عيشة سعيدة

27

#عيشة_سعيدة27
Shahd Alsalman
قررو عمران ومروة يكطعون مهر ويسون حفلة خطبة وتلبيسة ذهب بقاعة وكلنا التهينا بالتحضيرات والملابس والسوك واطلع ويا العرسان نختار ذهب و كم قطعة اثاث والحمدلله اختارينا كل شي على ذوق العرسان وهم كلش متوالمين ومنسجمين
اختارينا الاغاني اني ومريم بالقاعة والكيك لارا وعماد وصو وما اعرف شي عن مهند ولا دا اسال عنة اصلا مديحضر شي ويا اختة ومريم سالت مروة عنه كالتلة مهند سافر من بعد الصار يريد يرتاح
اني سمعت وتضايقت حتى ما كلف نفسة يسال عني بس مو مهم عادي هيج جنت احجي ويا نفسي
اجة يوم الحفلة وبالصالون اني والبنات كملت العروس وكضيناها هلاهل وركص وكل اللي كاعدين بالصالون متفاعلين ويانة طلعت كمر و نازكة حيل
لارا ومريم خلصو كتلهم روحو واني اجي وراكم حتى ما نتاخر لان ما عدنا شي كل التجهيزات كاملة واول تالي اني وعمران نجيكم وراحو وبدت تمكيجني كتلها اريد مكياج هادي بس حمرة شوية صارخة لان فستاني وردي فاتح شوفتهيا بالصور كالت شفتي العروس شون حلوة طلعت اليوم اطلعج احلى منها ضحكت كتلها تعيش ايدج شغلج ما يعلى علي وفعلا سوتلي شي طبيعي ومرتب وبنفس الوقت جذاب برزت كل ملامحي ولون عيوني دكلي عمران وطلعتلة
- شنو هااااي على كيفك ياااب
- هههههه يبوو لا تخجلني
- شخجل راح اغير رأيي ترة واخطبج الج شنو هالجمال ولج
- هههههه بعدك مشايف العروس لعد
- لا والله وفتح حلكة راح ادوسلها اريد اوصل بسرعة
- مو توك تريد تغير رأيك هههههه
- لا عيني اريد حبيبتي اني هههه
- الله يسعدكم يا رب وانت اليوم طالع كشخة حيل ايمن وينة لعد ؟
- اخذتة خالة ام سناء وكالت بالقاعة نتلاكى
- خوش
- احتمال يجي ترة
- منو ؟
- مهند منو بعد
- اي
درت وجهي تضايقت
- لج دهلهلي مو اليوم خطبة اخوج واختج صدك جذب
وكضيتها هلاهل وصفكات كل الطريق وهو حيل فرحان ومتونس وصلنا للقاعة راسلت البنات يخلون مروة وحدها بالغرفة حتى اجيب عمران وكتلة تعال ندخل هنا
دخل واتفاجىء بيها على كد مطالعة حلوة باسها من راسها وكالها وعد علية كدام الله وشهد شاهدة ما انزل دموعج ولا اقصر عليج بشي واسعدج شكد ما ينطيني الله عمر وباس ايدها باركتلهم وعفتهم وحدهم دا اشوف شنو اكو نقص شفت البنات ممقصرين ومحضرين كل شي اجت عمتي وعمو وطكيناها بهلهولة وكولات وهوسات وبلشو المعازيم يجون اتصلت بابو الكيك كال اكو مشكلة وغلط باسم العروس طلعت للمطبخ لان خارجي والحفلة بلشت وحلينا المشكلة بدل الاسم سوينا حروفهم لان صعب نعدلة والحمدلله ماكو بعد اي نقص
فتت للقاعة والكل انتبهو علية دا امشي بالممر مثل عارضة ازياء كلها فاكة حلكها هههه
وصلت لعمتي كتلها خما فاتني شي كالت لا لا هههه
بوستني وحضنتني كالت يوم الالج
طلعو اغاني والكل تركص وفرحانة كومنا العرسان وراها لبسو الحلقات والذهب واخذو صور هواي وهمين ركص وردح
كصو الكيك ومن بعد الكيك ركصو سلو لارا وعماد ركصو ويا العرسان ووسام ومريم وعمي هم عزم عمتي هههههه وكامو كم ازواج وياهم من المعازيم
وبقيت اصفك وصافنة عليهم كطع صفنتي عمي كالي تسمحيلي وكومني ركصت وياه يركص حلو عمو
فرني وطخيت بواحد لزمني وصرت بحضنة و قريبة منة كلش باوعتة بخجل دا اعتذر منة شفتة مهند كمت اتنفس بسرعة واريد هاللحظة تخلص يا الله شكد عيب دا اوخر سحبني لحضنة اكثر وتقرب لاذاني كالي وين مهزومة مني كملي وياية عمج راح وفر جسمة ديشوفني واشوف عمي وعمتي ديضحكون ومريم ولارا يغمزولي ويضحكون ويركصون ويا ازواجهم بس تضايقت و خجلت مليون شعور عشت مكدرت اباوع بعينة وهو مشال عينة من وجهي سحبني اكثر وباوعتلة نزلت دموعي ووخرت منة ومشيت سريع اريد اطلع متحملت ابقى اكثر وياه طلعت من القاعة لبرة شوي حسيت احد وراية لزمني وحضني سد حلكي بس حسيت جسمي ثكل كلش وبعدها ما اتذكر شي.

شفت دموعها متحملت كأنو تعاتبني بعيونها تعذبني نظراتها وما اعرف شلون اخليها تسامحني بعدتني عنها ومشت طلعت من القاعة عمران تقربلي هو ومروة كالولي الحكها ورحت وراها شفتها تمشي سريع وقريبة من الباب شفت واحد حضنها من ورة ووكعت بحضنه وشالها شحط السيارة ...