بيت الزار

الجزء 01

ﺍﻟﻠﻪ ﺣﻲ. ... ﺍﻟﻠﻪ ﺣﻲ

ﻳﺎ ﺷﻴﺦ ﻣﺤﻀﺮ .. ﻳﺎ ﺷﻴﺦ ﻣﺤﻀﺮ

ﺍل فيو ﻋﻔﺮﻳﺖ ﻳﺤﻀﺮ..

بسم الله بسم الله بسم الله الرحمن الرحيم ..

رهام رهام اصحي في شنو مالك ..

بسم الله كابوس بس يا نسيبة مافي شي ..نومي نومي.

انا رهام .. هسي عمري ٢٨ سنة بايرة اي باااايرة .. والله يجازي الكان السبب .. انا وصاحبتي نسيبة شاردين من اهلنا وشغالين في وكالة سفر .. وما اظن اهلي فارقة معاهم كتير هم وانزاح منهم بكون اصلا.. انا بت واحدة وعندي خمسة اخوان كل واحد افقر من التاني .. ما عندي ليهم شي ولا بتمني ارجع ليهم .. احكي ليكم قصتي من الأول وانا عانيت ونفسياتي ادمرت بي سبب حاجة اسمها الظار والشيوخ .. كنت مدمناهم لما ما واعية بي نفسي .. مشيت لي حتات بقعد بالشهور في بيت الظار والشيوخ ودا كلو عشان اعرس ..

* حياتي زماااان كانت حلوة شديد كنت بت ناس يعني ومحترمة .. اتولدته في السعودية .. بابا ( زمن كنت بقول الكلمة دي هسي بقيت اقول ابوي والحاج) كان مهندس بترول في شركة معروفة ووضعنا المادي كويس.. لما وصلت الثانوي .. الشركة ودتو لي فرعها ال في دبي اتنقلنا نقلة فوق .. دي البي سببا جات الحسادة والحقد من نسوان اعمامي .. اي اعمامي الخربو حياتنا وفرقو ماما وبابا من بعض وفرقونا ودمرو حياتنا كلنا .. سافرنا دبي كلنا وكنا مبسووووطين ومرتاحين .. بس فجأة بدت المشاكل لما بابا قرر يرجع السودان وفي السودان يرجع القرية الاتولد فيها وكمان بيت الاسرة البيت الكبير .. ماما ما رضت وقومت الدنيا وقعدتها .. قالت ليه كيف نرجع لي قرية وانت اولادك اتولدو واتربو بره السودان عايز في يوم تدمر كل البنيناه .. اقتنع اول بالقالتو ليه ماما .. لكن اعمامي ما خلوه في حالو بقت التلفونات تتطاقش والتحاريش وملي الراس .. اولادك ما عارفين اهلهم ، سمعتنا في القرية اتخربت ما عارفين نلم اولاد اخونا كبرو وانحرفو ، البت وصلت سن العرس وانت خاليها تقرا قراية شنو آ زول .. امك وابوك علي وش موت وانت ما عايز ترجع .. المهم كترت الكلامات في راس بابا من اخوانو .. يوم الصباح صحينا من النوم بي كواريكهم جينا طالعين من غرفنا لقينا جوازاتنا في التربيزة ومعاهم التزاكر .. بابا قال لينا طيارتنا الساعة عشرة مساء وماف حد يشيل حاجة راجعين بي هدومنا دي .. ماما بقت تبكي ونحن قاعدين حوالينا ما فاهمين شي ..

جات الساعة عشرة وركبنا الطيارة ودي كان اول مرة اجي السودان وانا عمري ١٥ سنة .

يتبع....