بيت الزار

الجزء 25

جابو الخبيز والحلاوة والبلح والقنقليز والفنكوش .. بعدها دخلو الخروف كان مزيننو بالودع والسوميتة ومحننو .. ادوه موية وشالو الحنة عملوها ليه في راسو وفي ضنبو .. دخل واحد من مساعدين الشيخة حريرة عشان يضبحو اشوفو ليك خته في خشمو قطعة .. جريت حريرة سألتها مالو عمل كدا .. قالت لي عشان ما يزكر اسم الله .. قلت ليها لشنو؟ قالت لي كدا ارواح الزار ما بحضرو الكرامة المعمولة ليهم لما يزكرو اسم الله .. يلا اجهزي وخلي الاسئلة الكتيرة .. الراجل ضبح الخروف وحريرة قالت لي نطيها كم مرة .. بقت تقول دستوووور كبو البخور خلو العارض يفك منها .. جابو صحن ابيض كبيير وضبحو الخروف الدم نزل فيه .. حريرة شالت منو بي اصبعا ومسحتو لي علي جبهتي .. كنت عايزة استفرغ بس عضت لي خشما وبخاف منها لانها بتتقلب واحدة تانية .. قعدت تكورك بي صوت عالي سلامتكم سلامتكم وقالت لي النسوان لفو حوالين الخروف وبقت تقول كرامة مقبولة .. وبعد شوية صوت الدق والدلوكة والنقارة والكشاكيش بدا براحة براحة .. دق كش دق كش طق طق .. وبدت تزيد شوية شوية حريرة جرتني في الوسط .. والنسوان بقن يتمايلن ويتراقصن مع صوت الدق .. ريحة السجاير والصعود وصوت الدق بذيد كل مرة والنسوان بقن لافات حوالي وانا في نصهم بقيت بعاين ليهم وانا خايفة ومنططه عيوني .. وبتكلمن بي كلام غريب وبطنطنن بي حاجات ما مفهومة .. دق دق والصوت بقي عالي شديد وحريرة دخلت في جو

الغنا وبقت تقول

فيه سبعة مراكب

كلهن نصاري

شرابم البيرة والسجارة

دستووور يا اسياد الخواجة

فجأة اشوف ليك واحدة اتلبشت وبقت تكورك وترقص قالو خيتا جا وكانت لابسة بدلة وبرنيطه وشايلة عصاية وسجارة تشرب فيها وقزازة فيها حاجة بقت تشرب فيها .. ومع صوت الدق والغنا لفت ولفت ووقعت علي الارض .. جات عليها حريرة ورطنت معاها انجليزي .. وهي ردت عليها بالانجليزي .. بقيت منططه عيوني وبرجف اكتر .. من وين عرفو يتكلمو انجليزي .. بقيت بعاين يمين وشمال وفوق كان عايز يغمي علي .. قالت ليها الطلبات العايزنها الاسياد تجيبا والمرا قامت شديدة مبسوطة ..

يتبع.....