بلا عنوان

الفصل الواحد و العشرين

#بلا_عنوان
الفصل الواحد و العشرين
#قصص_اسراءالجميلي

اي ماما صدك ..
يحيى احسه مثل الي بعد عنه صار بغير دنيا ..
لميت روحي الاجلهم مسحت دمعتي الي حاولت تنزل ..
يلا ابو كرم كوم ..
هسه الله الي يعلم حالهم لازم نصير يمهم منعوفهم ابد ..
رفع راسه باوعلي ..
هااا اي صح تحجين يلا البسوا ..
لبسنه عباياتنا و خمارنا و صعدنه بالسيارة رحنالهم ..
بس دكينه الجرس ..
انفتحت الباب ..
عبالك نرجس واكفه وراها ..
وك عمة تعال شوف عضيدك و سندك ..
ول يابه حمودي ماكو ..
ابني بعد ما يرجع ..
كرومي حاضنه و يبجي مثله ..
اويلي عليج يا كاع الموصل ..
ارويتي بدمعونه و دمومنه ..
يحيى : اسم الله نرجس استهدي بالرحمن خلي نفتهم ..
دخلنه للبيت ..
خطية ام يحيى ما كدرت اتكوم ..
عبالك انشلت ..
عمتي : يمه محمد كسغت قلبي يا ول يا الحنين ..
كعد كرم بالكاع يمه ..
لازم ايده و ساكت و عيونه مليانه دموع ..
يحيى : هسة متحجونه شنو القصة ؟
بس تبجون و تونون ..
احجي ابو محمد فهمنه ..
ابو كرم تعرف محمد انكليزيته قويه و عنده ناس اصدقاءه من كل الدول بالفيس ..
فيروح دومه لمكتب النت ..
يحيى : ادري هسه وكته يدور فيس و غيره بهالاوضاع الي منعرف تاليه ..
باوعت على كرم بنظرة حساب ..
باوعلي بحزن و دنك راسه ..
عمتي : يمه ولد شاب قابل ويصب غايحين هييم ديلعبون بالحاسبة ..
ماخذيه مناك ..
سالهم احمد صديقه : خير وين ماخذيه ؟
كايلين اله عدنه كلام وياه ساعتين و نرجعه ..
و هذا الحجي من البارحة لليوم ..
زين ليش مكتولنه ؟
عبالنه صدك يرجعوه بس لسه ماكو خبر عنه ..
كمنه كل واحد يتصل بالي يعرفهم بلكي نلكه حل ..
حتى اتصلت بالمعلمات هاجر و سوسن بلكي يعرفون شئ ..
ماكو خبر منه ..
تأذينه كلش اكل مناكل عايشين على المي و الجاي ..
الي يجوع ياكل خبز و جبن ..
ايام سودة الله لا يراويه لاي اهل ..
نرجس ساكنه الطرمة ..
و تون و لازمه راسه ..
تدخل للبيت بس من تريد تصلي و تلزك بالسجادة ..
تكطع القلب ..
بقينه هيج حالنه لمدة ١٣ يوم ..
برد الجو ..
صرنه بنص الدعش ..
و هيه متلفلفه بالبطانية بالطارمة و زوجه يمه ينام بالليل ..
ندعي كلنه من الله ..
ما عدنه غيره ..
كرم خابر اصدقاءه و وقف نشاطه وياهم ..
الظهر يوم جمعه ..
طلعت عليه سويتله شوربة دجاج ..
خليته كدامه ..
الخاطري اكلي نرجوسه ..
رفعت عينه باوعت عليه ..
رجعت نزلت راسه ..
نرجس حرام الي دتسوي ..
هسه باجر عكبه يجي حمودي شلون تستقبليه ها ؟
عوفيني حبيبه فدوة ..
معدتي مسدودة صدكيني ..
رفعت راسه باوعت على السما ..
بس ربي يفرجه عليه ..
لزمت ايدي اليسره ..
ادعيلي بس ربي يرده سالم ..
بعد ما اريد شئ ..
حتى لو يبقون يحكمونه بس ابني يطلع ..
لا تكولين هيج ..
هسه يطلع و همه همين يطلعون ..
بجت بحركة و الم ..
حضنته ..
كافي نرجس كافي ..
اني ما اريدهم يبقون ..
بس اريد محمد حموت حبيبه ..
لا الموت ارحم من احساسي ..
اندكت الباب ..
كامت راساً على حيله ..
تباوع على الباب و عليه ..
طلعوا ناس وكفت اباب الصاله و ناس اباب المطبخ ..
صاحت نرجس منو ؟
رد صوت مخنوك : اني ..
اتقربت بخطوات بطيئة ..
عدلت حجابه فتحت الباب على كيف ..
عاطت بصوت : محمممممد ..
وكعت راساً بالكاع ..
ركضنه عليه ..
دخل محمد و ركع الهلاهل و البجي و العياط ..
صوته مينسمع حبيبي ..
غادي جلد و عظم و عيونه داخله ليجوه ..
مليانه خوف و صاير اسود جواها ..
منين ما يلزموه يعيط ..
عرفنه ماخذيه علمود اصدقاءه بالفيس ..
عبالهم ديتفق وياهم حتى يقضي عليهم ..
بس همه حاطين بسجونهم جواسيس الهم ..
من خلالهم عرفوا انو همه مجرد اصدقاء ما عنده شئ ..
اخذوا مبايل و حاسبته و مطلعيه بعد مساليه كم سؤال ديني ..
تخيلوا صار الي يعرف معلومات جنه ناخذه بالاول ابتدائي عن دينه و رسولنه و اسلامنه ..
يطلع من السجن حتى لو قاتل ..
هااا و ياخذون منه كل الي يقدرون عليه ..
صاح كرم حجه وياه قبل ما نطلع ..
طبعاً اني عيوني مراقبه كرم و كل حركاته و سكانته بدون حتى ميحس ..
رجعنه للبيت حسينه بالامل و الانتصار القريب الي جايه ..
صعدت سنا و راح يحيى يغسل ..
ديصعد كرم على الدرج ..
كرومي ؟
نعم ماما ..
محمد وياكم ؟
اندار عليه بنظرات مرتبكه ..
منو كال ؟
اني اكول ..
محمد هو الي دلاك على الدرب ؟
ماما بس اكلج شئ انتبهي عليه ..
كعد على ثالث درجة و صرت كباله ..
ميضيع حق وراه احد يطالب بيه ..
الخير قرب ..
اوعدج حتشوفين بيت جدو كلهم ..
اتقربت عليه لزمت وجه و ايدي ترجف ..
اوعدني متموت ..
ابتسم بحزن ..
اوعدج بالي اكدر عليه ..
الموت ما اكدر عليه لان بيد الخلقنه ..
حضنته و شميته ..
الله يحفظكم ..
ماما الوطن غالي ..
و الي ما بيه خير الارضه و بلده و عرضه ..
ما بيه خير الاهله و حتى نفسه ..
سكتني مثل كل مرة ..
الكلمات انحشرت بين حنجرتي و الساني ..
مرت الايام و ازداد الظلم و القهر و الاذية ..
سوو المدارس بفلوس محد كام يداوم غير بس اولادهم ..
الكهرباء بس بالليل من خوفهم على نفسهم ..

فالقصة ربح و خسارة