je t'aime à la folie

partie 16

 

كي تحسب  بلي الدنيا ضحكتلك و اعطاتك اللي تتمنى  في نفس الوقت راهي تحيكلك في مصيبة كبيرة  مور ظهرك في الوقت  لي قلت فيه بلي  لقيت حب حياتي و هو الراجل الوحيد لي نكمل معاه سنين عمري  جاني خبر قلب موازين حياتي كلها غلطت الكبار رايحة نخلصها انا ...

و انا قاعدة مع عمتي حتى جا راجل شايب قعد معانا و قالي و اخيرااا تلقينا يا نجمة

انا : وين تعرفني و شكون انت

؟؟؟؟ :  نعرفك مليح مليح و شحال و انا نستنى فيك تكبري و كيما راني نشوف وليتي مرا يتمناك الف راجل

انا: واش راك تهضر شكون انت ماتقوليش بلي بابا

كي نطقت بهذي الكلمة ناضو يضحكو عمتي و هذا الراجل و خلاوني ما فاهمة والو

عمتي : باباك يانجمة آه يا خويا لعزيز خلصت غلطات دارتهم مرتك سامية و دخلت الحبس في جرتها

كانت صدمة كبيرة عليا كي سمعت هضرة عمتي

انا : اووووه حبيتو تهبلوني واش راكم تخلطو واش هذي الحكاية و انت واش راكي تقولي على ماما ماكفاش واش درتو فيها انا نروح خير

وانا نايضة نطق هذاك الراجل و قالي اقعدي مازال ماكملت هضرتي

وبدا يحكيلي بلا ما يخليلي فرصة ننطق باي حرف

؟؟؟؟ : هاذي يماك لي راكي حاسبتها ملاك و عمرتلكم راسكم على باباكم و عائلته

انا: ما ع م

؟؟؟؟ : اسكتي خليني نهضر

انا يسموني سي محمود كنت صاحب باباك الروح في الروح و كنت كل مرة نجي لداركم كنت نخدم سكرتير عند الوزير و كنت نعرف بزاف حاجات على أعمال الدولة واحد النهار عرضت باباك و يماك عندي للعشا و خليتهم الحرية كاملة يدورو في داري علاخاطر كنت داير الثقة فيهم
جاز هذاك النهار و بعد يامات علابالك واش صرا   
تسرقو مخططات سرية فيها كل المعلومات وين كان راح يروح الوزير و علابالك تاني مافقناش بلي تسرقو حتى بعد ماصرات الفاجعة دارو بومبا في البلاصة لي زارها الوزير مات فيها هو و بزاف ناس كانت لتم و هذا والو مقابل واش راح نزيد نقولهولك و باش تعرفي حقيقة يماك مور ما صرا الاغتيال بدات التحقيقات و انا كنت داير كاميرا فالدار و راجعت التسجيلات تع الايام لي فاتو لقيت بلي يماك هي  لي سرقت المخططات

انا : كذااااااب محال ماما دير هكذا

سي محمود: اسكتي و خليني نكمل مارانيش نهضر برك عندي أدلة و تسجيل الكاميرا مازالوا الان مخبي كي واجهت باباك تشوكا و كي حكمناها بكات و اعترفت بواش دارت قالت  بلي خوها كان ضمن جماعة إرهابية و هددها لوكان ما ديرلوش واش كان حاب  يدبحكم انت و اختك قدام عينيها الوغ  باباك  كي عرف بلي راح نخبر عليها  علابالك واش قالي قالي حصل كلش فيا مانقدرش نحمل انو بناتي يعيشو بلا حنان يماهم عمري ماكنت راح نقبل بهذا الشي حتى درتلو شرط واحد و هو يقبل يزوجني وحدة منكم

انا : كفااااااش واش راك تقول

سي محمود :  باباك كان رافض الفكرة مع الاول امبعد قبلها صدقيني انا عمري ماكنت داير هاذي الفكرة في راسي بصح بسبة يماك خسرت كلش خدمتي مرتي دات ولادي ماعلاباليش للان وين راحت حبيت نحرقلها قلبها كما حرقتلي قلبي
خبيت التسجيل تع يماك و درنا واحد مزور يبين بلي باباك هو لي سرق بعدها حكمو على باباك السجن المؤبد خلص غلطة ماعندو حتى دخل فيها
أما الشاطرة تع يماك واش دارت داتكم و هربت من الدار و بدلت مدينة بصح ماغلطش لي قال غير الجبال مايتلاقاوش سمعت بلي ختك لكبيرة تزوجت الوغ بقيتي غير انت يالشابة وجدي روحك للعرس

* مع كل كلمة كان يقولها كان يطيح مني النص حياتي تقلبت ياربي راني نوم ايه

انا: موحال نقبل نتزوج بيك واش بيك هبلت راك قد بابا

سي محمود : بيبقى قرارك هذا بصح ديري في بالك بلي التسجيل مازالوا عندي و يماك لازم تخلص غلطة تاعها

* دموعي كانو يسيلو كي الويدان ماقدرتش نصدق كلمة قالها واش هاذي المصيبة لي طاحت عليا واش ندير يا ربي علاش انا لي نخلص حتى تفكرت عمتي لي راهي قاعدة معانا و مانطقت حتى كلمة

انا: انت جبتيني هنا خدعتيني و قلتيلو على بلاصتنا

عمتي: اسمحيلي يا نجمة واش جاز علينا ماشي قليل بسبة يماك في جرتها خويا العزيز راح يرشا في الحبس و يما ماتت بحرقة وليدها و حرقة تاعكم لي ما شافتكمش و فوق هذا تاني ناس سماونا عايلة الارهابي .... يعني دمرتلنا حياتنا واش ندير فيها قليل

* نضت من الطابلة علاخاطر ماقدرت نزيد نسمع حتى كلمة واحدوخرا و انا خارجة قالي نخليلك سمانة برك باش تاخذي قرارك

طريق كاملة و انا نبكي و ندعي ربي انو يكون كلشي كذب يا ربي ان شاء الله تقولي ماما مكاش منها الحكاية هاذي ايه علابالي تقولي مكاش منها ماما ماديرهاش و انا نصبر في روحي سمعت تيليفوني يصوني شفت بلي فؤاد رآه يعيط و كلي واحد ضربني بصفعة كي جات في بالي فكرة لوكان منها  صح الحكاية  نطيح بين نارين ماما و حب حياتي كوبيت عليه و طفيت تيليفوني مانقدرش نهضر معاه و انا في حالتي هاذي .............

*************************"*"********

واش رايكم لبنات فالبارتي و فالمصيبة لي طاحت على نجمة في ميزان واش راح يصرا المرة الجاية راح نعرفو سلام زينااااتي