بلا عنوان

الفصل الثامن

#بلا_عنوان
الفصل الثامن
#بقلمي_اسراءالجميلي

اني المعلومات الي دا اجاوبه كله اعرفه من خلال كوني معلمه ..
و لان جنت احب الكتب الدينية و هواية اقره ..
و عندي سرعة حفظ و الحمدلله ..
بالموقف الي جنت بيه ..
من المفروض انسه كلشي ..
بس احس اول ميسألون سؤال ..
كأنو الجواب يكون بطرف الساني ..
راساً ارد حتى بدون ما اصفن ..
رد الخليجي : شكد جان عمر الرسول من نزل عليه الوحي ؟
٤٠
شوكت توفى الرسول عليه السلام ؟
٦٣
رجع العراقي سألني و هو يعوج بحلكه و فاتح عينه متفاجئ من اجاباتي ..
ماهي الصلاة المفروضة ؟ و ماهي السنة ؟
عددتهم اله ..
أتذكرت كلام ابني بالتوكل على الله ..
باوع عليه السوري و عيونه شرر ..
معلوماتج الدينية شفعتلج ..
كام وكف و ضرب على الميز مرة ثانية و عاط ..
بس اذا اجه اسمج مره ثانية ..
قسم بذات الله ..
متشوفين ضوه الشمس بعد ..
فهمتي ..
رفعت راسي بعزة نفس ..
نعم ..
طلعوا منا بقيت اباوع عليهم من الشباك ..
احس بدت رجلي تخدر و متشيلني ..
بدت عيني تغوش ..
احس الغرفة دا ادور بيه ..
اخر شئ شفته طلعوا الخبثاء من باب المدرسة ..
محسيت الا المعلمات فوك راسي و منزعيني الخمار و الربطة و وجهي منكع مي ..
شكو ؟ شنو صار بيه ؟
جانت ست اسيل خاله راسي جوه رجليه و تحجي ويايه ..
حمدلله على سلامتج حبيبتي ..
و كل المعلمات نفس الشئ ..
يلا كومي حبيبه ..
مصار شئ ..
دفع الله ما كان اعظم ..
المديرة : يلا حبيبه اصحي شوية حتى توديج اسيل للبيت ..
الله على الظالم و المفتري ..
الله يحميج يا بنتي ..
رجعت بس ردت اسمع صوت امي ..
حسيت راحتي بيه ..
حجيت وياها بس كلشي مكتله ..
هي بعيده شنو تكدر تسويلي ..
سديت و بديت ابجي و اعيط ..
اجه يحيى ..
شبيج شكو ليش تبجين ؟
صحت عليه و كمت احجي بهستيريا و ابجي ..
شوف نتيجة عنادك و اصرارك ..
جان رحت من اديكم اليوم ..
فهميني شنو صار ؟
جان صرت الهم و اتنقل من مقاتل للاخ ..
و قبلها جان راح ابني ..
هاي شبيج انتي خبله فهميني ؟
انت ظالم و مراح ترتاح الا تدفنا كلنا ..
ظليت ابجي ..
حجيتله بعياط و صوت عالي ..
هو بالبداية جان يعيط ..
بعدها اجه عليه ديحضني و ادفع بيه من صدره و ابجي ..
اشششش اشششش حبيبتي ..
كعدت بالكاع و نزل وياية كعد كبالي ..
اسكتي يا عمري ..
بقه لافني بأثنين ايده ..
صح كلامج كله اني غلط ..
اني اسف مع انو بعد ميفيد الاسف ..
من ظل هيج يكول نزلت ايدي و بقيت بس ابجي على صدره ..
ملاذي الوحيد و اماني يحيى ..
سكتت يمكن بعد ساعة ..
بعدها ساعدني كومني وداني للغرفه ..
نزعني عباتي ..
جابلي فاليوم شربني ..
خلاني على فراشي ..
غطاني ..
ارتاحي حبيبتي اروح اجيب اكل و اجي ..
محسيت الا واحد بوجهي ..
يلا حبيبه تره متت جوع ..
باوعت على الساعة بالخمسة ..
ليش مكعدتني ..
شفتج تعبانه ..
لعد و الجهال شكلوا ؟
مو جبت غده ..
لا يظل بالج تغدو و ديقرون بالصالة ..
تعاي ناكل اني و انتي ..
بس ابدل.
اجينه ناكل ..
اسكتي اليوم وداني ابو سارة ال سوق السبايا ..
شنو يعني ؟
سوق جديد قصدك ؟
لا حبيبه هذا سوك ديبيعون بيه اليزيديات ..
حسبي الله عليهم ..
قصدك الي بقه منهم بعد ما راحوا كومة منهم بجبال سنجار ..
اي و الله حبيبه كومة ماتو من حاصروهم ..
اطفال و اكبار بالعمر ..
زين و شلون يبعوهم ؟
مو همه حبيبتي الكبيرات و المحلوات خلوهم خدم عدهم ..
و الحلوات بنظرهم كامو يبيعوهم ..
يبدي سعرهم من ورقه الى تلث ورقات ..
بعد ما قتلو رياجيلهم ..
و خلو ولدهم يستسلمون و علموهم على القتال ..
عزه حسبي الله عليهم ..
تخيلي اكو عمرهم ٩ سنوات ..
و الي يجي يشتري يكلب بيه عبالك ديشتري طلي الكلب ابن الكلب ..
اسكتي مو ابو سارة زوج مريم اشتره اربعه ..
ايا ناقص يا سافل يا ماعندك شرف ..
وج علكيف اكلتي الرجال ..
لعد مو حرام عليه بعد شيسوي بيه الله ..
وج لحظة يمه السانج ميخلص احد منه ..
لعد فهمني شيسوي بيهن خدامات ال مريم ..
لا حبيبتي اشتراهم ..
و بده يهرب بيهم للشمال ..
مو هو عنده اذن كسايق يطلع للشمال ..
فكل مرة يهرب وحدة ..
خجلت و نزلت راسي ..
استغفرلله يا رب شكد ظنيت بيه سوء ..
هههههه وج انتي عجوله و السانج بس الله خلصانه منه ..
اوي شمدريني انت دا تكول يشتروهم مدري شيسون بيهم ..
شمدريني دينقذهم هو ..
اي صح ..
الله يبارك بيه و يصبره على فقد بنته ..
وج تخيلي كل هاي المدة و محد يدري عنده ابيته ايزيديات ..
مرت الايام بين تهجير مسيحي ..
و سبي يزيديه ..
و جلد مسلم بنظرهم مرتد و مخالف ..
مرت الايام و مكدرت اداوم لحد اخر يوم امتحان ..
خابرتني المديره ..
كالت لازم اداومين لان احتمال يجون تفتيش من الديوان ..
عاد رحت اخر يوم ..
و فعلاً اجوي من ديوان التعليم و كالو بعد الامتحان انريد نجتمع بكل الكادر التدريسي ..
اجتمعوا بينه ..
كالو : احنه نريد نغير المناهج ..
هاي مناهج حرام بيه بدع ما موجوده بتعاليم دينه ..
و بيه اثارة شهوات للاطفال
فانريد اي احد منكم قادر حتى يساعدنه.

فالقصة مصايب بس الله يدري بيه