بيت الزار

الجزء 17

انتهينا وتمينا كل شي وبخرنا البيوت واتنضفنا ولبسنا وسرحنا وبقينا جاهزين منتظرنهم .. بعد شوية نسمع ليك الزغاريد والدلوكة والغنا ايوي يووي يووووي وصوت البوري بيب بيب بيب جرينا نحن والبنات وترتيل جات جارية معانا تشوف .. اسمع ليك سعدية ادتا نهرة حاااارة تعالي هنا عايزة تبقي خفيفة ولفيفة يقولو طلعت وهي عروس ادخلي لي جوه يدخل فيك لوري.... 😂😂😂😂 انا وبنات اعمامي قعدنا نضحك عليها زعلت ومشت جوه تبكي .. حريرة قالت ليها امشي بيتي هناك وجهزي باقي حاجات الزار عبيهم في الصحانة القنقليز والنبق والبلح بتلقيهن في راس الدولاب في طبق.. اها رفعنا طرحنا وجرينا علي الباب طلعنا بره .. وقفت الحافلة ونزلو الرجال دخلو الديوان وجو زي ستة نسوان كل واحدة شايلة ليها طبق في يدها ومعاهم ولدين بنات عمي اشوفهم ليك يغتغتو في وشوشهم ويتخجلن ويقرصن في بعض ويعاينو للولدين 😕 .. الاولاد جو شايلين الشنطة دخلوها وطلعو .. دخلنا النسوان جوه وقدمنا ليهم الموية والبلح المرشوش عليه جوزة الهند وحلاوة .. جونا اعمامي قالو نجهز الغداء .. طلعنا ليهم صنيتين سفرة كبار ماشاءالله ما خلو شي ما ختوه السلطة الخدرا وملاح الويكة والكسرة ..وسلطة الاسود .. والشبس .. واللحمة .. ودمعة .. والمكرونة بالجبنة .. والجداد المهم ماشاءالله للتحلية عملو الكستر بي الجلي واللقيمات والبربور .. ما خلو حاجة انسترو معاهم .. غدوهم والصواني جات فااااضية .. ودينا الشاي والعصير والتحلية .. جا عمو ابراهيم قال لي سعدية وحريرة قالو يعقدو .. قالو ليه يعقدو طوالي دا تعب وخسارة عقد العملنا دا .. خلي تاج السر يوافق .. قاليهم قلتو كدي .. قالو ليه اي .. قال ليهم سمح .. طلع الديوان وزي ربع ساعة كدا سمعنا صوت النار طاخ طاخ النسوان قعدو يزغردو ايووووي يوووووي يوووووي هي مبروك ليها عقبال اخواتا وبقيو يسالمو ويباركو .. تاني ما قعدو كتير طلعو طوالي والزغاريد والغنا لما طلعو الحافلة اتحركت بيهم يصفقو وتيت تيت تيت .. اعمامي الكبار جو داخلين قالو لينا انهم حددو العرس بعد اسبوعين من هسي واعتزرو لانو المفروض يكون من قبل الاسبوع الفات زي ما كانو متفقين معانا بس عندهم ولدهم كدا كان في الجنوب انتظروه لما رجع بالسلامة .. اها قمنا جرينا نشوف حاجات الشنطة الجابوها مسافة يادوب طلعنا فرشنا السراير بره وختينا تربيزة كبيرة في النص جبنا الشنطة فتحناها وتاني تربيزة ختينا طبق الكريمات وطبق الريحة اتنين .. نسوان الحلة جو داخلين يزغردو ويباركو .. جاتني حريرة بالجمبة قالت لي يارهام امشي جهزي ترتيل واعملي ليها الشيتن البتعمليه في وشك دا سمحيها كدي .. قلت ليها حاضر سقت البنات ودخلنا عليها .. سقناها ليك دفرناها جوه الحمام خليناها استحمت وجينا شغالين فيها مسيح وتمير 😂😂😂 جبنا المكياجات مكيجتها مكياج حا يشهقو بيه ورفعت ليها شعرها فوق شكل كعكة وكان عندي فيونكة شكل وردة ربطها ليها في الكعكة ونزلت ليها خصل موجتهم ليها بالمكوة .. البنات لبسوها التوب الاحمر والشبشب العالي بقت رهييييبة عسل بس صورتها بالتلفون .. وطبعا من شافو مكياجي لي ترتيل حلو صاحبوني كلهن وعملت ليهم مكياجات خفيفة ايلاينر وشوية بدرة ومثبت .. اتلبسنا وبقينا منتظرين يطلعوها .. جات سعدية لما اتخلعت بقت تقول عين الحسود فيها عود جيبن البخور يابنات جبناها بخرتا وطلعناها الزغاريد دي قامت ايووووي يوووي يوووي والبخور دا ريحتو تصل اخر الحلة ماشاءالله ما شاءالله النسوان يتلاكزن ويعاين ليها ويقولنا اريتا لو كانت لي ولدي سمحة سماح ..السرة بتاعت امور مسكت ليك الدلوكة وقعدت تدق وتزغرد ونحن نشيل وراها ... كان اليوم حلو رقصنا وغنينا والنسوان ديل ملو البيت للشمار يشوفو الشنطة والشيلة ويسألو من المال وجابو شنو والعرس بتين .. الساعة ١١ جات كنا منتهيين للاخر وتعبانين من الخدمة طول النهار وكمان بكرا تاني جايانا شغلة جديدة زار رهام 😭..

يتبع....