحيد والحقير خذلها وانهزم و تصرفاتها نتيجة خيبة الامل وعذاب الضمير
نذرت اذا طلعت منا ما انساها وادور اهلها واجمعها بيهم وبلكت يساعدوها
داوتني وكملت وكالتلي كومي بدلي بدلت ونومتني بمكاني رجعت تتصرف مثل الممرضة وحنينة كلش ومن بعدها صرنا صديقات وبلشت تندمج ويا البنات صح مرات تتاذى من تتذكر وتبقى تفكر بس نساعدها وتتجاوز الازمة الحمدلله ...

جنت انتظر اليوم اليجي مهند بي..
مهند بي شي من بابا حنيتة يمكن ونظرات عيونة ما اعرف يمكن يعطف علية بس محسيتة عطف بكد محسيتة اهتمام وخوف
اجة يوم الزيارة واجة مهند والمحامي وياه بس بالاول كعد مهند وياية وبعدين ويا المحامي حتى احجيلة القصة كاملة ..