بيت الزار

الجزء 07

اليوم التالت صحيت من النوم عيوني حمر ومورمات وكان عندي صداع .. جات واحدة من بنات عمي جدعت لي قميص تاني احسن الكنت لابساه .. ريحتو يععع ما حلوة .. قالت لي قومي عندنا غسيل .. قلت ليها ما بقدر انا يدي واجعاني امس غسلته وكنسته ما بعمل اي شي تاني .. مشت جابت لي مرة عمو ابراهيم بتاعت الظار .. من شفتها جسمي كش كدا وتلج .. جاتني وبقت تعاين لي بطريقة خوفتني قالت لي هييييي يابت نهي دلع امك دا ما عندنا هنا عايزة ولدي عثمان يعرسك كيف وانتي ما بتعرفي تسوي شي .. قومي يلا تقوم قيامتك .. قلت ليها تقوم قيامتك انتي وولدك عثمان انا ما بعرس لي واحد امو ذرقا .. اشوفا ليك قلبت ليك عيونا وجات علي ولمت فيني ضرب بقيت ببكي وبصرخ يابابا يابابا الحقني .. يدها تقول خشبة بس كبيرة وناشفة وسمت جسمي كلو .. قالت لي كوركي لي بكرا يا بت نهي ابوك واخوانك مشو الخلا مع اعمامك .. وحسك عينك تجيبي سيرة ليهم .. يمين افك فيك الريح الاحمر ..

خفته منها وقلت عايزة تعمل فيني شنو المرا دي ياربي تحفظني منها .. جرتني من هدومي وكوركت لي سعدية مرة عمو تاج السر .. سعدية سعدية شيلي الدهان دا وكوفتي ليها شعرا دا ضفاير ضفاير .. قلت ليهم ماف زول يهبش لي شعري وانا ما بسرحو الا كدا .. ما اشتغلو بي كلامي وما قدرت عليهم قعدتني في الارض وعملت لي زيت ريحتو ما حلوة ملت لي راسي ومشتطو لي قوي لما وجعني .. بعد انتهينا قالت لي امشي مع ترتيل نجيب الحطب للعواسة .. لبسوني طرحة وسفنجة ومشيت معاها .. الشمس سلختني لقطنا القصب ورفعتو لي في راسي وجبناه .. جيت عطشانة شربته كتييير .. بعدا كنسته البيوت جوه وغسلنا الهدوم .. جو نسوان كتار .. سعدية نادتني يابت علي تعالي ختي البنابر وولعي النار في الكانون وجيبي البخور وختي القهوة والشاي ... طبعا كرهته الوضع دا شديد ولعنته اليوم الجابنا هنا .. طلعته البنابر رصيتها تحت الشجرة وجبت ترابيز صغيرة وقصيرة كدا ختيتا .. النسوان سمعتهم بقو بسألو في الشمار دي عروس عثمان وامها نهي خلاص طلقوها ما بتجي يعني .. ما رضيت لي ماما قمت رديت عليهم قلت ليهم ماف واحدة تجيب سيرة ماما والعواليق الاسمو عثمان دا ما بعرسو شوفو ليه واحدة تشبهو .. نهرتني مرة عمو شديد يابت اتلمي قبل المك تجبيبي الادب من وين .. عاينت ليها بطرف عيني ومشيت .. سريع اعملي الجبنة وجيبي البخور .. ولعت البابور وجبت المبخر .. قالت لي دا جاولي وعدني كبيه .. شلتو وكبيتو في المبخر بقي يعمل طق طق طق .. قعدت تقول دستوور وب علينا وب علينا .. زحيت بعيد قلت ليها في شنو دا صوت النار .. ما ردت علي جبته الجبنه وانا ما بعرف اعملا كيف كبيت فيها الموية ومليتا من البن وختيتا في النار حرستها لما اتدفقت ختيتا وختيت الفناجين والسكر وجبتها ليهم .. كبيت اول لي سعدية .. 😂😂😂😂 فجأة اشوف ليك فنجانا جدعتو وقعدت تكورك جبنة اليابا والتابا خلي من يدك .. يا ترتيل تعالي سوي الجبنة وطيري انتي من وشي قوام ... بيني وبين نفسي اتبسطه شديد وقلته البركة الطلعت كعبة زيك .. ترتيل عملت ليهم الجبنة وقعدو يشكرو فيها وماشاءالله بخت عريسا ونسابتا بيها يعني الكلام لي .. قعدته في بمبر هناك وبقيت بعاين ليهم .. قامت سعدية قالت لي واحدة يلا يا السرة ارمي لينا الودع النشوف عندك شنو لينا ...

انتي ياالسرة قالت ليها جيبي البياض .. سعدية قالت ليها ان شيتن سمح اختو ليك..

السرة رمت ليها ستة حاجات كدا بشبهو صدف البحر صغار اتشتتو قداما في التراب وقالت ليها اجي اجي شايفة الشورة عندكم في البيت ...

يتبع....