بلا عنوان

الفصل العشرين

#بلا_عنوان
الفصل العشرين
#قصص_اسراءالجميلي

بقه كرم مبتسم بس بعيونه الف ونه و حزن ..
يمكن هو صغير بنظري و نظر الناس ..
بس مرات احس عقله اكبر حتى من ابوه ..
الله يحفظهم الي كلهم ..
مرت الايام و الاشهر و احنه من حال الى اتعس منه ..
جنه نجتمع نوبات ابيتنا او بيت وحدة من البنات ..
نكعد نغير جو نتونس شوية ..
هاي الجمعات جانت تخفف عنه ..
تحسسنه بالحياة الي فقدنه طعمه من احتلونه ..
بيوم رحنه كلنه البيت عمتي ..
كاعده وياها بتها نرجس ..
ابنها محمد جان صديق كرم كلش ..
و عدها اصغر منه ٣ بنات جانوا يبقون وي سنا ..
احنه عدهم و سمعنه عياط و بجي ..
طلعنا بره ..
نشوف مره اربعينية ..
تبجي و تعيط و تملخ بشعره كدام الرياجيل و النسوان ..
اويلي عليكم بناتي ..
رحتوا من وكت حسبي الله و نعم الوكيل ..
الله ياخذكم يا الدولة البلا اسلام ..
الناس تسكت بيه بس ميفيد ..
عبالك مخبلة ..
الجيران اتصلوا بناس اقاربه ..
اجوي دخلو للبيت ..
طلعوا تلث جثث ..
راح ابو محمد و يحيى ديفهمون شنو الشغلة ؟
و بعد ما خفت الهوسة و اخذو المره و الجثث ..
رجعوا و حجونه القصة شنو ؟
هاي مرية جبيرة عدها تلث بنات بس ..
زوجه اتوفه اول دخول داعش من خوفه على بناته ..
كل اهليتهم طلعوا خارج الموصل ..
بقت عايشه على اهل الخير ..
بناته اعمارهم ١٦ و ١٥ و ١٤ سنة ..
نصحوها ناس تروح الديوان الزكاة تقدم على راتب ..
ههه عود همه اهل خير و يوزعون رواتب ..
و الله كلهم بيهم حرام و لا ما طلعوا بهالحقارة و الاذية لخلق الله ..
عمتي : وي الظاهر هذه ام لبنى الظاهر انا نظري صييغ ضعيف ..
المهم اجوهم زيارة ..
لازم يشوفون بيتهم و يستفسرون منهم حتى يعرفون شكد ينطوهم راتب ..
شافوهم بنات و صغار ..
سألوهم السؤال الحقير الي بيه مأرب اخرى ..
شلون عايشة انتِ و بنات وحدكم بدون رجال ؟
لازم يتزوجون ..
حاجية وياهم متوسلة بناتي صغار ..
كايلين اله تعصين امر الامير ..
هسه نسويهم سبايا و نسجنج ..
رضت المرة و جبروها تعزم كل نسوان الفرع ..
زوجوهم كلهم بيوم واحد ..
لدواعش طبعاً ..
عمتي : ايه تمام انا حضغتوا العرس ماليتم ..
مصار شهر من تزوجوا ..
همه جايه زيارة بعد الشهر ..
طالعة تشتريلهم غراض ..
راجعه لاكيتهم تلاثتهم منتحرين على محجر الدرج ..
كاتبيله رساله ما معناها :
(( بعد ما نتحمل العيشة وي ذولة الوحوش سامحينه ))
الام يمكن تخبلت ما تحملت ..
عمتي : اولي عليكي ام لبنى مليح ليهسه عايشي على الغشعتينو ..
متحملنه كلنه بجينه عليهم ..
اويلي ربي لا تشوفه الاحد ..
بنات بعمر الورد راحوا ضحية ..
ضحية للاسلام مالهم ..
بري منهم ..
اعتقد همه ذولة حطب جهنم على الي سوه و مستمرين يسو بينه ..
رجعنه مقهورين كلش ..
يحيى : هاي الطلعة الي ردتوها ..
ثاني يوم رحنه للدوام ..
طبعاً رجعوني للدوام رغم عني ..
بعد ما كعدوا الستاف القديم و اختارونه بشكل عشوائي ..
بحجة انريد ملاكات جديدة ..
الحمدلله رجعت ادرس مادة العربي الوحيدة التشويه بيه قليل ..
بنفس الراتب العالي ..
ههه ٧٥ الف دينار عراقي ..
اجتي سنا عليه تركض ..
ماما ماما سمعتوا الاخبار ؟
خير سنا ؟
ماما العبادي اعلن بدء العمليات العسكرية على الموصل ..
فريت راسي بتعجب اني و المعلمات صديقاتي ..
على هاجر من........ و سوسن من........ الداعشيات الاثنين الجواسيس ويانه ..
وجهم كام يكلب الوان ..
هاجر بعد رجله محملته كعدت على اقرب كرسي ..
احنه الاربعة مثلنه خوفنه و ارتباكنه ..
سوسن : حبيبه شنو راح يصير بينه ؟
لا تخافين احنه بحماية الدولة الاسلامية ..
حسيت بانتصار بسيط بداخلي ..
و شفته بعيون الباقيات ..
اتمنيته يدوم و تكمل فرحتنه ..
بليلتها بدت العمليات عليهم و علينه ..
يا ربي شوكت تفرج تعبنه ..
انحس قلوبنه تحترك و همه بس الريحة مضوجتهم ..
ما همهم شئ غير بس الفلوس و النسوان البريئات ..
قضية لو نبقه العمر كله صعب نعرف ليش صارت و شوكت تخلص !!!
ربي كون النصر النه ..
كلما يزيدون عليهم الضرب يزيدون علينه الاذية ..
و قرارات ما انزل الله بها من سلطان ..
كرم بقه كما هو يستدرجوهم الصغار حتى يقتلوهم الكبار ..
بهيج حالة همه كلش اختنكوا ..
لان صار قتلهم من داخل و خارج الموصل ..
جنت احس ابني من يطلع كانوا اخذ الهوه وياه ..
ميرجعلي النفس الا برجعته ..
صار عمره عشرين ..
من عمري على عمره حبيبي ..
قطعوا كل خطوط التلفون ..
الحمدلله لحك كرم جابلي خط كورك ..
حتى اكدر اتصل باهلي بغداد ..
قطعوا النت ..
بقت بس مكاتب همه مسؤلين عليه بيه نت ..
بيوم كاعدين نتعشه ..
دك تلفون كرم ..
الو هلا بعمتي ؟
كام وكف على حيله ..
شنو شدا تحجين ؟
كعد ابني على اركبه و ذب تلفونه ..
يحيى : وك خير امي بيه شئ ؟
ابني يحجي بصوت متروس الم ..
لا بابا نانتي ما بيه شئ ..
محمد ابن عمتي ماخذي ..
الكلمات تطلع من حلكه بالكوه ..
ضربت على صدري ..
يمه اسم الله ..
وك صدك تحجي ؟
محمد جان الاخو الي مجابته بطني الكرم ..
عرفت وجع ابني شكد.

 في القصة حق لازم يرجع الاهله