عيشة سعيدة

8

#عيشة_سعيدة8
Shahd Alsalman
بيوم من الايام و بعد ما انحكمت ورضيت بقدري ومصيري جنت بالساحة الصبح يطلعونا حتى نتشمس واكو العاب هيج بسيطة حاطيها جنا متجمعين اني والبنات على لعبة دنلعب شيكضي الوكت جبت بطل فارغ مليتة شوية رمل ولعبنة لعبة الاسئلة فكل وحدة تسال المقابلها من يصير البطل بينها وبين الكدامها ودنسأل ونلعب اجتي الحارسة وصاحت اسمي
- نعم اني
- تعالي عندج زيارة
- ضحكت كلت منو يزورني
- يلة كومي
بصراحة ترددت اروح لان ما عندي احد منو يجيني
رحت يمها شاورتها متعرفين منو كالت لا والله

كمت عدلت نفسي وشعري ورحت كلبي يدك بسرعة وما اعرف منو حشوف معقولة خالتي وتراجعو زين خاف مودة بلكت هي لا شون تجي اكيد مانعيها من يوم الثار ما شفتها بعد ودا احجي ويا نفسي احاول اتخيل منو ممكن يجيني

فتت للقاعة من الصدمة شهكت ومتوقعت تكون هي وهي هم ركضت علية حضنتها وبجيت وهي تبجي واكلها وينج عمة شون عفتيني هيج شون مسالتي عني ليش نسيتيني وابجي حيل لحد ماكالت الحارسة ممنوع واحد يقرب من اللاخ عمتي نطتها فلوس وراحت سدت الباب وبقيت بحضنها ابجي وهي تسالني شونج بعد اهلي خما ماذيج خما بيج شي ليش هيج ذبلانة وضعفانة لزمت وجهي وباوعتلي واني ابجي وهي تبجي احجيلي احد اذاج هنا واني بعد ما بية اجاوب اهز براسي
درت وجهي وحضنتها وانتبهت ولد شاب واكف طويل ومرتب و صافن علية وعلى عمة فعبالي واحد جاي زيارة لوحدة استحيت من نظراتة ووخرت من حضنها شاورتها من الجهة اللوخ تعاي نكعد هذا ظل صافن علينا عاد هي بين الضحكت بين بجيتها كالت منو؟ وتباوع علي اني خجلت اكثر لان شاورتها وهي بصوت عالي تحجي صاحتة تعال هنودي هاي شهودة شهودة حبيبتي هذا هنودي ابني انت مشايفتة
هو لكاج وجابني الج
اجة تقرب مني ديسلم علية واني احس مستحية حيل سلم ومد ايدة
- شونج شوش شخبارج؟
ترددت امد ايدي
- زين
- متسلمين ما عندج ايد! هههه
اني هم ضحكت ومسحت دمعي وسلمت علي

كعدنا ع المصاطب ودا احجيلهم الصار بس مكدرت اخذ راحتي بالحجي استحيت من مهند وهو مركز وياية
عمة كالتلة روح شوية ليغاد كالي شهد احجي كل شي حتة هالكلب اذا مسويلج دا اخلص علي خاف مكفاه الكتلة الاكلها مني
اني رفعت راسي كتلة شنو كالت عمة مو صارت عركة لان احنا من قبل شهر رجعنا وقبلها ندك لو ميجاوبون لو يكولون انت طالعة لو مو هنا ومودة مترد تطلع خالتج والفار لعب بعبي حسيتهم يراوغون رجعنا بعد شهر من الاتصالات واللي محد ينطي نجدة كلبي صار نار
برجعتنا حطينا الغراض بالبصرة وعمج كال اخذي مهند واني ابقى يم مروة وصدك جينا لهنا دكينا الباب محد موجود انتظرنا ماكو شي رحنا لبيت اهلج طلعو ناس منهم كالو منعرف شي بعدين سالتني انت مو كلتي ما تأجر البيت كتلها محد بي هي خالتي كالت مديتاجر ومن يكعدون كم يوم ويطلعون من يوم الطلعت لليوم هزت راسها وباوعت لمهند وهو فارت اعصابة
كالت اي وبعدين اجوي ومن اجوي اتلعثمو وكمت اتعاركت ويا خالتج ومودة تبجي تريد تحجي متخليها تالي طببتها جوة وكالت انهزمت ويا واحد ومتشرفنا لا تسالين عليها ومن شافها ابني ضربتة بالسجين وانهزمت طبعا احنا مصدكنا سدت الباب وطلعتنا برة من دنرجع شفت جوارينكم ام جواد اعرفها قديمة نزلت سلمت عليها وهي كامت تحجيلي انه الشرطة اجت واخذتج واتهموج بمحاولة قتل حاولت افتهم وين انت كالت والله ما اعرف واستأذنت وراحت
ومهند من عرف نزل كسر الباب عليهم اجرة وميفيد
تالي طلعو وصارت عركة بينة وبين هذاك الشفية وابوهم
طلعت مودة وخالتج ويفاككون وحطت بيدي ورقة مبين تريد تكول شي وميخلوها عاد جريت مهند وطلعنا من طلعنا طلعت كاتبة اسم المركز وقصة الطعنة وشون الحقير محاول معتدي عليج وكالت تلفوني مسحوب مني واذا عرفتو شي اتصلو بجوارينا هذا رقمها واني موصيتها وهي تعرف وحطو رقمكم يمها واني اتصل بيكم ..
كمت ابجي كتلها عمة متت طلعوني منا والله ممسوية شي من عفتوني يمهم لحد اخر مشكلة اني ممرتاحة والله هو اعتدى علية مو اني وما سويتلة شي والمشكلة كل الادلة وياه واني سويت تحليل وسويت كل شي وحجيت كل الصار والشاهد الوحيد على كل شي هي مودة وما اريد تتاذى لان هي الوكفت وياية وساعدتني واهلها ظلام
مهند لزم ايدي وكالي لا تخافين اطلعج منا واصبري كلها وقت ويخلص كل شي هزيت راسي وخلص وكت الزيارة وكال حضري نفسج حجيب محامي يتوكل هالشغلة لا تخافين..
باستني عمة وحضنتني وكالت مرة اللوخ اجيبلج وياية غراض شنو محتاجة فشاورتها مستحية من مهند وحتى منها بس ضروري لان اريد كم قطعة ملابس وشغلات خاصةوكالت سهلة حبيبتي ادللي باستني مرة ثانية وهو كالي لا تبجين بعد حط ايدة على ايدي وراح ..