بلا عنوان

الفصل التاسع

#بلا_عنوان
الفصل التاسع
#بقلمي_اسراءالجميلي

احنه كلنه بقينه ساكتين و لا وحدة حجت بينه ..
عاط واحد بيهم ..
هذا منهج كفار عفناه الكم هالسنة ..
لان جنه مجبورين عليه ملحكنه نغيره ..
راح اكرر سؤالي منو الي تريد يكون اله شرف المشاركه ؟
بقين ساكتين ..
عاد المديرة كالتله : اخي المنهاج يرادله ناس مختصين و دوم يكونون المشرفين من يكتبوه ..
كام وكف ..
افهم من هذا انتوا كلكم جبناء و تخافون تشاركون ..
و بهذا انتوا رافضين للدولة الاسلامية نفسه ..
عافنه و طلع و ركع الباب قوي ..
احنه كلنه كعدنه ..
هذا الحجي جان شهر الخامس نهايته ..
و هو كان اخر شهر نستلم بيه راتب من دولتنه العراقية ..
قطعوا الرواتب عنه ..
بعدها باسبوع ..
اخذو مديرتنه نفسه الي حجت و اختاروا بعد من الملاكات التعليميه ..
و احتجزوهم بجامعة الموصل ..
لحد ما يكملون المنهاج ..
حتى يكتبون الي همه يردوه ..
للعلم بتوجيه البنادق و المسدسات على رؤسهم ..
كلش انقهرنه على مديرتنه ..
المعلمات كله تعرفه ..
و اني صار سنه وياه اعرفه ورده مال الله ..
و جبرونه على كتابة الارقام بالشكل 12345 ..
لان هاي جانت تستخدم بزمن الرسول و منعونه من كتابته السابقه بالشكل ١٢٣٤٥ ..
منعوا الجوامع من قراءة سورة مريم ..
لانوا بها اثارة لشهوة الرجل ..
و بدو ينشرون جواسيسهم بالشوارع حتى يبلغوهم على اي مخالفات ..
و الي يحجي عليهم او يخالف قوانينهم اما يكصوله وصل مخالفه يدفعه مباشرة ..
اذا ما عنده فلوس ياخذون هويته ..
حتى يروحلهم و يجلدوه ..
عشنه ايام الشمس طالعة بيه ..
بس سودة مثل الليل ..
قوانينهم التعسفية بدت تزيد ..
و الناس تعبت و تأذت حيل ..
مرت الايام و الاسابيع و الشهور ..
بعدها سوو رواتبنه ٧٥ الف بالشهر و الي هيه للمولدة مجانت تكفي ..
همزين المحل موجود هاليشتروه الناس عايشين بيه
اجه الشته ..
يحيى فدوة اطلع اترس الصوبة خلصت نفط ..
فدوة حبيبه طلعي انتي اتكسرت اليوم ..
جبت مواد للمحل ..
حاضر حطلع اني ..
طلعت اترس الصوبة ..
سمعت صوت بين الاشجار ..
بس بس ..
اوي بزونه خطية ميته برد ..
احجي بصوت عالي ..
باوعت شفت خيال اسود ..
عرفت اكو احد بالحديقه ..
يا يمه نقطة دم مبقت بيه ..
انداريت يمين يسار بداخلي اكول ..
بلكي الكه شئ اضرب بيه ..
شفت الكرك ..
لزمته و انداريت و مشيت على كيف ..
اتقربت رفعته دا اضرب ..
فدوة خالة ربي يخليج ..
بقيت رافعه الكرك ..
منو انتي ها ؟
جان اسمع رجلين بره بالشارع ..
عرفت دوريتهم اليوميه ..
هيه همين سمعت ..
حجت بهمس ..
خالة دخليني و اكلج ..
صفنت بوجه ..
خالة بداعت الله عليج ..
ابتسمت لحلفانه ..
انتوا وياهم ؟
اذا وياهم حتى بس يمشون من فرعكم اروح الغير بيت ..
الموصل جبيرة و ناسه طيبه ..
انخسه اذا جنه منهم ..
فدوة لا ياخذوني و الله يكطعوني ..
زين منو كال مو انتي منهم ..
لا خالة بروح امي و ابوية مو منهم ..
انوب انقهرت عليه لا ام و لا اب ..
يا الله صرت بين نارين ..
نار الي ادخله و يكتشفونه و نروح كلنه ..
و نار بنية بكد بنتي شلون اخليه بحلك الذيابه ..
خالة فدوة اني سبيه يزيدية ..
انصريني الله ينصرج ..
انتبهت على لهجته ..
اي صحيح اليزيد هيج يحجون ..
صعبه عليهم العربية ..
تعاي بسرعه ..
خلي ندخل ..
جريته على كيف و دخلته ..
نزعت البوشية ..
كعدت بالكاع و تبجي ..
اباوع عليه بنية تقريباً عمره بكد كرم ..
اجيت تقربت عليه ..
كعدت على اركبي و جريت راسه عليه ..
امسد بيه ..
قلبي يبجي عليه مو عيوني ..
كافي حبيبتي كافي ماماتي ..
اجه يحيى على الصوت ..
هاي شكو منو ديبجي ؟
هي لزكت بيه اكثر و غطت وجهه بيده و بصدري ..
هاي منو حبيبه ؟
ا ا ا هاي وحدة لكيته بالحديقه ..
عاط ..
صدك حبيبه كل عقلج ..
طلعت منهم ..
رفعت راسه و بعدها تبجي ..
لا عمو لا مو منهم عمو و روح اخوتي السته مو منهم ..
اجوي الجهال على صوته ..
على كيف يحيى مو هيج ..
حرام عليك ..
شافوه بقو ساكتين و صافنين علينه ..
ياهو الي يحجي يلتفتون عليه اثنينهم و يباعون ..
يابه هاي هبيه ..
صوتك نصي يروح يسمعونه الجيران ..
او همه بدورياتهم ..
كرم : بابا انطي صبر خلي نفتهم شبيه الابنية ..
حاضر انطيت صبر ..
و بعد الصبر يعني شنو ؟
تبقه قصدكم ؟
سنا : بابا لحظة نسمع و بعدها نقرر ..
يحيى : صلوات سنا تريد تقرر ..
اي عيني تحفوني ولد حبيبه ..
سنا : لا بابا العفو مو قصدي احنه ..
قصدي انت و ماما الرئي الكم ..
خوش ..
كعد على كرسي ميز المطبخ ..
كومي بنتي اكعدي على الكرسي ..
حسيته حن شوية من حجت سنا ..
كومته و ساعدتني سنا كعدناه ..
كامت تشهك هالكد ما بجت ..
جوعانه عطشانه باباتي ..
ردت تبجي ..
كلشي عمو كلشي ..
جوعانه و عطشانه و تعبانه ..
مجروحين قلبي و عقلي قبل جسمي الشابع جلد ..
نزلت راسه.
لا حول و لا قوة الا بالله ..
اني و سنا دموعنه نزلت ..
كرم بقه واكف يباوع عليه و منتجي على الثلاجة كباله تنزل دمعته و يمسحه..
يحيى عيونه غوركت..
لعد كومو سوله اكل و خليه تغسل حبيبه.

فالقصة اجرام