بيت الزار

الجزء 16

بحكي ليكم بعدين الحصل شنو لما مشينا جبنا الطين للسرة😂😂😂

اجيكم لي تجهيزات الزار .. اها رجعنا البيت وقمنا ليك نضافة كيف وبكرا الزار لازم .. في برندة حريرة حا يكون دخلنا ليك فيها وزعيف ونضافة .. طلعنا السراير وفرشنا البروش والسجاد لونهم أحمر .. حريرة جات شايلة حاجة كدا ما عرفتها قلت ليها دي شنو .. قالت لي تعالي لفتا لي في وسطي وقالت لي هزي يمين وشمال بقت تعمل صوت زي كشك كشك .. قالت لي دي بسموها المنقورة بنصنعا من قرون الغنم واضافرينا .. قربت استفرغ سريع سريع فكيتا واديتا ليها بطرف اصابعي .. طلعنا الدلاليك والدفوف والكشاكيش والمباخر ختيناهم وعلقنا التمايم والخيوط .. سألت حريرة ديل شنو الكتار ديل قالت لي ديل حجبات واحد للراس وواحد بتلبسيهم في المفاصل .. وجهزنا البخور قالت لي بنسميه الدق السوداني عود وفاسوخ وعشب أسود .. وجهزنا البخور الجاولي وبخور التيمان والبخور الحلو ورتني ليهم كلهم حريرة .. قفلنا البيت وجينا عليهم تحت الشجرة لقينا السرة ترمي ليهم في الودع .. قعدته معاهم .. وحريرة وسعدية قامو طلعو علي الديوان .. مشو لي ابوي وقالت ليه انا بشيل الليلة علقة من هدوم رهام وانوم بيها وبشوف طلبات الاسياد شنو ومن بااكر الصباح تجيبو الحاجات البقولو ليكم عليها .. ابوي قال لي عمي اعملو البتعملوه وطلع فات .. سعدية قالت اجش يابنات امي احركي يا حريرة علي النسوان نحدثهم .. طلعو علي العندهم دستور كلهم ووروهم بكرا الضهر عندنا ظار رهام بت علي تعالو وجهزو حالكم .. جو راجعين لقوني ميتة بالضحك مع السرة واتمطق في الطين ونشرب في الجبنة وشغالة ارمي ليها في الودع كمان .. ووووب علي شكيتك علي الله ياالسرة بتين قلبتي البنية كدي .. قومي امشي جيبي لي قطعة من هدومك دايراها .. قلت ليها لشنو .. قالت لي اشوف الاسياد دايرين شنو .. ما فهمت شي منها بس قمته مشيت جبتها ليها وجيت .. حررته الجبنة وولعنا الجاولي والعدني واتحكرتنا لي السرة ترمي لينا الودع.. قامت جرت طرف توبا كانت رابطه فيه الودع فكتو وطلعت سبعة ودعات واتكت علي يدا في العنقريب(السرير) القصيير المعمول من الحبل وقالت لي اطرحي لي رملة قدامي .. جريت جبتها من بره وجيت كبيتا قداما وبي السفنجة طب طب طب طرحتها كويس 😀 بقيت خبرة في الحاجات دي .. شالت الودع في يدها وكش كش كشكشتو وكش كشحتو في الواطا.. بقت تعاين وعاينت لي سعدية قالت ليها الصُفاح جاكم شوف عيني هدا .. سعدية بقت تقبض وتفتح في يدا .. السرة قالت ليها ارمي ارحكي بطلي الجبر خلي الودع يصدق .. شالت طرف توبا وطلعت قروش ختتهم ليها ..

وكش رمت الودع تاني قالت ليهم الوحيد منو المسافر عندكم .. حريرة بري مِني الوحيد الا ود التاية إياهو واحد .. اجي ياسعدية هي داسة مننا ولا شنو مسفراه وين .. سعدية قالت ليها بري ما سمعت جابت سيرة .. ارمي ارمي <br>

وكش كش كش رمتو .. ودالصرة عايز البنية والبنية ما دايراه .. اجي الزمن دا البنات العرس بقن ميابياتنو .. سعدية عاينت لي وقالت ما عندنا بنات بيابن العرس .. بعد شوية. عمي تاج السر جا داخل بكورك لي سعدية قال ليها قومن جهزن الاكل والشاي ناس أمحمد جاين يحددو العرس بتاع ترتيل هسع اتصلو .. وووب يابنات قومن سريع امشو نضفن الديوان ورشرشنو واجري يا رهام هاك المفتاح جيبي الملايات فرشنو .. قوماكن ونادي النسوان يجن يساعدننا والعندهن يجيبنو ..

قمنا سريع وعملنا القالوه وانا بنضف في الديون عثمان حلف ما يقوم وبقي بعاين لي كنسته ونضفته وفرشت الملايات وقت جيت ارش شايلة الجردل والكوز وكش عملته روحي ما شايفاه كبيت فيه الموية وعايزة اضحك بقيت ماسكة الضحكة قلت ليه بي دلع كدا سوري ما شفتك .. حمر لي عيونو وقام طلع .. قلت ليه كان ما كرهتك فيني ما ابقي رهام .. وبقيت اغني

ﺳﺖ ﺍﻟﻮﺩﻉ

ﺍﺭﻣﻲ ﺍﻟﻮﺩﻉ

ﻭﻟﻲ ﻭﺷﻮﺷﻲ

ﺷﻮفيهو ﻟﻲ ﻛﺎﻥ فيهو ﺷﻲ

ﻗﻮليهو ﻟﻲ ﻣﺎ ﺗﺨﺘﺸﻲ

وكش وكش كش

وبقيت برقص واضحك زي الما نصيحة ...

يتبع.....