بيت الزار

الجزء 26

وتاني صوت الدق في الدلوكة والكشكوش براحة براحة دق دق كش كش طق طق وبدا يذيد وحريرة تاني بدت بي غنية جديدة

بابور مسافر ملان عساكر ياباشا

ياباشا بيه ودستوووور لي اسياد العساكر ارمو البخور

رمو البخور وطق طق بقي يطقطق .. والغنا زاد والدق بقي شديد وواحدة تاني بدت تتهبش وتكورك وكانت لابسة زي العساكر قالو خيتا جا بقت تدق بي رجلا وتخت يدها علي جمبة راسا زي بتعمل في تحية وبقت تكورك وتصرخ وتتهبش مع صوت الغنا واالموسيقي لما وقعت علي الارض مغمي عليها .. جات حريرة بخرتا وبقت تتكلم معاها .. المرا بقت تتكلم بي صوت ما بتاعا وقالت طلبات الاسياد العايزنها .. قامت كويسة .. وتاني النسوان بقن يلفن حوالي وصوت الدق دق كش كش براحة براحة

وبذيد شوية شوية

العريبي الفوق

يا الهدندوي

يا شراب الروب يا الهدندوي

راكب الهجين ياالهدندوي

سوطك الوروير ياالهدندوي

ووووب وااااي واحدات من النسوان خيتن جا بقن يصرخن ويكوركن ويرطنن بي كلام ما معرف ويتهزن وينطنن لما وقعن برضو علي الارض .. بخرتن حريرة وشافت طلبات الاسياد وزي ما حصل مع القبلهن قامن يضحكن زي ما حصل ليهن شي هسي ..

جابو الفندق وختو البن والهبهان والزنجبيل ودق دق دق بقو يدقو وولعو البخور اسيااااد يا اولاد ماما ولعو البخور ويغنو للجبنة مع صوت دق دق .. دوية دوية جبنة دويا الحبشي طالب الجبنة

وصوت الدق بدي يذيد حسيت بي روحي زي المرة الفاتت ما براي في حاجة بتدخلني وما بقدر اتحكم في نفسي وبنسي كل شي كأني بتنوم مغنطيسي لي مدة ..

كش كش وزيدو البخور ..حريرة بقت تعلي في صوتا وتعاين لي والنسوان بقن يصرخن ويرددن وراها .. ختو الجاولي واللبان الليلة يومك يا لولية

لولية جات من الحبشة لولية تشرب الأنشة

والحصل لي المرة الفاتت جاني تاني وبقيت ما انا جسمي تقل برضو واتكهرب وبديت اتفاعل مع الغنا والصوت العالي وارقص بي طريقة غريبة

اللول اللول يالولية بسحروك يالسمحة ياالحبشية

جيبو الجبنة الحبشية .. ادوني ليها شربتها .. جابو الصندلية والصندل والبخور الحلو بخروني بيهم ولبسوني القرمصيص الاحمر .. المحيرني إني بقيت ارقص حبشي كيف وانا ما بعرف ..

.. راسي بقي لافي وطريقة كلامي اتغيرت .. حريرة بقت تقول دقو ليها الزار لولية جات دستووور ارمو البخور .. البخور بقي كتير وريحة الخمرة زادت والدلوكة والدق بقي سريع والصوت عالي عالي ما قدرت اخت يدي في اضاني .. بقيت بتهز وبصرخ وحاجة لبشتني .. ووقعت في الواطا ما حسيت بي شي الا بي كلام حريرة بعيد وانا برد عليها بي لغة ما مفهومة وهي شايلة المبخر تبخر فيني وترش فيني بي حاجة ما معروفة هي شنو .. خمسة دقايق وقمته شديدة وحسيت بي فرحة ما عادية كأني اتولدته من جديد .. بطلت افكر في الحصل لي وشلت البخور انا كمان ورميتو في المبخر وقلت دستووور يا اسياد ارمو البخور ..

يتبع...