بيت الزار

الجزء 13

وصلنا الخرطوم .. حجزنا عند دكتور معروف بعرفو بابا من زمان قالو الا الساعة ٨ .. مشينا نزلنا في فندق .. قلت لي ابوي انا مشتاقة لي ماما عليك الله وديني ليها .. اول ما وافق لي بس لما اخواني وقفو في صفي قال لينا خلاص امشو .. وانا بجي اسوقكم بعدين ان شاءالله .. فرحنا شديد .. واخوي طلع أجر لينا تاكسي وودانا كان بيتهم في المهندسين .. دقينا الباب فتحت لينا بت شكلها الشغالة .. قالت لينا عايزين منو .. ما انتظرتها دفرتها ودخلت طوالي خليناها تكورك انتو هي ماشين وين .. دخلنا لقيناهم قدامنا في هول كبير كدا .. ماما من شافتنا جات جارية علينا حضنتني شديد ياالله من حضن الام االبحسسك بالامان قعدنا نبكي لما اخواني قالو ليها ونحن نسيتينا .. قشت دموعا وحضنتهم واحد واحد .. قالت لينا تعالو سلمو لقينا معاهم ناس معرفة شكلهم ولقينا خالو .. سلمنا وقعدنا ما فاهمين شي .. قالت لينا بتكونو جيعانين .. كورت للبت تعمل لينا اكل .. قلنا ليها لالا اكلنا جينا مع بابا ومشي الفندق .. قالت ليها جيبي ليهم عصير وموية .. ساقتنا قالت لينا تعالو جوه استأذنت من الناس ودخلنا معاها غرفتها كانت كبيرة وباااااردة ومرتبة زكرتني بي ايام كنا في السعودية ودبي ومرتاحين وكل حد بي غرفتو .. ماما كانت فرحانة قايلة ابوي ندم علي كلامو ورجعنا ليها .. قالت لينا اها هسي برتب ليكم غرفكم الطابق التاني فاضي منتظركم بس نسكن فيه .. عاينا لي بعض في وقت واحد وسكتنا .. قالت لينا مالكم يااولاد في شنو .. اخواني التؤم قالو ليها رهام عيانة حجزو ليها عند الدكتور عشان كدا جينا .. ماما اتخلعت وقالت سجمي رهام مالك وبقت تهبش فيني فيك شنو عملو فيك شنو .. قلت ليها ماما انا كويسة بس تعبته شوية كدا ..قعدت تبكي وتتحسبن علي ابوي واعمامي قالت لينا مالكم بقيتو ضعاف وزرق ومبشتنين كدا تاني مافي رجوع ليكم بعد جيتو .. سكتنا ما قلنا ليها شي .. اخوي الكبير قال ليها نحن ما راجعين معاه تاني .. جات البت الشغالة قالت لي ماما خالو بناديها الضيوف ماشيين .. طلعت مننا وفاتت .. اخواني التؤم النوع الشليق اي شي عايزين يشوفوه طلعو وراها علي طول .. بقينا منتظرين بعد شوية جو قالبين لينا وشهم زعلانين اخوي قال ليهم مالكم .. قالو لينا ماما حا تعرس عمو الضيف .. اخوي قام علي حيلو ونحن معاه قاليهم شنو جبتو الكلام دا من وين .. قالو ليه سمعناهم هسي بتفقو مع خالو ومنتظرين ماما تطلع من بيت الحبس زي ما قالو .. رهام رهام هو ماما محبوسة كيف يعني.. بدل ابكي قعدته اضحك ولقيت روحي زاتي ما عارفة ارد عليهم لاني ما عارفة زيهم .. اخواني التلاتة الكبار حسيتهم زعلانين وزحو مننا وبقو يتهامسو مع بعض .. طبعا ما فهمت شي .. ماما شوية وجات شايلة العصير والكيك في صينيه ختتهم ..قامو اخواني الكبار قالو ليها الكلام .. هي سكتت وقالت ليهم ابوكم طلقني وطردني ودا ودعمتي ما غريب يعني ودكتور معروف ومسافر بره يستقر هناك دا كلو ليكم عشان اقدر اسوقكم ونرجع تاني زي ما كنا .. اخوي الكبير زعل وجاط قال لي ماما ما بتعرسيه بعد العمر دا واولادك بقو في وش زواج نعرس نحن ولا انتي .. ياترجعي لي ابونا ولا اعتبري انك ما عندك اولاد .. انا شهقته الساعة ديك من رد فعلهم ما اتوقعتو بالقسوة دي .. ماما قعدت في السرير وختت يدها في خدها وقعدت تبكي .. اخوي قال ليها وبعدين هو البخليك انتي تطلعي ليه شنو الكلام دا ياامي حرام شفتي نفسك زحيتينا من دينا كيف معاك .. عاينت ليه كدا قلت ليه شنو هو الحرام .. قال لي كونو امك تطلع علي راجل غريب ومحرم عليها وكمان تتفق علي زواجها منو وهي لسه مطلقة شهر ما تمتو .. ما فهمت شي منو بقيت بعاين ليه 😮😮😮 قال لي ماما علمي بتك الدين يا حاجة اول وتاني عرسي نحن ماشيين يا رهام راجعين الفندق والمساء بنجي نسوقك .. اخواني طلعو كلهم وخلونا وامي بقت تبكي وقطعت لي قلبي معاها .. قلت ليها يا ماما قولي لي شنو هو بيت الحبس ولي ما بتقدري تعرسي هسي .. قالت لي المرا لما يطلقوها بتقعد في البيت تلاتة شهور الدين بقول كدا.. قلت ليها ولشنو ما عايزة تعرسي ما عايزة ترجعي لي بابا .. قالت لي انا وابوك البينا انتهي وهو قرر حياتو وعايز يسكن مع اهلو وانا ما بقدر اعيش معاه في قرية .. قلت ليها يا ماما طيب هسي نحن قعدنا معاه تعالي معانا وتاني بنقنعو نمشي .. قالت لي لا ابوك ما احترمني قدام اهلو وهم ما احترموني وانتي مشية ليك تاني ماف عايني جيتي مبهدلة ومسودة كيف وضعفتي شديد .. ودا شنو الملبسنك ليه دا .. قلت ليها يا ماما خليك من لبسي انا عايزة نرجع زي زمان مبسوطين عليك الله ارجعي معانا انا محتاجة ليك شديد .. قالت لي يارهام انتي لسه صغيرة وما فاهمة الحياة كيف لما يجي ابوك قولي ليه انك ما راجعة معاه .. سكته مسافة وقلت ليها ما بقدر يا ماما هسي اقعد معاك لكن وعد خليني معاهم وتاني برجع .. قالت لي رهام في شنو لي ما بتقدري هسي .. قلت ليها وعدت بابا اني برجع معاه خليني بس اقنعو بالهداوة وبرجع اعيش معاك ..

قلت ليها عايزة انوم تعبانة .. طلعت خلتني وما قالت شي .. رقدت في السرير وما عارفة اول مرة احس انو ماما ما همها فينا كتير عايزة القروش والراحة .. حتي الدين ما عرفت تعلمنا ليه قومتني في عالم كلو فاضي لبس ومكياجات واستايل واغاني ورياضة ونادي وبرستيج .. انتبهته لي روحي اني ما عارفة شي عن ديني ولا حصل صليت او قريت قرآن غير الجزو البسيط الحفظتو لما كنت في السعودية .. دخلوني مدرسة اجنبية امكن كل اصدقائي ما مسلمين عرفته الدين المسيحي اكتر من ديني .. اتزكرته اخر وشم عملتو مع صاحبتي أنجل تحت ضهري كان صليب بدون اكلم ماما وبابا .. كنت بعمل البتعملو بنمشي حفلات ديسكو وايمو وعبدة الشيطان وكل شي .. كنت برجع البيت قريب الصبح في دبي وماف حد بفكر لي .. حسيت اني تايهة شديد وضايعة .. ما عرفته اعمل شنو .. شفته لابتوب ماما في التربيزة فتحتو دخلته فيس بوك لقيت كمية من الرسايل من اصدقائي ومن أنجل فرحته كتيييير ورسلت ليها بدون اشوف كلاما او كلام الباقيين .. ردت علي علي طول واتصلت بي فيديو بقينا نصرخ ونتكلم زي لينا سنين سألتني وين مشيت وليه شكلي متغير حكيت ليها كل الحصل لي اخر شي وانا هسي مع ماما قعدت تكورك وتقول لي واااااو واااااو This is exciting .. قلت ليها انجل انا مليت عايزة ارجع دبي .. قالت لي يو ار كريزي ؟.. Keep and picture everything first .. صراحة اتحمسته لي فكرتها وقلت صحي انا استغل الموضوع عشان لما ارجع ليهم اوريهم الحصل معاي بالتفصيل وبالصور بقيت عاملة كدا 😀😀😁 قلت ليها خلاص اتفقنا لما نتلاقي .. جريت طلعته جيت لي ماما قلت ليها عايزة موبايل اقدر اتواصل بيه معاك بابا قلع تلفوني .. ولا سألتني ادتني تلفونا بي شريحتو وقالت لي مسجل فيه رقم خالك اتواصلي معاي بيه وبجيب واحد وبديك الرقم الجديد ودسيه ماف حد يشوفو يقلعوه منك .. وقعت في حضنها وقلت ليها انتي احلا ماما ربنا يخليك لي .. ودخلته ارقد وانا في راسي فكرة تانية ونسيت كل شي ورجعت رهام زمان ...

يتبع....