بيت الزار

الجزء 34

بي كل بجاحة راجلا اب صلعة دا كمان رد علي قال لي يابت خلي عندك ادب انتي ما مؤدبة ولا شنو دي امك اتكلمي عديل معاها .. رديت عليه وانا بقيت ما واعية لاني اتزكرت كل الحصل لينا قلت ليه انت السبب الشتته اسرتنا اطلع بره الله ياخدك عايز مننا شنو بعد فرقت امي وابوي من بعض .. بقيت اصرخ واكورك مسكتني هستيريا ما عادية لما وقعت علي الارض مغمي علي .. شالوني جرو بي المستشفي ركبو لي درب وادوني حقنة مهدئة .. قالو دخلته في حالة صدمة عصبية .. عملو لي فحوصات كتيرة دخلته في صدمة تاني التحاليل ظهرت انو مادة سامة دخلت جسمي واتلفت كلية ولو ما ربنا ستر كانت الكلية التانية زاتا حا تتأثر وكنت حا اموت .. قلت للدكتور اني كنت باكل الظهرة بتاعت الهدوم بقي يقول لي يابتي انتي جادة لا حولا ولا قوة الا بالله انتي عايزة تنتحري لي ؟ قلت ليه يا دكتور ما عايزة انتحر وحكيت ليه قصة الفكي .. قال لي لازم نرفع فيهم قضية ونشتكي عليهم دا شروع في القتل لي نفس والله كاتب ليك عمر جديد.. عاينت لي خالي قلت ليه خالو عليك الله ما عايزة مشاكل ما عايزة اتزكرهم شوف ليك حل .. المهم اتكلم مع الدكتور وقال لينا بحترم قراركم ويوم تغيرو رايكم كلموني نبدا في الاجراءات ..بقو شغالين فيني دربات لاني لا باكل ولا بشرب بقيت كويسة بس عايشة بي كلية واحدة .. عدي كم شهر اتحسنته ورجعت تاني للمدرسة اتم قرايتي مرت سنتين حصلت 24 سنة وامتحنت سنة تالتة بي حالتي دي وجبت نسبة 59 والحمدلله اني جبتها كنت قايلة اني بسقط خالو طمني قال لي بقريك بالقروش ما تخافي.. امي اقول ليكم عليها انها رجعت مع راجلا سافرت ولا كأنو حصل شي او اني عيانة محتاجة ليها .. قعدت مع خالي هو الرباني وبقي مهتم بي انا بتو الما ولدها .. الساعة 12 بالليل قمته اشرب موية سمعته صوت رب حاجة عملت كدا علي غرفة خالو خفته قلته دا حرامي ولا شنو فتحته لمبات الهول وبقيت بنادي خالو خالو انت هنا .. الخدامة سمعت صوتي جات قلت ليها سمعت صوت شلته المزهرية وبقيت ماشة براحة وهي وراي شايلة ليها شطة في يدها وبنادي خالو خالو انت كويس .. وصلنا فتحت الباب لقينا خالو واقع في الارض واللابتوب واقع جمبو جيت جارية وبقيت برجف خالو خالو اتصلي بالاسعاف سريع .. قالت لي ما عارفاه قلت ليها شوفي النوته قمته جارية علي التلفون لقيت رقم الاسعاف اتصلت عليهم وصفته البيت وبي الخلعة رجعت تاني ختيت يدي علي مكان النبض يا خالو ما تموت ياخالو ما تموت وببكي وبرجف .. الاسعاف وصل وجريت معاها بي بجامة البيت وحفيانة ما عارفة روحي .. الساعة اربعة صباحا خالو اتوفي بي الزبحة الجاتو فجأة دي .. الله يسامحك يا خالو كم مرة بقول ليك بطل السجاير دي ما تشربا كتير.. كنت بكورك بي طول حسي ما عارفة انا وين لمتني ممرضة كتر خيرا هدتني ولبستني عباية وطرحة .. ساعدوني اولاد الحلال الصادفونا في المستشفي ما عرفته اصل لي زول من اهل امي ما بعرف عنهم شي .. واحد من الدكاترة وصفته ليه البيت رجعني شلته النوته بتاعت التلفونات بفتش فيها اتزكرت تلفون خالي مشيت جبتو لقيت رقم امي اتصلت عليها بقينا نبكي انا وهي المهم لقيت لي زول يكون جمبي في الصدمة الانا فيها دي .. لحدي نهاية اليوم كانو اهلو بدو يجو والبيت اتملا .. امي ما جات اعتزرت لي وقالت صعب تجي هسي الا بعد شهر .. بعد تم اسبوعين مشاكل الورثة بدت تظهر وكلهم حلا ليهم البيت .. لقيت مضايقات منهم وتحاريش من اولادهم .. بقيت بنوم وبقفل باب الغرفة .. مرة طلعته للبوتيك الجمبنا دا اشتري لي كريمات لقيت فيه واحدة شغالة المهم اتعارفنا قالت لي اسمها نسيبة وقلت ليها اسمي رهام بقينا نتونس ونتكلم قلت ليها بفتش لي في شغل .. قالت لي والله سيد البوتيك دا بفتش ليه لي واحدة تشتغل ليه في بوتيك فاتحو جديد .. قلت ليها عليك الله اتصلي عليه هسي اتصلت لي عليه والحمدلله بقي من نصيبي الشغل .. سنة كاملة وانا شغالة في البوتيك وبمشي وبجي في بيت خالو يوم رجعته من الشغل لقيت ناس واقفين كتار وبطلعو في العفش دخلته لقيتو اخو خالي من امو جا من امريكا قال لي بعنا البيت ويارهام يابتي اتكلمنا مع امك وحا ترسل ليك عشان تسوقك معاها والايام دي حا تقعدي مع خالتك لما جوازك وحاجاتك تجهز .. ما رديت ما خلاص اتعودت علي الصدمات دي شلت تلفوني او تلفون خالو مسكتو عندي واتصلت بي نسيبة قلت ليها جاية اقعد معاك كم يوم لما القي لي سكن .. هههههههه قعدت تضحك قالت لي يابت انا زاتي ساكنة براي طافشة من اهلي .. قلت ليها خلاص الاقيك وين قالت لي جاية البوتيك هسي افتحو انتظريني جمبو .. دخلته شلته هدومي لميتهم في شنطة وطلعته من البيت .. انتظرتها لما جات حكيت ليها الحصل معاي .. قالت لي يابت انتي مجنونة حد امو بره السودان وانتي عايزة تترزعي للهم دا .. قلت ليها انا ماماشة معاها بعد السنين دي كلها افتكرت انو ليها بت .. ما عندي اهل انا بتخليني اقعد معاك ولا امشي اشوف لي سكن براي قالت لي خلاص شنو بهظر معاك تساعديني زاتي في الايجار بالنص .. قلت ليها موافقة .. عدت الايام واتملطشنا في الدنيا دي انا ونسيبة روحنا طلعت .. معرفتنا كانت كتييرة اشتغلنا في كوافير اتعلمت ارسم بالصبغة ونسيبة بتشيل الجسم في البيوت ومرات انا زاتي بمشي برسم في البيوت وبرمي لي النسوان الودع بس ما كنت بحب الحكاية لانو التحرش كان بحصل كتير وفي رجال نسوان لحقوني عديل وطلبو يدي للعرس غير الامور التانية.. خلينا الشغلة دي تاني لان الكوفيرات شغلها كعب وما بحترموك والفاظ كعبة بتتعلمي غصبا عنك .. اشتغلته تاني في استوديو بتاع تصوير كنت ماسكة الحسابات بس كمان خليتو سيد المحل بقي بضايقني .. واشتغلته في مكتبه كنت بطبع في الكمبيوتر وبرضو خليتا بسبب التحرش دا .. انا ما عارفة لي الناس معزباني فيها شنو لما البس ضيق واعمل مكياج حرية شخصية .. مع اني ما كنت راضية عن نفسي في الحاجة دي بس اعمل شنو الناس عايزة كدا تلبسي وتعملي الحركات دي يجو جاريين تحت كرعيك .. باكل في اللبانة وبرسم حواجبي وبتحنن وبرسم لي روحي ومرات بتدخن ولما اتونس مع زول نوع البرفع حاجب وانزل حاجب وبضحك بي صوت عالي وما بختشي من شي عادي بطلب من البعرفهم قروش وهدوم وتلفونات .. مش هم عايزين يتونسو ويضحكو يبقي الونسة ما بالمجان .. عرفته بالنت ضابط في الجمارك علاقتي بقت قوية معاه متزوج وبي اولادو كبار بقول لي والله يارهام كان ما ساي كنت حا اعرسك .. ما عايزة احبط نفسي واسألو من كلمة ما ساي دي شنو ؟ لانو عارفة الاجابة بتكون جارحة شديد .. اني ما عندي اهل وفاكة علي حل شعري ساي زي ما بقولو السودانين .. كتر خيرو برضو هو اللقي لينا شغل في وكالة سفر انا ونسيبة وهسي ثبتنا فيها والحمدلله حالنا بدا يتعدل من البهدلة .. جيتكم للبداية ودي قصتي بس لسه مع حكاية الشيوخ عشان اعرس ..كتار ما بريحوك من الاسئلة هي بعد السماحة دي مالك ما عرستي لي هسي ياهو الا كاتبنك امشي لي شيخ فلان وعلان قالو بعالج والله قبل تتمي شهر تعرسي ولسه قاعدة اها ما عرسته.. مشينا لي كم شيخ لاني بحلم بي احلام وكوبيس مزعجة لي درجة بكون دايرة اموت ما بقدر اتنفس ولوني دا ببقي اسوود فحم بس .. تابعت علاج مع شيخ طلع لي كفن اي كفن عديل قال لي ملوثنك انتي لا تعرسي لا تلدي لا تعرفي روحك بس تكوني لافة كدا .. وانا عرفته العمل لي كدا منو أكيد ناس حريرة وسعدية واعمامي .. عارفة اني حا ابقي كدا بس كمان املي في الله كبير انو مهما يحصل في الدنيا دي الله بياخد لي حقي .. طلعته بي أجمل صحبة عوضتني عن كل حاجة كعبة .. اختي وحبيبتي نسيبة الله ما يحرمنا من بعض بنفرق علي روحنا وبنطلع المنتزهات وبنمشي المولات ومدلعين روحنا .. بقيت بصلي وبقرا قرآن والحمدلله .. وعايشة حياتي مبسوطة كدا ماف زول بتحكم فيني .. صاح فاقدة لمة الاسرة .. لكن بكرا لما اعرس ان شاءالله بجيب اولاد كتار واعمل احلا اسرة وبيت .. اتحكرنا انا ونسيبة في نص الغرفة وجبنا ليك الهيتر شغلناه ختينا فيه التنكة للجبنة ما عندنا منقد هههه زي بتاع ناس حريرة .. جبنا المبخر بتاع الكهربا وبخور راقي كدا .. وولعنا سجاراتنا .. ضحكته لي نسيبة قلت ليها اقيفي ما بتفوت علي قمته فتحت الدولاب طلعت كيس هزيتو لي نسيبة بي يدي .. قالت لي قولي والله .. شلت مليت يدي وكشحتو في المبخر قلت ليها دستوووور كبو البخور وقعدنا نضحك ...

#

.

قد نلتقي

مع كل الود ❤

🎀 فاطمة قسم الله .. Daisy 🎀

ما تنسو التصويت + تعليقكم ع الرواية الكاتبه ح تتابع كل التعليقات @Novelsfatmagasmalla