بيت الزار

الجزء 21

اها قعدنا في البروش الفرشناها وريحة الدخان بقت مالية الحلة أظن والشاي واللقيمات .. نسوان الحلة شمشارات طبعا في واحدات غلبن جننا بي جاي طوالي قعدن للونسة والقطيعة وحريرة وسعدية يعجبوك .. وبعد شوية تمت لما جات السرة ست الودع .. من قبل تدخل سمح كوركت من الباب اجي اجي اجش عجبتني القعدة قبال ادخل عليكن كان جابتني ريحة الدخان وقلي البن واصل نهاية الحلة .. حريرة قالت لي هاك يا رهام قومي دقي البن وجيبي الجنزبيل والحبهان من جوه دقيهم معاه .. مشيت جبتهم وختيتهم في الفندق وبقيت دق دق دق ادق وانا محكرة في البمبر فوق .. السرة اقيفي اجري يا بت جيبي الدلوكة خلونا ننطرب اجي يابنات امي العروس وما ندق ليها وحات الله الليلة اعزك عزة قومي يابت جيبي الدلوكة وحرريها لي في النار تشد .. جبنا الدلوكة وسخناها ودق دق اطق اطق طق

وانتي يا حريرة والسرة وسعدية بقن يغنن و السرة بالدلوكة تدق

يمة انا زولى ماجا يمه انا زولي ما جا

شيلن يابنات ورانا

لقيت الطرب حبى ماجا

وشفت العجب

ونحن نقول بي وراهم حبي ما جا

مالو ماجاء والجعلي اب شنب

مالو ما جا

ايووووي يووووي يووووي

ويا يمه انا زولي ما جا يمه انا حقي ما جا

وايوووووي يووووي

وقرقرقر السرة قعدت تضحك وظهرو سنونا المكسرات وعندها سن دهب بالجمبة .. قالت لينا شكيتكن لي الله

وانا دق دق دق ادق في البن وشلته بخور الجاولي كبيتو في النار وختيت الجبنة تغلي وكبيت فيها البن والهبهان والجنزبيل .. ختيت فناجين الفخار وشلته المبخر الصغير ختيت فيه جمرتين وختيتو في الصينية مع الفناجين وبقيت منتظره الجبنة تغلي ...

ام الحسن قالت لي السرة النبي النبي غني لي قمر السبوع

سعدية قرقرقر اجي يا ام الحسن بعد عمرك دا

قالت ليها بري مالي ياختي اغني طوالي ليه

ارح دقي دقي

ودق ادق وطق طق الصفقة الصفقة يابنوت .. اطق طق طق

قمر السبوع الداير الليلة عبا وساير

غني وشكري يابنية

فوق المية خته المية

الليلة عبا وساير

جهزته القهوة وختيتا في الصينية وشلته الجاولي والعدني واللبان وختيتا ليهم وولعت البخور وعملته المستكه في الفناجين بخرتهم وكبيتا ليهم ..

السرة قالت لي عاد يارهام ماشاءالله جبنة السرور لكن عقبال نشرب قهوة عرسك .. عجبتني ليك ضحكته قلت ليها تشربيها بالعافية النكب ليك تاني تنيها .. شكرو لي قهوتي كييف بقيت ماشاءالله لكن فيها بي بخورا بعملا وبي مستكتا .. دخنو ترتيل ومسحوها بي الودك وغتوها بالتوب ودخلوها جوه.. الساعة 11 جات قامت كل مرا مشت لي بيتا ولقطنا الحاجات وطفينا النار وغسلت العدة مع البنات .. طلعنا السراير في الحوش ورقدنا في ضو القمرا كانت كبيييرة .. حريرة بقت تغني لينا القمرا يا القمرا شيلي السنسنة الحمرا شوفي عثمان جا ولا ما جا ... اتغظت منها لاني عرفته قصدها شنو ومن جواي قلت ليها ماااا بعرسو ياحريرة كان يبقي آخر راجل في العالم ...

يتبع.....