بلا عنوان

الفصل الخامس عشر

#بلا_عنوان
الفصل الخامس عشر
#بقلمي_اسراءالجميلي

عاط بينه ..
الابنية لازم تطلع من البيت بأسرع وقت ..
زين وين تروح بابا ؟
ما اعرف نهربه بأي طريقة جانت ..
اني راح احجي وي ابو سارة يشوفلي طريقه ..
اي عفية عليك ابو كرم ..
هو مو قبل مهرب اربعه ؟
كرم عيونه تتلفت علينه اثنينه ..
حسيت بنظراته يستجديني حتى تبقه ..
زين بابا صار عليه شئ شلون ؟
هاي امانة بركبتنه ..
ابني احنه ما خنه الامانه ..
بقيناها كومة يمنه ..
و اني حخليها امانه بيد زوج عمتك ..
لا بابا اني اخاف عليه ..
عاط يحيى ..
و انت شنو و تخاف عليه ؟
هااا بابا هاي صارت مثل سنا ..
الله كريم ابو كرم ..
اروح اطلع المكرودة ..
طلعته لكيته مسخنه من خوفه ..
شافت يحيى معصب ..
ختلت وره ظهري ..
صعدنا فوك ..
دا ندخل بالغرفه ..
اجه كرم وكف بصفه ..
لا تخافين سيري ..
اني ما اعوفج ..
باوعت عليه اني بتعجب ..
اقصد احنه منعوفج ..
لازم نلكالج حل ..
و اني ما عندي احد غيركم كرم ..
نزلت دموعه ..
انتوا صرتي اهلي ..
غوركت عيون كرم ..
يلا ماما اطلع دا تبدل الابنية توصخت هدومه من الكواني ..
بدلت ..
انطيته اثنين بندول ..
و دثرته بكومة غطايات ..
سناوي انتبهي عليه ..
طلعت من غرفتهم لكيت كرم واكفلي ..
هاا ماما شلون صارت ؟
يحجي بهمس ..
احسن حبيبي ..
هاي بسبب الخوف ..
ماما شلون رضيتي على بابا ؟
خليت ايدي على جتفه ..
كرومي لا تخاف اني اذا ما أأمن على سيري ما اهربه ..
انت مو كلت مثل سنا ..
معقولة اشمر سنا بالتهلكه ؟
ابتسم بجمود ..
ثاني يوم سويت ريوك ..
يحيى : خابرة ابو ساره ..
بس ما كتله هيه يمنه ..
اتفقت وياه ..
الحمدلله .
و طلعت للدوام ..
سنا مداومت بقت وي سيري لان تعبانه بعده ..
اني لازم اروح ..
لان امتحانات النصف الثاني و دنحضر الاسئلة ..
كاعده بغرفة المعاونه دا اختار اني و ست لمى الاسئلة مال العربي ..
اجتي اسيل كعدت يمنه حسيته مو على بعضه ..
المديرة صاحت لمى راحتله ..
خير اسولة شبيج ؟
حبيبه اني دا اودعج بس الج ..
لان اعرفج تحبيني و لا يمكن تحجين الاحد ..
شكو اسولة ؟
انت تدرين عمر قبل الاحتلال ..
عنده عقد عمل باربيل و يروح و يجي علينه ..
قبل كم يوم خابرني و كال : بعد ما اتحمل فراكج انتي و البنات ..
فشايف سايق تكسي يطلع الكردستان و دافعله فلوس ..
باجر حطلع وياه من الفجر ..
بس اسيل الي اعرفه همه مانعين احد يطلع من الموصل !
اي
بس هذا السايق راح يهربنه ..
محد يدري بينه ..
حيطلعنه بطريق ما بيه سيطرات ..
من ذولة الجلاب ..
حبيبتي يا رب توصلين بالسلامة ..
بوستهه و حضنته حيل ..
امانة من توصلين طمنيني عنج ..
سافرة اسيل و ماكو خبر عنه ..
شهر كامل ..
بديت افكر بيه و دموعي تسبقني ..
بنية مثل الوردة و عدها تلث بنات اكبرهم عشر سنوات ..
المنظفه : ست حبيبه المديرة تريدج بعد نهاية الدوام ..
حاضر خالة ..
كملت واني ابالي الف فكرة ..
كلت بس لا ذولة اجوي ياخذوني ..
رحتله عيونه متروسة دموع ..
خير ست ؟
عندي خبر مو زين الج ..
طبعاً راساً عرفت عن اسيل لان هيه تصير كرابته من بعيد ..
بس خفت اسئله عليه كلت اخاف متعرف ..
تدرين باسيل سافرة مو ؟
سويت نفسي ما ادري ..
هااا لا ما ادري عبالي مجازة ..
اسيل رادت تروح الزوجها ..
السايق بايعهم الدولة الخرافه ..
دموعي كامت تنزل ..
و شصار بيه ست ؟
رجعهم و اخذوهم ..
كايللهم انتو مرتدين عن الدين الاسلامي ..
و رايحين للكفار ..
لهذا لازم نعدمكم ..
ماخذيهم لل ( الخسفه ) ..
تعرفيه ؟
اي ست شلون ما اعرفه الحفرة الجبيرة الي بحافات الموصل ..
موكفيه على الحافه هيه و بناته كايمين يتباجون و يتوسلون بيهم ..
هسه راح انذبكم لان مرتدين ..
اختاري منو بالاول نذب ؟
و كل واحد لازم وحدة من بناته بتك ايد و مقربه على الحفرة ..
كايلتلهم الي تريدو اسوي الكم ..
بس عوفو بناتي ..
الله يخليكم ..
زين لعد انطينه كل ذهبج و فلوسج ..
ماخذيه منه ..
و موقعيه على تعهد للموت متطلع من دولة الخلافه ..
اني اسمعه و ابجي ..
زين هسة رجعت البيته اريد اروحله ..
يا ريت رجعت البيته ..
اشو المديرة كامت تبجي وياية ..
ليش ست مرجعت ؟
اسيل ابيت اهله ..
لان فقدت عقله تماماً ..
كمت وكفت ..
شنو ست ؟
اي و الله ..
لو تبجي لو تعيط او تضحك..
اذا عرفت احد من اهله او جهاله فد خمس دقايق كل ساعتين و ترجع بعده تفقد ..
ودوه الطبيب كال هاي مصدومة ..
انطوه علاج و كايللهم تره ميؤس من هيج حالات ..
ما عدنه هيج مقدرة على هيج امراض و علاجه ..
ما عدكم بس الدعاء اله ..
لعد منو حجالكم الي صار بيه ..
بته ..
حسبي الله و نعم الوكيل ..
داومنه بمر و قهر ..
بعدها اجونه قلصو ملاكات المدارس ..
من ٣٢ معلمه الى ٤ و جابوا اثنين منهم ..
و انطوهم راتب ٧٥ الف ..
الي هو للمولدة ميكفي ..
اني كيفت كلت اكعد بالبيت ..
بس منين نعيش ؟
خابرة اهلي شكيتلهم حالي ..
و موقفهم وي محل يحيى ..
كامو يدزولي كل شهر مليون و نص وي التجار ..
الي يطلعون بتصاريح البغداد و ديالى ..

فالقصة فرج لاحد و حزن لاخر