عيشة سعيدة

17

#عيشة_سعيدة17
Shahd Alsalman
حلفت الا اندمة واخلي يبجي دم هو وذيج الحقيرة اعرفهم واحد يحب اللاخ اني هم جربت الحب وهمين انكسرت وتركني بلا سبب وقررت اصادق اي ولد ممكن يتحرش بية حتى ارجع اكسرة لهذا ما تحملت من انخطبت هو يحب غيري وعبالة اني ثولة او ما احس بشي بس دائما اكول ليش ما اخذها لعد
اهلي شديدين وياية بس احنا كطبع اني واخواتي لسان عدنا صلافة ونخاف بس من بابا واخويا الجبير ليث
كم مرة و كم طلعة يغلط بأسمي اول مرة مشيتها وثاني مرة بس تكررت 4 مرات صحيح اني اخذتة لان هو حلو وشخصية وفلوس ويكدر يحققلي اللي اريدة بس هم ضجت من الوضع احتاجيت احس بالحب بس تاكدت محد يسوة هو مثلة مثل غيرة وكلت اسوي موقف وياه حتة يحسبلي حساب واكدر اسحب منة كد ما اكدر هداية وذهب ليش يروح من ايدي واني هم مو صغيرة كبرت وهيج الحياة ماشية وهذا الصح هيج جنت افكر ..

رجعت للبيت اول مفتت طكيتها ببجية وكتلهم هذا همجي ومتخلف ومد ايدة علية وكدام اهلة
اهلي اتخبلو ابويا راسا خابرة مغلق ورجع دك لابو ونزل علي فشار ورزايل وابو يعتذر منة لان هو يصير خالة فلهذا سكت عمو ابو مهند
ورة اسبوع صارت صلحة وما رضيت الا بكلادة ذهب وهمين مو هو اجة لا دزها بيد امة و يمكن حتى مدازها يجوز امة هي جابتها حتى ترضيني ..

بالفترة الراحت كمت اتقرب لمروة مروة جنت اسميها عربانة لان على نياتها و تتأثر بسرعة جرجرت منها كل الحجي والمشكلة ما لزمت شي على شهد بس مروة مرة كالت اني معجبة بمحمد صديق مهند واستحي منة و مدايرلي بال بعدها مراهقة واستغليت هالشي وكمت ادور على شي ابعد بي شهد عن هالبيت وما ادري شلون لان نظيفة وما عدها شي بس راح ادبرلها قصةما تعصى علية ..

وكمت حتى احجيلها لمروة عني وعن مهند واشكيلها اول وحدة خليتها تكره شهد هي مروة وطلبت منها تحجي ويا اهلها علمود التلفون حتى اخابرها دائما واكدر اتصل بيهة بس اهلها ميقبلون واني استغليت هالشي كتلها ليش ميقبلون شهد هم عدها وبكدج هم عدهم مو واحد اثنين بعدين اذا انت انعجبتي بأحد شون تحجين وياه لعبت بعقلها حتى تجيب موبايل وانفذ خطتي الجهمنية ..

مروة
ضجت من البيت كل طلبات شهد مجابة الا اني وحجي سرى صح لان يحبوها اكثر مني وكل شي تحتاجة عدها الا اني لازم اطلب ولو يقبلون لو لا مرات من اضوج شهد تخليني ساعة العب بتلفونها ومرة لكفتني دا ادور على فيس محمد كالت ها مراوي منو هذا ترددت وما اعرف اجذب على شهد برغم غيرتي بس احبها لان هي تحبني لكن انجريت للغلط وما اعرف شلون المهم كتلها
- صديق مهند
- اي صديقة وبعدين !
- لا هيج يعني اقصد ..
- عاجبج ؟
- الصراحة اي بس يعني ممهتم هو
- حبيبي بعد وكت على هالامور انت صغيرونة وحلوة والكل تتمناج تصيرين بأحسن كلية وشاطرة لا تضيعين تعب اهلج
حجيها يريح كلبي بس اني دائما اندفع وما ابقى على راي
- صحيح
ورة كم يوم كلت ليش ما اكول لشهد تنطيني تلفونها القديم العب بي
رحتلها وطلبتة
- مراوي اهلج يدرون؟
- لا
- لعد ما اكدر اسفة لا تزعلين مني مشمش
- انت مو اختي الجبيرة وتعرفيني وواثقة مني ليش لعد متقبلين وصيري انت مسؤولة عني احجي وابجي
مسحت دمعي وباستني
- اللي تريدي يصيرلج بس لا تصغريني كدام اهلج وما احطلج بي سيم كارت ترة مجرد العاب وحتى برامج ماكو اوكي ؟ وساعتين الج حق بي او العبي شكد ميعجبج واني مسؤولة عنج ومتكولين لاي احد ماشي حبيبي ؟
من كالتلي هيج مروة وشفتها تبجي انقهرت عليها وكلت اذا اظل اراقبها شكو بيها واذا شفت شي اسحبة منها وفعلا نزلتلها العاب وكامت تكضي وكت وتتونس فرحت من شفتها هيج ولو ادري غلطت بس ميخالف ما اشيل عيني عنها الا اتاكد متسوي شي يالا
عدت فترة شهر ونص وكل يوم على نفس المنوال طبخ وتنظيف واكعد اقرالي كتاب او رواية و اروح للبنات مرات يجوني حسب
ونكعد اني ومروة نلعب بالموبايل و نسولف فمن تأكدت ماكو شي خلص تركتها ونطيتها حرية اللعب بأي وقت واول تالي مبي سيم كارت وهمين تجرب شوية انه تكون بلا رقابة ..