بيت الزار

الجزء 10

عجبتني ليك الحكاية شديد ولقيت نفسي متكيفة .. بقيت بس اشوف سعدية طلعت وجري ادخل البرندة افتح العلبة اشيل منها واطلع .. مزاجي بتعدل للآخر بقيت بتونس وبضحك معاهم واشتغل اي شي ما بقول حاجة لما هم استغربو .. الايام مشت اظن عشرين يوم وانا علي الحال دي ما بكتفي بي مرة واحدة تلاتة واربعة مرات في اليوم بشيل .. اها مرة بعد خليتا طلعت جيت داخلة وراها بس ما لقيت العلبة قلبت الواطا عليها فتشت الدواليب وتحت السراير والمطبخ والغرف ما خليت محل.. ما لقيتا .. بديت احس بي صداع واطرافي منملات .. مشيت عملت لي قهوة تقيييلة شربتها ورقدته بس مافي فايدة .. جسمي بقي يقرص فيني وعندي قلق ما عادي من الصباح ما ختيت منو .. مشيت فتشته سعدية بقيت متابعاها بس ما عرفت وين خاتاها .. غلبني اتحمل طلعته مشيت علي الديوان لقيت اخواني التؤم بره سالتهم من ابوي قالو مشي مع اخواني في وفاة .. قلت ليهم عايزة قروش قالو ما عندهم .. قلت ليهم المقعدكم هنا شنو كل واحد عاين للتاني وما ردو لي .. جيت داخلة منهم مشيت استحميت وجيت رقدته النهار دخل وراسي عايز يتكسر وبقيت برجف واطرافي منملات وراسي لافي .. نمته وما وعيت بي نفسي اظني بقيت اهلوس ووقت هلوسته هلوسته بالظار والودع قلته كلام خارم بارم والحمي دي شالت وختت فيني بقيت شايفة روحي فوووق واني واقعة يدي ورجولي ما قادرة ارفعهم بس نازلة نازلة والحاجات لافة .. ومرة اضحك ومرة ابكي واتكلم براي بكلام ما مفهوم نهائي .. واحدة من بنات عمي شافتني قعدت تكورك وجري جابت نسوان اعمامي اتصلو بي ابوي جا مخلوع جاري لقاني بالحال دي حمي وبرجف وبتكلم بره راسي .. شالني جابني المركز الصحي بتاعهم فحصني وقال ما عندي شي .. ما عندهم دكتور ولا مستشفي بس مساعد طبي الجامعة ما قاريها .. جابوني البيت بقو يعملو لي في مكمدات .. ادوني عصير بستفرغو .. اكل بستفرغو .. بقيت ببكي وبصرخ ماسكة راسي الواجعني .. ابوي رجع لي المساعد الطبي قال ليه الحمي والصداع زايدات وجابو معاه .. اداني حقنة فوتركس للحمي والصداع .. وكتب لي حقن قال ليه بتكون ملاريا بس ما ظهرت .. مرت تلاتة ايام باخد في الحقن صباح ومساء ومافي تحسن .. وهلاويس شغالة فيني بقعد اكورك دستور دستور ست الظار زحوها مني .. الاسياد ما تشيلوني عليكم الله خلوني .. انا عايزة ماما .. ابوي قلق قال لي عمي انا ما بصبر لما بتي تموت شوف لي عربية موديها الخرطوم .. مرة عمي جات ناطه قالت ليه يا علي بتك دي عندها عين اسألني انا ترتيل دي حصل ليها قبل كدا نفس الشي ودينا لي شيخ وهدي اتعالجت الجاها شنو .. ابوي قال ليها شيخ شنو البودي ليه بتي كمان انتي بتقولي شنو .. اعمامي تاج السر وابراهيم قالو ليه آ زول مافي شيتن بجيها دا كلام شيوخ يديها كم بخرة وبتقوم شديد .. دكاترة شنو وكلام فاضي خلي النسوان يسوقنها وبجيبوها شديدة .. لبسوني توب وساقتني سعدية وحريرة ونادو السرة قالو الشيخ اخوها بدخلنا سريع .. ركبنا العربية ومشينا لي نهاية القرية دخلوني قطية الشيخ ... لقينا كمية خلق قاعدين بره في الارض واحدين راقدين وواحدين قاعدين .. لما جيت ادخل قالو لي ادخلي حفيانة دخلته .. جرو سلمو علي الشيخ في يدو قالو ليه بركاتك ابوي الشيخ بركاتك .. سعدية جرتني سلمي في يدو سلمته في يدو وعملته زي ما عملو اتبركو من تحت رجلو .. دا كلو وما كنت واعية بي نفسي ومندهشة في البعملوه وعجبتني الحكاية الصراحة ما عارفة لي.. حاجة جديدة علي اول مرة اشوفا ..

قال ليها ازيك يا حريرة طولتي من الكرامات مالك ... قالت ليه معليش يابا الشيخ الاسياد طالبين كتير المرة دي ومحددين البنيه .. منتظرين الاذن ابونا الشيخ .. الشيخ شال بخور من جمبو ورماه في النار قام دخان كتير بقيت بكح بكح وقلت ليهم دا شنو انا اتخنقته .. سعدية ضربتني في يدي اسكتي قالت لي .. قال ليها يا حريرة العلاج عندك القالوه الاسياد اعماليه بكرا قبال يلعنوك .. حريرة قعدت تتهبش وشفتها خايفة .. حاضر يابا الشيخ وقامت ختت ليه قروش تحت المخدة القاعد فيها .. اداني حاجات كدا قالو بخرات بختوهم في النار يبخروني بيهم ومعاهم شي في باقة قالو محاية استحمي بيها .. جينا البيت لقينا ابوي منتظرنا في الشارع اها في شنو .. قالت ليه عين وبوريك الباقي بعدين .. هسي النعمل ليها البخرات .. نادت عمي تاج السر وابراهيم دخلت بيهم جوه .. وانا ساقتني حريرة لي بيتا ...

يتبع....