عيشة سعيدة

21

#عيشة_سعيدة21
Shahd Alsalman
لكيت شقتين وكلت اروح واشوفهم
مريم رادت تروح وياية كتلها ما اطول وراجعة بقت تلح عليا كتلها اريد اطلع وحدي شوي كالت براحتج
رحت لاول شقة لكيتها زينة ونظيفة وطبعا مأثثة بس صاحب العمارة مو راحة واني عزابية فكال وحدج مو كتلة لا زوجي وياية بس لازم خفر لان هو ضابط عاد هو غير اسلوبة وبدل رأسا كتلة اشور رجلي واردلك خبر وجذب بس اريد انهزم ..

رحت للثانية شفتها مأثثة وكاملة وبالطابق الاول بس اصحابها ناس كبار بالعمر وكالو انت وحدج كتلهم اي من بغداد وجاية ادرس بالبصرة فتساهلو وياية بالسعر واجرتها منهم ومبينين ناس طيبين وميدورون ايجار غالي او شي صحيح كذبت عليهم بس ما اكدر اكول لوحدي كملت واتفقت وياهم ورجعت للبيت بس نسيت اشتري غراض باعتبار جنت بالسوك كالت مريم ها وين غراضج جاوبتها بارتباك ما لكيت الاريدة ..

قررت اطلع منهم باجر الاحد يصادف وهم يطلعون كنيسة فالم هدومي وكل شي واروح بالليل بقيت وياهم لاخر مرة وحسيت باشتياق من قبل لا اروح تفرجت وياهم فلم سوينا عشا وسوالف وضحك راح انحرم من هاللمة والدفو بس ما اريد اذيتهم كملنا وكلمن بفراشة طلعت ارقامهم عمتي ولارا وخالة وكلها انطيتهم حضر حتى لا احد يوصلي وهمين اكسب وقت علمود الحك الم كل شي واروح
نمت شوي وظليت كاعدة انتظر شوكت يطلعون وسويت نفسي نايمة مكدرت اشوفهم لاخر مرة غاصة بالعبرة وما اريد احد ينتبه راحو وكمت بسرعة لميت وبدلت وتركت الرسالة الهم كتبتلهم بيهة لا يظل بالكم علية وشكرتهم على كل شي جنت اكتبها واني ابجي
طلعت وكلت لعمو ابو كريم يجيني شافني شايلة جنطة
- مسافرة؟؟
- لا
-وين نروح ؟
وصفتلة المنطقة واحسة كلة فضول يعرف وين وشنو هالجنطة
- شهودة بابا صاير وياج شي ليش متوترة ؟
- لا ماكو شي
حسيت اريد ابجي لوحدي وما اعرف شنو حيواجهني وشون حكمل الله كريم صبرت روحي بهالكلمة
-زين ارجعلج
-لا
- ماشي
- عمو اريد اكلك شي بس الله يخليك خلي سر وامنتك بداعة ام كريم متحجي شي
- احجي اسمعج
- عمو اني راح اسكن اليوم بمكان جديد ولازم اطلع لان اذا بقيت يتاذون واني ما اريد هالشي
-منو الياذيهم ؟؟ وليش محجيتي وشون تتصرفين لوحدج هيج ؟
- مجبورة عمو لا تزيد همي بالاخير كلها راح تتفارك مدايمة لاحد ولا حتى الناس مجبورين يتحملوني حتى لو يحبوني
- منو هددج ؟ فهميني
- قصة طويلة وهسة ما بية احجي صدكني غير وقت احجيلك وجريت حسرة
سكتنا طول الطريق وصلت للعمارة وكال حساعدج كتلة لا عمو شكرا الله وياك مقصرت مقبل ونزل وياية حتى يتطمن علية اكثر
دكيت الباب على اصحاب العمارة طلعت الحجية وحجيت وياها واخذت المفتاح وصعدت من فتت سميت بالله وصليت ع النبي كعدت وباوعت للشقة
اتطمن علية عمو وقبل لا يروح كتلة عمو لا تجيب سيرة لاحد الله يخليك وعدني ما يحجي وراح ..

كمت افكر بيهم شديسون هسة وزعلو مني او لا بلا ما احس نزلو دموعي وحسيت نفسي لوحدي ومحتاجة اهلي يمي تمددت و ابجي وغفيت حسيت على صوت الباب كمت باوعت من العين السحرية هاي الحجية الجوة فتحت الباب ورحبت بيها
- تفضلي خالة هلا بيج
- وبيج اكثر عاد كلت اجي انطيج حصتج من الغدا اكيد ممسوية شي ملحكتي
- لا خالة على بختج كلفتي نفسج والله
- يا كلافة يمة الجيران لبعضها وهنا كلنا اهل ان شاء الله
- استريحي اسفة بعدني ممرتبة غراضي جنت نايمة
- اساعدج بشي؟
-لا خالة فدوة لعمرج تسلمين هسة اكمل كل شي ما عندي
-خالة انت اهلج ببغداد
- اي
-ها زين اهلج شعجب امنو يدزوج هنا وحدج
ابتسمت ما اعرف شكللها بس شفتها طيبة وتسال من باب الحرص
-اني وحيدة فمحد يجي وياية
-يا عيني المدللة يعني بس والله لو جاين وياج اهلج مو احسن
-ان شاء الله انتو هنا متقصرون وياية
رجعت سالتها حتى ما تسالني اكثر
- وانتو وحدكم ساكنين ؟
- اي جانو بتي وابني بس اتزوجو وكلمن سافر لبلد كل فترة يجونا او نحجي وياهم بعد كلمن التهى بعيشتة وهاي سنة الحياة
- الله يحفظهم الج يا رب
-الله يسلمج يمة وانت هم بيج شبه من سناء بنتي
- اعتبريني بنتج شتحتاجون حتى لو مسواك لو شي دزيني اني امانة
- فدوة للبنيات تسلمين يمة احنا عدنا سايق يودي ويجيب ويتسوكلنا مرات نطلع اني والحجي نتمشى ونتعلل ونتسوك ما عدنا شي
- الله يطول عمركم و كتلج شتحتاجون حاضرة
- والكايلة يمة يلة اترخص اني اعوفج ترتاحين
جلبت بيها تبقى ما قبلت ونزلت
اكلت شوية وجان فاهي افتهمت هم يعانون من ضغط اكيد ملحتة وما اكلتة ما الي نفس كل ما اصفن اتذكرهم وابقى افكر بيهم وبحالي شراح اسوي ..