عيشة سعيدة

10

#عيشةسعيدة10
Shahd Alsalmsn
خجلت اكعد وياه وهو يباوعلي وديباوع وجهي وايدي بيهم اثر ضرب ولو خفيف
- منو ضاربج؟
- محد بس اني وكعت منتبهت وزلكت وهيج صار
- شهد احجي ترة اكلب الدنيا
- مو كتلك
احجي بس ما اباوعلة لان من عادتي ما اجذب ويبين علية لهذا ما باوعتلة واساسا مستحية منة
- ماشي زين انت شلونج مرتاحة
- ههه الحمدلله
- مو قصدي اكيد محد يرتاح بسجن بس اقصد مناقصج شي هنا
- لا كل شي موجود الحمدلله
عمة وعمو ومراوي شونهم ؟
- زينين ؛ شهودة هذا المحامي انور صديقي واحسن محامي اريدج تحجين كل شي حتى الاشياء التخجل هو امان وتفصيل صغير يساعدنا
- اي ميخالف
- يلة حصيحة واعوفج واروح ليغاد بس اني يمج واباوعلج اذا ضوجج اشريلي وافتهمج اخذة ونروح
- ماشي
راح صاحة واجة المحامي عرف عن نفسة وتعرف بيا بلش يسالني عن وضعي ببيتهم وحياتي بصورة عامة وياهم وسالني عن تفاصيل الحادث
حجيتلة كل شي و شون يتحرش بية وعن مودة شون جانت تعرف بالموضوع
وعن كل شي صار وياية حتة موضوع انه يستخدمني ابو للكدية علمود الفلوس واللي تعرف بالقصة ست نهلة لان سالني منو يعرف او شاهد على هذا الشي كملنا وصاح المحامي انور لمهند وديطلعون صحتلة مهند جانت الحارسة تكبل ايدي واني دا احجي وياه هو غمض بقهر واتقربلي ..
- كولي
- مهند اعرف راح اثكل عليك بس عفية اريد اعرف نتيجة السادس مالتي معرفتها لهسة
- بسيطة وبعد ؟
- هاي اسمي ورقمي الامتحاني ومدرستي وانطيتة الورقة
- اعرف اسمج ترة ههههه
- هههههه الورقة بيها اسماء شغلات محتاجتهم تكدر تجيبهم؟
- شنو تريدين اجيبة الج لو جانت نجمة بسما
صفنت بعينة شوية وابتسمت
- شكرا ؛ سلملي عليهم
توادعنا وراح ..
حسيت براحة مو طبيعية هالولد يكدر يخليني فرحانة طول الوكت وصح اخجل منة بس طلبت النتيجة وكم كتاب محتاجته اقرة لان احب القراية واحب اتعلم كل شي
من جنت اروح لست نهلة هواية جنت اقرة كتب يمها وهي تعلمني وحتى لغتي الانكليزية تطورت بسببها لان جنا نتحاور بيها كالتلي مرة الانسان ميفيدة الا علمة يمكن اليوم ميستفاد من معلومة يعرفها بس بعد فترة يجي وكتها وتنور دماغة ..
رجعت وكلي امل اكون ناجحة وهمين اريد اشوف اهلي واريد اطلع منا واكمل حلمي وطريقي
صليت لوجه الله ركعتين حتى تسهل اموري وعدت ايام وصارت زيارة
واجة مهند كعد كبالي سلمت علي
- وين عمة؟
- اني جاي زيارة استثنائية اريد اكلج شي
- اعرف عادي مهند مقصرت انت
- هو شنو ؟
- اعرف التهمة لابستني وادري مراح اطلع منا الله كريم
- هههههه
ضجت كلش على شنو يضحك دا اريد اكوم
- سلملي عليهم
لزم ايدي
- زين انت على اي اساس نجحتي وطلعتي 93 وانت تحجين بهذا العقل الصغير
رجعت كعدت مفتهمت شحجة او افتهمت بس انصدمت ما اعرف شسوي صفنت وهو صفن وضحكت باندهاش
- صدك مهند؟؟
- هههههه والله
ونطاني ورقة نتيجتي ممصدكة اباوعلها وابجي بضحك واكمز اول مرة افرح هيج فرحة واول مرة احس حققت حلم ولو نص الطريق وفرحت اهلي بية
- بس اهدي والله فضحتينا بصوتج ههههه
ما اعرف شون بدون شعور حضنتة وهو حضني يضحك واني ابجي
- اهلي فرحو بية مو ؟
فجاة وكف الضحك حط وجهي بين ايدة وباوع بعيني
- اكيد العندة مثلج ومثل طفولتج وعقلج يظل طول عمرة فرحان
بجيت كلش تمنيت هم وياية وتمنيت احضنهم وابوسهم واشوف الفرحة بعينهم بس انتبهت اني بحضن مهند
وخرت منة وخليت ايديا على وجهي
- اسفة والله انفعلت ما منتبهة
- هههههه خرب عقلج
نطاني علاكة كتب وفوكاها كم كتاب من عندة اقراهم واشعار ودفتر مليان نكت كال تتونسين بيهن وجابلي حية ودرج هههههه شكرتة وخلصت الزيارة وراح
رجعت للزنزانة وحجيت للبنات عن نتيجتي وفرحولي وهلاهل وركص كلش تونست بيومها
وكعدنا نقرة النكت متنا ضحك وبعدها اجة الليل كمت اقرة بالكتب هيج اخذ فكرة عنها حتى اختار واحد اكملة نعست ونمت

وعدت الايام وانفتحت القضية مرة لوخ بطلب من المحامي وطبعا تحقيقات على ادلة يعني مشوار طويل شوي عدة الشهر والثاني والثالث حسيت ماكو امل وكمت اتضايق كلش
نومي تخربط اكلي كل شي كمت احسة يضايقني فد يوم عفت البنات ونمت من وكت حسيت جسمي يوجعني وراسي ودايخة كلش ما اعرف شبية
كعدت ثاني يوم لكيت ايدي مقيدة بطرف سرير ومغذي و جهاز اوكسجين شنو الموضوع ما اعرف و جني بعيادة او مستشفى اريد احجي بس تعبانة رجعت نمت وراها من صحيت كالولي هبوط حاد بالضغط وضيق تنفس وحرارتي عالية جانت و3 ايام فاقدة وعي من الاجهاد والقلق
بعدما صحيت وتقريبا صرت احسن رجعت للسجن لان ما يهتمون اذا كلش طبت او لا المهم اكدر اكوم
صار ثاني يوم موعد زيارة وجان المفروض اشوف عمي وعمتي وطبعا هم ميعرفون بحالتي ورحتلهم بس احس بتعب بعدني ووجهي مبين بي المرض فتت لكيتهم كلهم مروة ومهند وعمتي وعمي
سلمت عليهم واني اضغط على نفسي كوة بالضحك والحجي بس غطيت ايدي برداني حتى لا يسالوني ع الكانونة البيها مال مغذي
بقو يحجون بس حسيت دافقد تركيزي واعرك بسرعة كتلهم حارة هنا هاهية روحو
اصلا بعدها مخلصت الزيارة بس تعبت اريد يروحون كمت كوة احجي عمي كالي شبيج بنيتي كتلة ما بية بس حارة كالي زين الجو فمروة تريد تتشاقة وياية كالت طبعا متحملتي جمالي ولزمت ايدي التوجعني صحت وسحبت ايدي هم فزو والموجودين هم فزو عمتي كالت اسم الله شبيج بس احس لزمت كلبي مو ايدي من كد ما توجعت
العرك من كل مكان يصب رفعت راسي احس بغواش و صوت متكطع اسمع واخر شي شفتة جان مهند وغمضت
استمرت حالة الهبوط والتعب ونفسيا تعبت هواية
بعد مدة من صرت احسن وطبعا مفاركوني بيت عمتي ابد
صار موعد زيارة ثاني وجان المفروض يجي المحامي بس المفاجأة انه المحامي مو وحدة هالمرة وياه مهند ومودة ركضت علية وحضنتها بوستني وطبعا من الاشتياق بجينا
كعدنا نحجي وافتهمت انه هي طول هالفترة تتواصل ويا مهند عن طريق رقم بت جوارينهم واللي اكتشفتة انه اهلها ضامين تحليل يثبت برائتي وهي بهاي الفترة انخطبت فكالت اني اكدر اكون شاهد سري وهذا الافتهمتة من المحامي مجنت اعرف هالشي كتلها شون يعني فكال المحامي هي شاهدة على معاملتهم الج وعلى موضوع التحرش وتدري بتزوير الاوراق ودتحاول تدور واحنا نحاول نسحب نسخة من التقرير
فبعيدا عن الجلسة القاضي وهي يكعدون سوة وتحجيلة كل شي حتى تطلعين براءة
وست نهلة هم كدرت اوصللها علمود تشهد على موضوع وردتة يسكت وارتبكت لا يعرفون بس مفتهم علية
وكمل كلامة موضوع التسول الاجباري
مهند ومودة كالو شنوووو !
اني ما ادري وين اودي وجهي من الخجل كالها
اي نعم والدج جان يجبرها على التسول في سبيل تجيب الة فلوس مجان عندج علم؟
كالتلة لا بس اعرف هي تطلع وجانت تكول اروح ادرس وبابا يوديها بقت تبجي وكالت اهلي يخجلون وناس بلا رحمة
ومهند صار نار وعصبي ويباوعلي ليش مكتلة وليش سويت هيج وضميت مجاوبت ولا رفعت عيني فد موقف ما انحسد علي
خلصت الزيارة ومن ديطلعون اندار مهند علية وجان وجهة ثكيل وبعدة العصبية ماخذتة كالي شهد اذا ضامة شي بعد هالمرة ازعل منج هواية
واكدر هسة احركهم بس انتظر تطلعين منا لان محتاجين لذولة الجلاب والله لا اربيهم وخليها ببالج انت وراج مهند هزيت راسي كال مع السلامة
صحتلة مهند لا تزعل مني ودنجت مجاوبني وراح ...