بلا عنوان

الفصل الثالث عشر

#بلا_عنوان
الفصل الثالث عشر
#بقلم_اسراءالجميلي

عفتهم و نزلت جوة ..
بقلبي احجي ..
اه شلون ذكريات حلوة ..
رحت غسلت و توضيت ..
اجيت للغرفة لكيت يحيى متمدد ..
خال ايده اثنينهم جوه راسه ..
حبيبه شو تأخرتي ؟
ظليت اسولف وياهم ..
اني قلق من بقاءه يمنه !
يحيى بس الابنية اجتي دخيل عدنه ..
و العرب ما تطرد الدخيل مو صح ؟
صح ..
بس اني وراج اتذكرة هذا الاستاذ الليبي ..
مو عبالج دافع ذيج المره ..
حيعوفنه هسة اذا شافهه يمنه ..
تره ذولة ما عدهم صديق ..
الي مستعد يكفر حتى امه الي ولدته ..
و ابوه الي رباه ..
كلشي يسوي ..
اوكي راح اوصل وياك للاخير ؟
شنسوي ؟
نطرده ؟
لا
نوديه يم امك ؟
لا يمعوده غير تتخبل ..
ننطيه فلوس و نذبه براس الشارع ؟
لا حبيبه مو هيج ..
لعد شنسوي يحيى ؟
استغفرلله ..
انت لو تدري شمسوين بيهم ؟
جان متكول هيج !
شمسوين ؟
حجيتله كلشي دمعت عيونه ..
نزل راسه حتى لا اشوفه ..
تبره منهم الله و رسوله ..
عوفيني انام هسه و باجر يحلها الله ..
حبيبه .. حبوبتي ..
هااا يحيى حباب عوفني نايمه شوية ..
كومي نتريك ..
حتى نروح نجيب ملابس للابنية المدري شسمه ..
وخرت اللحاف و تربعت على الجرباية ..
باوعت عليه و فاتحة عيني ..
صدك تحجي ؟
وج اي كومي قابل اكذب ..
على الاقل شتوية لان منعرف شكد تبقه يمنه ..
حاضر حاضر خمس دقايق و اجهز ..
عيني و الريوك ؟
اي و اكملك الريوك ..
كمت اسمعه يكول وراية ..
هاي اش بيها اتخبلت ..
ضحكت و اني امشي ..
رحنه اني و يحيى للسوك مال منطقتنه ..
اشتريتله كله للبيت و داخليات و بس شئ واحد للطلعه ..
و بعدنه دا نتسوك ..
جان نسمع صوت مره عله ..
طبعاً السوق كله خرس ديشوف شكو ؟
اندارينه انباوع ..
نشوف مره و رجال من ديوان الحسبه ..
لك انت شعندك وراية كافي عاد ..
عاط ..
دا اكلج روحي البسي جفوف و تعاي كملي مسواكج ..
اندارت عليه ..
و دا اكلك اكمل يلا ارجع ..
مشت شوية بقه يمشي وراها ..
ما اعوفج الا ترجعين ..
لك صار ساعة لاحكني ؟
هو هذا الاسلام مالكم ؟
شو حتى لا صلاة و لا صوم ..
اي احنه الله مسقط عنه الفرائض لان مجهادين ..
لك منين لكيتوها الهاي بيا دين ؟
و انتي شتعرفين عن الاسلام و مفاتنج ظاهره ..
تغرين بيه الرياجيل ..
لك يا مفاتن ؟
هو الي ينغري من ايد مرة رجال ؟
و جان تنزع شحاطته من رجله ..
شمرته علاليكه بالكاع ..
و دك ضرب على راسه ..
و مجلبه بهدومه و تضرب ..
بالكوة انهزم منه بعد ما شبعته كتل ..
الرياجيل كامت تصفكله ..
و النسوان تهلهل على الي سوته ..
رجعنه للبيت فرحانين من شجاعته ..
لكيت البيت يضوي نظافه ..
شفنه البنات ديتريكون بالهول ..
هاي منو منظف ؟
و الله ماما هيه كاعدة قبلي و منظفه ..
و سوتلي ريوك و كعدتني ..
ليش ماما حبيبتي ؟
خالة عادي اني متعودة انضف ..
لا ماما انتي مريضة صيري زينه و الله كريم ..
شوفي شنو جبنالج اني و عمو ..
شافتهم تخبلت ..
تضحك و فرحانه ..
اعيونه دمعت عليه ..
اجتي تريد تبوس ايدي ..
لا ماما شنو تسوين ؟
استغفرلله ..
انتي مثل سنا حبيبتي ..
كومي سناوي صبينه شاي ..
حاضر ..
شوية و دخل كرم ..
وجه مو على بعضه ..
السلام عليكم ..
بعدنا ممجاوبيه صعد فوك ..
صفنت شسوي حتى اروح وراه بدون محد يحس ..
حبيبتي سيرينا كومي خلي نصعد ملابسج ..
كامت الابنية وديتهم الغرفة سنا ..
كدريهم بنتي حتى الي ميعجبج انرجعه ..
نعم خالة ..
رحت راساً على غرفة كرم ..
دكيت الباب ..
تفضل ..
ها حبيبي خيرك ..
باوع عليه ..
كام بسرعة سد الباب و حضني ..
يبجي و خانك صوته بجتفي ..
شبيك ماما خيرك ؟
الف ونه صارت براسي من دموعه ..
شكو عيوني انت ؟
ليش ارضنه مدا تشبع من دمنا ؟
شوكت الكاع تكول كافي ما اريد بشر ؟
متكول حبيبي ..
هي هيج الدنيا ..
يوم الك و يوم عليك ..
بس ماما بالموصل صار اله سنه و نص بس علينه ..
لا حبيبي اما بنعمة ربك فحدث ..
ما ضحكنه بيوم ما اجتمعنه باهلنه ..
مو زين محد من اهلنا و معارفنا مصار بيهم شئ ؟
ماما صار ..
وخرته من حضني و لزمت وجه برعب ..
منو كرم احجي ..
رجع يبجي اقوة ..
ماما خمسه من جماعتي الزمو ..
يا يمه !
يمه شحيكولون امهاتهم من يدرون ..
كمت ابجي وياه و اني احجي ..
شلون لزموهم ؟
سوللهم كمين و لزموهم و تفننو بطرق تعذيبهم و موتهم ..
شحيسون اهلهم من يشوفون جثثهم ؟
يا جثة ماما ما بقه منهم شئ ..
عززه ؟
و الله ماما ماكو ..
عدموهم كدام الناس بحي النور على الشارع العام و كل واحد بطريقه ابشع من اللاخ ..
واحد شدو و نزلو بمي حار ..
الثاني خلوه بقفص و حركوه ..
الثالث شدو ايده و رجله و داسو بسيارة تبليط الشوارع ..
الرابع لفوا ديناميت عليه و فجروا ..
و الخامس نزلو ب برميل بيه تيزاب ..
هو يحجي و اني اتخيله كل شوية بصورة واحد منهم ..
اووووي ..
اويلي على شبابكم الراح بيد المجرمين ..
جريته كعدت اني وياه على جربايته ..
شلون تالي كرم ابقه مشلوعة قلب عليك ؟
كام وكف و عله صوته ..
شتريدين ماما ها ؟
تريدين اتبره من وطني و كاعي ..
و اصير زعطوط !

فالقصة حب برئ ..