بيت الزار

الجزء 02

وصلنا السودان وشكلو كان خريف لانو لقينا الموية والطين في كل مكان .. حالتها دي الخرطوم ال بابا كان بحكي لينا عنها وانها اتطورت كتير وبقت زي السعودية والامارات واحد .. كنا مستاءين كلنا ونطنطن .. اي شي كنت اهبشو بي يدي في المطار بتاعهم بقرف وشايلة جل التعقيم والمناديل امسح بيهم .. وصلنا متأخرين ف بابا حجز لينا في فندق وقال لينا الصباح بنسافر تاني ..

وقت وصلنا بابا جاهو اتصال من عمي ومن كلامو فهمنا انو ودعمي في الخرطوم وحا يجيبنا معاه ..

نمنا من التعب والزعل زي اول مرة ننوم..

الساعة ستة صباح صحينا بي صوت ماما انو القاشر ود عمكم دا منتظركم .. لبست بنطلون وتيشيرت واسبورت وردي ورفعت شعري كعكعة لي فوق ونزلت لي خصل وعملت روج وردي ولبست شنطة الضهر بتاعتي وختيت السماعات في اضاني ونزلته ..

لقيت اخواني تحت مع بابا ومعاهم واحد كدا عرفتو القاشر زي ما قالت ماما .. عاين لي بطريقة زي تقول اني مقرفة .. وصرا لي وقال لي بابا آ حاج علي بدور المرا تمشي كدي ..

طبعا استفزتني كلمة المرا دي رديت ليه علي طول قلت ليه احترم نفسك انت بتكلمني انا رهام علي عاجبك عاجبك ما عاجبك طير من مكان جيت ما لازمنا .

اشوفو ليك اتنفش وشال العصاية ال في يدو عايز يضربني بيها كان ما اخواني وبابا لحقوه ..

ماما زعلت شديد وجاطت في ابوي وقالت ليه ياهم ديل العايز تأمن اولادك عليهم .. عايزين يقتلوهم ليك قبل نصلهم ..

بابا سكت وما قال شي ساقنا وركبنا العربية ومشينا ..

اظن مسافرين خمسة ساعات والشمس والسخانة والشارع الكعب ضهري اتكسر .. بقيت تعبانة وجسمي سخن وحسيت بي اكتئاب ما عادي.

قعدته ابكي وقلت لي ماما انا عايزة ارجع دبي عليك الله كلمي بابا شوفي السخانة والصحراء دي نحن حا نعيش هنا كيف ..

ماما قالت لي اصبري حبيبتي بعد نصل ونسلم عليهم ما حا نقعد وانا بعرف اتصرف ..

بقينا ساكتين تاني وحسيت لينا يومين وما وصلنا قريتهم دي..

تقريبا بعد سفر ستة ساعات وزيادة وصلنا القرية واندهشته من البيوت حاجة كدا كيف كيف صغار وقصار وكل شي في مكان والبيوت ما مبنية زي السعودية ودبي .. مافي شوارع مافي ابراج ولا شي .. في تراب وحجارة في كل مكان .. في حيوانات واشجار ما بتاعت نخيل لكن .. مافي ورود .. الجو سخانة شديدة كانت وتراب .. الناس بقو بعاينو لينا زي جايين من كوكب تاني .. لبست الفريم والكاب بتاعاتي وما اشتغلت بالهمسات والنظرات الاستحقارية الكانو بعاينو بيها لينا ..

ساقونا مشينا شوية كدا دخلنا بيت كان كبييير بس ما منظم كل حاجة مبنية براها هناك وهناك وهناك اول شي لاقتنا ابقار واغنام وحمير .. خفته بقيت ماسكة في يد بابا كنت بشوفها في التلفزيون بس .. بعد شوية بقي في كوراك وبكي وصراخ اتخلعته شديد ويد بابا بعدت عني غصب وما قدرت اصلو تاني..

واحدة من النسوان جات تبكي وتصيح يا اخوي يا اخوي الليلة جيتنا الليلة رجعت لينا يا سندنا يا ابونا الفارقتنا بدري الليلة يوم عيدنا والزغاريد والبكي ..

سلمو علي ابوي حتي بعد نص ساعة اتزكرو ماما وسلمو عليها عادي .. ونحن نفس الشي ..

دخلونا جوه غرفة مكسرة فيها تلاتة سراير معمولات بي حبل ومافيهم اي مرتبة .. بالجمبة في شوالات كتيرة فوق بعض والدجاج كان جوه الغرفة .. كل شي وسخان ومقرف والريحة فظيعة .. بقينا قاعدين برانا وما عارفة بابا ساقوه ودوه وين ...

يتبع....