je t'aime à la folie

partie 43

نجمة ______________________________

جازت سمانة بلا ماشفت فؤاد كنت بزاف محتاجة نشوفو علاخاطر نسا لي كانو عندنا غير لي تزيد عليك بهضرتها

قالتلي وحدة منهم : شوفي بنتي راكي وحدة متزوجة مالازمش تغلطي و تخليهم يلعبو بعقلك تخربي دارك

زادت نطقت لوخرا : ايه عندها الحق واش راهي تقول شفت هذاك الطبيب فالجنازة ماخطاكش دقيقة

انا : علاه فالجنازة كنتي تبكي و لا كنت لاتية تعسيني انا و الطبيب عندك عين تبكي و عين تعس ؟

شهرة : هههه والله العظيم

فايزة : نجمة ششششتتت

جاوبتني هاذيك المراه : الجيل تع دوك طايش مايسمعش نحبولو مصلحتو بصح لي في راسو يديرو

انا : تحبيلي مصلحتي ديجا كي راني نكسر في رأسي انت شكون جامي شفتك في حياتي جامي سمعت ماما جبدت عليك من وقتاش حبيتيلي مصلحتي ولا علابالك واش صرالي شفتو غير كي مابعدش عليا و مخكم خمم غير فالسلبيات ماشفتوش كي وقف معانا وقفت الرجال واحد من العائلة ما وقفها معانا

شهرة : ههههههههه صحييييتيي

كي قتلها هكذاك وجهها تبدل و قالت لحبيبتها : نوضي نوضي نروحو هذه الطفلة لسانها ماشي ليها ماشي كامل كما ختها

ناضو راحوا امبعد جات شهرة قعدت قدامي و قاتلي

شهرة : هاااايلة غزيتيلهم كي رجعتيلهم الصرف

فايزة : لالا شهرة ماشي هكذا ماكانش لازم تهدر معاهم هكذاك مهما كان عندهم الحق الناس مايعرفوش حكايتك سي نورمال يخمو هكذا

انا : منا ووالفوق يهضرو و يخمو لي حبوه مايهمنيش يصرا لي يصرا فؤاد مانسمحش فيه

فايزة : هذه الساعة نجمة مازالكي على ذمة راجل واخدوخر و قادر يباصيك و يكذب على لابوليس يقول بلي خانتني و تخرجي انت الغالطة بتهمة الخيانة الزوجية اطلقي منو امبعد ديري واش حبيتي واحد مايحاسبك

كي قاتلي فايزة هكذاك تفكرت بلي مازالني على اسم هذاك الكلب نضت لبيتي نبكي و نخمم كفاش نتهنا منو بلا مانوسخ اسم ماما لحقتني شهرة و قعدت قدامي و قاتلي

شهرة : ماديريش على اختك تحبلك مصلحتك و ماتحملش تسمع الهضرة عليك

انا : عيييت يا شهرة اختي حبيت نغمض عيني و نحلهم نلقا تهنيت منو و من ڨاع المشاكل

شهرة : مابقاش و تتهناي ان شاء الله كوني قوية برك و صابرة

انا : شهرة

شهرة : وييي

انا : ماشفتيش ليوم فؤاد

شهرة : ليوم ماتلاقيتوش بصح ليامات لي فاتو كنت كل مانكون رايحة للدار نلقاه لتحت فطوموبيلتو