كانو يڨصرو حتى سمعت جدة فؤاد قالت لشهرة :
جدة فؤاد : يابنتي انت تعجبيني بزاف ماشاء الله قاريا و عاقلة و الزين ماعندي مانقول على هاذي مانلقاش وحدة خير منك لفؤاد خمي مليح علاخاطر عارفة تعجبيه بزاف على هاذي حبيت نخطبك ليه مادابيا ماتردنيش قولي برك ايه غدوة نجي نخطبك من داركم
كل كلمة كانت تقولهالها كانت تنحي مني النص و قلبي يتقطع ستنيتها يجي نهار و يتزوج بصح باش نسمعها بوذني ماقدرتش نتحملها حسيت الدنيا دور بيا كنت شادة دموعي خفت لوكان يطيحو قدامهم بصح ماقدرتش نزيد دقيقة معاهم فهاديك الطابلة و انا نسمع فيها شحال راهي حابتها شهرة من لي بدات تهضر شفتها سكتت مانطقتش واش راح تقول و علابالها لي قدامها تحب هذاك الراجل لي حب يخطبها شافت فيا شهرة امبعد قاتلها :
شهرة : ماشي وقتها طاطا
علابالي قالتهالها غير باش تسكتها و ماتجرحنيش كثر !!
جدة فؤاد : انا قتلك علاخاطر موقبيل شفت وليدي فؤاد كفاش كان يشوف فيك مانحاش عينيه منك على هاذي حبيت نفرحو
كي قالتلها هكذاك وقفت بلا مانفيق ماقدرتش نزيد نحمل دقيقة خرجت لجاغدان تع لا صال و بديت نبكي كي لمهبولة لي يجوز عليا يبقا يشوف فيا كما عييت نحبس دموعي ماقدرتش كانو يحبطو شغل شلال
خلاص فؤاد محاني من حياتو خلاص نساني رآه معول يدير واحدوخرا كفاش قدر ينسى لوكان غير يوريلي كفاش جازو واحد عشر دقائق وانا نسكت في روحي كي قدرت اخيرا نسكت سمعت صوت يقولي نجمة واشبيك ؟؟ درت لقيتو هو سباب حالتي هاذي كان يشوف فيا يستنى مني نجاوبوا بقيت نشوف فيه تفكرت كلش تفكرت ياماتي معاه الضربة لي درتهالو مالڨري كلش مازالو يجي و يسقسيني واشبيا طرطقت في وجهو بالبكاء ماقدرتش نشد روحي اه يا عمري لوكان تعرف واشبيا ؟؟
غطيت وجهي بيدييا و بقيت نبكي قرب مني زاد سقساني
فؤاد: بصح واشبيك علاش راكي تبكي هكذا كاشما كاين غير لخير قوليلي بالاك نقدر نعاونك
انا : ماكاين والو
فؤاد : علاش راكي تبكي هكذا كي لمهبولة شغل راكي في جنازة دوك ناس يتوسوسو يقولو هاذي كانت تخرج مع العريس و خدعها جات حضرت عرسو
مسحت دموعي و قتلو : حبيت نبكي واحد مايسالني
رحت و خليتو مورايا علاخاطر لوكان زدت معاه نقولو كلش دخلت لا صال كانو دايرين واحد الأغنية كلي كانو متفاهمين عليا سمعتها قلبي تقطع
( الأغنية راهي لفوق لبنات )
رحت لشهرة قتلها
انا: شهرة هذاك هو انا نروح
شهرة : اصبري يخلاص العرس و نوصلك
انا : لالا لازم نروح لماما
حسيت شهرة كلي فهمت بلي مارانيش مليحة
شهرة : اوكي نجمة كيما تحبي باي باي
جدة فؤاد : تروحي وحدك بنتي في هاذي الظلمة
انا : معليش دوك نحكم طاكسي اتهلاي في روحك خالتي
جدة فؤاد : اصبري دوك نقول لوليد وليدي يوصلك
انا كي قاتلي هكذاك قلبي ولا يخبط خفت لوكان صح تقولو
انا : لالا خالتي معليش يعطيك صح خليتها ورحت بزربة باش ماتزيدش تانسيستي
خرجت من لاصال نحبس فالطاكسيات ماحبوش يحبسو جات طوموبيل حبست قدامي مت بالخوف فهاذيك الظلمة مشيت شوية بعدت عليها بصح زادت دنات و حبست قدامي حبط لكارو كي شفت لقيتو فؤاد
فؤاد : اطلعي نوصلك
انا : لالا صح
فؤاد : اطلعي اطلعي ماتيبسيش راسك مكاش طاكسيات دوك
انا : قتلك لالا صح ماتفهمش انت
فؤاد : ماتهبلينييييش اطلعي و لا نجي نطلعك بسيف ماتخميش ماراحش ناكلك عندي هضرة معاك
انا : ماكاين حتى هضرة بيناتنا روح بعدني
حبط فؤاد من طوموبيل و جا ليا حكمني من يدي بسيف و ركبني فطوموبيل
انا : اطلقني واشبيك هبلت
فؤاد : اسكتي لوكان ماعنديش هضرة معاك ماعلباليش كامل بيك
كي قالي هكذاك قاستني بزااف سكت ضربة وحدة مازدتش نطقت كامل حتى هو سكت ماهضرش كي كنا قريب نلحقو للدار حبس طوموبيل
انا : علاش حبست خلاص نحبط هنا يعطيك صح
كي جيت نحل لباب غلقها عليا من جيهتو
انا : علاه غلقت الباب ؟؟؟ حلها
فؤاد : .........
_______________________________________
؟؟؟ : الو سي محمود
سي محمود : انعم واش دارت
؟؟؟؟؟ : راهي خرجت من لاصال و ركبت فطوموبيل تع هذاك طبيب راني نتبع فيهم
سي محمود : بنت الحرام وصيتها بصح دارتها بيدها تخلصها غالية تبعهم بالاك يتبحرولك
؟؟؟؟ : اوكي سي محمود
_____________________________________
***********************************
لبارتيات لجايين راح يصراو بزاف عفايس جدد منهم تعرفو شكون هذا لي رآه يدي الاخبار لسي محمود 😘😘😘😘
أنت تقرأ
je t'aime à la folie
Romanceقصة عشق ابطالها نجمة و فؤاد لي يعشقو بعضاههم بصح تخرجلهم مشاكل بزاف و عراقيل زعما رايحيين يحاربو على جال حبهم هذا واش راح نعرفوه في بقية القصة
