بيت الزار

الجزء 12

أعمامي نادو أبوي وحكو ليه الكلام القالتو ليهم سعدية .. ابوي جاط وقال دا كلام فاضي انا ما بآمن بي الخرافات دي وما بخلي بتي تعمل كدا وادخل ليها حاجات زي دي وهي في العمر دا .. عمي تاج السر قال ليه فيها شنو بناتنا حصل ليهم اكتر من دا واصغر منها وما جاتن اي عوجة مرة اتنين بقو كويسات .. والنصيحة الشيخ قالهم بتك داخلا جن (بسم الله الرحمن الرحيم اعوز بالله من الشيطان الرجيم) وانت شفت بي عينك البت كملت من لحم الدنيا وبتقول كلام ما إياهو وبتهلوس وبتكورك .. ما جبتو من عندي يا علي حريرة ادري وبتعرف الحاجات دي امش اسألا .. جات حريرة داخلة وكانت واقفة ورا الباب تتسمع في الكلام قالت لي ابوي بتك ركبتا روح شر يعني فيها زار وما بتتحل الا لما نرضيهم .. واكان انت خايف اها انا البعملو ليها وبتعرفني من زمان شيخة زار والناس تجيني من بعيد بتعالجو عندي .. ابوي قال ليهم لا بتي بوديها الخرطوم وبتتعالج هناك ..ما اقتنع بي كلامهم وقال لي سعدية جهزي رهام خلينا نمشي .. حريرة جاتني وقالت لي اسمعي هنا الاسياد اختاروك وان ما نفذتي ليهم طلباتن الا امك بتمرض مرض شديد وبتموت .. كان مشيتي وما جيتي .. خوفتني شديد واتزكرت كلام ماما وان المرا دي بتاعت كتابات وشيوخ وقبل كدا ضرتا كتير .. ما كنت عارفة شي الوقت داك غير اني ما قدرت اقول ليها لا .. قلت ليها طيب لو عملت ليك العايزاه بتخليني تاني امشي .. قالت لي اي بس اعملي دا وساعديني في كم واحدة جايبنهم لي وامشي تاني .. فرحته شديد وقلت ليها طيب .. وقلت الحمدلله حا ارجع لي ماما .. ابوي جا ومعاه اخواني جابو لينا عربية وكلنا مشينا ومعانا عثمان الما بطيقو دا بقي لي زي ضلي مكان ماشة هو معاي ...

يتبع....