بلا عنوان

الفصل الرابع و العشرين

#بلا_عنوان
الفصل الرابع و العشرين
#قصص_اسراءالجميلي

مشينه و شايلين اجفانه بدينه ..
التفتت وراية ..
جر ايدي كرم ..
لا ماما ابد لا تندارين استمري عادي ..
بقينه نمشي سريع بالثلث ساعة ..
لاكتنه دورية مال دواعش ..
وين رايحات ؟
طبعاً معظم الدوريات الي بالليل يكون وياهم داعشيه ..
حتى تفتش النسوان و تتاكد منهم ..
خاصه بعد قتل كومة منهم بطريقة لبس النسوان ..
وكفنه كتله بصوت متروس قوة ..
خوية رايحة اودي بنتي للقابله حامل و عده تقلصات ..
كرم رفع ايده على بطنه و كام يطلع اصوات الم خفيفه ..
عاط الداعشي ..
هسه وكت حوامل رجله ما كدر يصبر لحد ما نرجع الموصل امنه ..
صيحو نورس خلي تجي تفتشهم ..
اني كمت ابجي ..
خوية ليش هي لحكت تتهنى ..
دموعي نزلت بسرعة من خوفي ..
بعده شهرين زواج ..
اجوي مجرمين الجيش و قتلو بقصفهم ..
كام يصفك بيده ..
بسيطة اختي هسه ناخذ بثاره ..
يلا يلا افتحولهم الطريق ..
تريدين نوصلج ؟
لا خوية هاي قربت البيت القابله ..
مشينه جان اسمع صوت مره ..
نعم اميرنا تأمر بشئ ..
بطئت ردت اوكف ..
حجه كرم بهمس ..
امشي ماما سوي نفسج ما سمعتي ..
سمعنا كاله : لا هيج مريه مريضه و امه ..
شنو قلبي صار برجليه ..
بعدنه عنهم شوية ..
كمت اضحك ..
هاي شبيج ماما خير ؟
لك دا اتذكر من كمت تتوجع مثل النسوان ..
ههههه لعد بس انتِ تمثلين على ابوية ..
يا ول غير من وراك ..
ربي يستر علينه و نردله سلامات ..
بعده وصلنه مكان كله بيوت اكثره مهدمه حيطانه ..
واكفه على شعراية ..
جان يشيل كرم حجاره من الكاع ..
شمره بعيد عنه ..
شدتسوي و الك ؟
بصوت ناصي متروس خوف ..
لحظة ماما ..
رجع شمر حجاره ثانية و الثالثة ..
اشو بدو يطلعون رياجيل ..
حجه واحد منهم ..
صوت يرجف القلب فرح مو خوف ابد ..
قوي بقوة جبال سنجار ..
منو انت ؟ و منو وياك ؟
اني مرسال الغرام و هاي امي ..
ضحك ..
اهلاً بيك و بالوالدة ..
يااابه الامان الي حسيت بيه بس عرفتهم قوات عراقيه ..
اني النقيب حيدر الملا ..
و ذولة جماعتي جيش و حشد ..
على راسي كلكم ..
اني ساكته بس اسمعهم ..
شلون يحجي كرم ..
اروحله فدوة ..
احس كل لحظة بتربيته ما راحت هدر ..
يلا امشينه بويه ..
تنطي اخبارك بسرعة ..
حتى ترد الهلك ..
مشينه شئ خمس دقايق ..
وصلنه البيوت مهجوره و يمه دبابات و رياجيل على مد بصري ..
بشوفتهم حسيت الكاع راده راده ..
مدام فوكاها ذوله السباع ..
شباب كبار و اصغار ..
تركو احلامهم ..
تركوا اهلهم و احبابهم ..
تركوا زوجاتهم و اطفالهم ..
تركوا الام الباقية واكفه اباب البيت اتاني خبر منهم ..
اختاروا لو يحرروها لو يكونون قطره ..
دم الشهيد هو قطرة دم حاره نزلت على كاع الوطن ..
روته و خلت ابداله تطلع الف ثمرة و ثمرة ..
تشبع ولد الشهيد و كل هله و ديرته و ارضه ..
دخلو كرم على الآمر ..
قدمولي جاي و ظلو يسولفون ويايه ..
اخذت عليهم و ظليت اضحكهم و اضحك وياهم من كل قلبي ..
تحسهم فرحانين مع انو همه جايين للموت برجليهم ..
عجيب امر هذا البلد و اهله ..
الحزن بقلوبهم و الضحكة متفارك شفافهم ..
خالة والله حبيناج ..
خاله تدرين تذكريني بأمي ..
مجانت تكعد يمي الا تخليني اضحك ..
ضحكة و لزمت راسه ..
الله يحفظك الها و يردك سالم يمه ..
خاله اني اردله بعد النصر ..
ان شاء الله يا بعد خالتك ..
كلكم تردون ..
بحق داحي باب حيدر ..
نط واحد يطلع عمره ١٧ سنه ..
خالة ليش انتوا تعرفون حيدر ؟
ضحكوا الكل ..
ضربه واحد بصفه على راسه ..
لك هو اليهود يعرفوه ..
اهله ما يعرفوه ؟
ضحكت ..
ابني جا شلون ما نعرفه ..
ضحكوا ..
رجع سالني ..
يا خاله و تعرفون ال جا ..
هههه وك يمه احنه ارض وحدة و دم واحد ..
و الي ما يعرف ابو الحسنين ما يعرف الله و رسوله ..
رد رجال من ورايه ..
لا عاب حلكج اختي ..
كمت وكفت شفت كرم واكف وياه رجال اربعيني ..
و النعم منج و من اصلج على هاي التربية ..
الله محي اصلكم كلكم ..
و اشرت بيدي داير ميدورهم ..
حصنتكم بعين الله الي متنام و رسوله و ال بيته الطاهرين ..
بأذنه تحررون موصلكم و تردون سالمين الاهلكم ..
رد الرجال ..
اي خيتي هذا الي نريده منكم ..
دعاء بقلب صافي ..
كرم : سيدي جنت اتمنى ابقى وياكم بس لازم ارجع الوالده ..
لا ابني ما قصرت ..
احنه نريدكم تبقون عيونه يم العدو ..
ودعناهم و حسيت عفت قلبي يمهم ..
رجعنه و الطريق كله لازمه ايد كرم قوي ..
فرحانه بابني فوق الوصف ..
مو كل ذكر رجال ..
بس ابني رجال بكل معاني هاي الكلمة ..
وصلنه البيتنه بأمان الحمدلله ..
لكيت يحيى واكف وره الباب ..
قلبي راد يوكف حبيبه كلش اتاخرتوا ..
دخلنه للبيت جرني للغرفه ..
سد الباب و حضني ..
احسه غلفني بطمائنينه و امان و حنان الاب الي فكدته بالجبر ..
ثاني يوم بالليل تحديداً بتاريخ ٢٠١٦.١١.٩ الساعة ٣ الفجر..
فزينه على صوت الطيارات و قصف يرج البيت..
صواريخ و قنابل..
صرخات و عياط و اصوات طلقات بالحيطان..
الموت صار اله صوت ينسمع..
ارواح من ريحته نعرف خبيثه من طيبه

فالقصة خوف و ترقب للمجهول