بيت الزار

الجزء 09

مرت خمسة ايام صحتي ادهورت فيه حسيت بي روحي بقيت خفيفة شكلي نزلت تلاتة كيلو .. ما قدرت اكل اكلهم كلو شحوم ولحم وزيوت وملاح وكسرة وما بعرف شنو .. انا كنت متعودة اكل جبنة وزيتون وفطاير وخضروات وزبادي .. اتزكرت ماما ولي هسي ما جات سألت مني ولا رجعت تاني .. وابوي واخواني بقيت ما بشوفهم كتير .. شكلهم اتبدل خالص ولونهم اتقلب وظهر عليهم التعب .. انا بقيت ما بتعرف ملبسني جلابية اكبر مني ومقددة وطرحة وعلي طول نضافة نضافة وطبيخ .. الخمسة ايام دي حسيتا خمسة سنين .. كنت قاعدة تحت الشجرة وماسكة لي قشة بشخت في الارض .. جاتني سعدية قالت لي هاك القروش دي امشي الدكان بتلفي علي يمين الديوان بتشوفيه جيبي بيكربونات ادرج بيها ملاح الورق دا .. وخليه اديك صعود بالباقي .. قلت ليها كويس وشلته القروش وطالعة كدا من الباب اشوف ليك القاشر الجانا في الفندق وساقنا داك قال لي ماشة طالعة وين ادخلي جوه .. جاه صوت سعدية خليها يا عثمان مرسلاها انا .. دا عثمان بقيت عاملة كدا 😮😮😮 كان يكون موتي ما اعرس الاهبل دا دفرتو بي يدي وصريت ليه وشي وقلت ليه طير من وشي تطير بركة الله ما ياقوك .. محروقة منو منفوش كدا عامل لي فيها راجل .. قال لي هانت يابت علي .. ما رديت عليه .. ومشيت عديل جهة الديوان كان في ساحة كبيييرة كدا وهداك شفت الدكان كان في ناصية كدا .. مشيت عليه لقيت بت قدامي انتظرتها شالت حاجاتها .. قلت ليه السلام عليكم هاك عايزة بيكربونات وصعود .. بتاع الدكان بقي بعاين لي .. قلت ليه نعم خير في شي .. قال لي لالا انتي بت علي .. قلت ليه اااي بي لئمنة كدا .. تاني ما سالني اداني الحاجات ومشيت .. لقيت البت واقفة قالت لي ازيك انا ميسون انتي منو اول مرة اشوفك .. قلت ليها انا بت علي ابوي ساكن في البيت داك .. قالت لي بيت الظار .. قلت ليها لالا دا بيت ناس جدي .. قالت لي اي بيت الظار مسمينو مش ناس سعدية وشيخة الظار حريرة مرة حاج ابراهيم .. قلت ليها اي لشنو مسمينو كدا .. قالت لي عشان جنهم ظار الناس بجو بتعالجو عند حريرة دي شيخة ظار وطوالي بعملو الكرامات والحاجات دي .. ما شفتك. في الفات مالك ما جيتي .. قلت ليها لالا نحن يادوب جينا وما قاعدين عشان كدا .. مشيت منها وقبل ادخل فتحت كيس الصعود شلت منو حتة وختيتا في طرف الطرحة وربطها ودخلته تاني اديت الحاجات لي سعدية وجري دخلت الغرفة فتحت طرف الطرحة ولفيت الصعود زي ما عملت سعدية وجريت شفتي التحت وختيتو بالجمبة وقفلتها .. عيوني دمعو وشطة بس حرقني حار حار بس حسيت بي حاجة حلووووة كدا ريحتني ...

يتبع.....