قصة هوانا

البارت الحادي عشر

نور:ـ
وصلنا لامتحانات نصف السنة، وبالعطلة اسيا تتزوج، گلبي يريد يتگطع، راح تتزوج اختي الوحيدة وراح اظل وحدي، ماكو من يحجي وياي، صح امي وياي بس ما اگدر اسولف كل السوالف لامي، وخلصنا امتحانات، ورحنا اني وبيت خالتي ام اية لبغداد، نحضر عرس اختي.
ـ اية...مشتاقة اشوف خالتي صارلي هواي ما شايفتها، اريد اشوف اسيا، واسيد همين.
ـ ام اية...ولج لعد اني شكول الي ما شايفة اختي صارلي فترة.
ـ نور...والله حقچ خالة...بس خالة ليش متشوفون بعض الا كل ٣ سنين مرة هاي اذا مو اكثر.
ـ خالة انتي بعدج صغيرة...ومتعرفين بالزواج والمسؤولية...نحنا منكدر انعوف بيوتنا كل شهرين او ثلاثة لمدة اسبوع او اكثر...
ترا يا بنتي الزوج ميقبل زوجته تعوفه لمدة اسبوع كل ٣ شهور... ونحنا منشوف بعضنا هواي حتى ليصير مجال لبيت اهل الزوج يسوون مشاكل ويحجون عالمره ويكولون زوجها ما ضابها، لان نحنا من نتزوج نوهب ارواحنا لزوجنا واولادنا... وهذا الحچي ينطبق على امچ همين...
وبحكم انه حالياً اكو موبايلات ونگدر نحجي وياهم صورة وصوت يعني مثل ميكولون...التواصل الاجتماعي مخفف علينا الاشتياق شوية.
ـ سما...يا يمه والله شلون تگدرون تبعدون عن اهلكم ما ادري...وبالاخص خالتي ام اسيد شلون كدرت تعوف اهلها ومدينتها ما ادري.
ـ اية...سما ترا هاي سنة الحياة.

نور...
من سمعت كلام خالتي عرفت قيمة الزواج، الا وهو تكوين اسرة وبيت، سرحت بفكري واني اتخيل مره دتغسل لاطفالها ومحضره الغدا الزين والبيت نظيف، ويرجع رَجلها تعبان من الشغل وتجيب طشط مي حار وتفرك رجليه...
المراة توهب حياتها وحريتها لخاطر زوجها واطفالها...
والرجل يوهب وقته وشبابه لخاطر زوجته واطفاله...وحتى ميخليهم يعتازون لشخص ويعيشهم بكرامة...بنظري هاي العائلة النموذجية...مثل عائلتنا ومثل امي وابويه...
بس لازم اكو شي مشترك بين الزوج والزوجة...
الا وهو الحب، يعني اذا المرأة ماتحب زوجها ومغصوبة عليه ماتگدر توهب كل هاي الاشياء، ماتگدر توهب الحب لعائلتها، وفاقد الشيء لا يعطيه...
سرحت بتفكيري اكثر، وتخيلت نفسي اني وادم بدال الزوجين الي تخيلتهم، بس اني وادم طرقنا مختلفة، وطرقنا متقاطعة ومتوصل لنفس المكان...
وبالاخص ادم عنده سوالف طايشة مثل الي سمعتها من اسيا...وينرادله مره تتحمل زلاته وهفواته بس اني ما اگدر اتحمل اي شي من هذوله، وبالاخص اني مااسكت عن الظلم ابداً...
قاطعني صوت خالتي...الي جانت تكلي وصلنا المطعم ننزل ناكل ونستراح...

ادم...
مشتاق لنور...ماعرف انه الحب يسوي بالانسان هيج، يحوله من واحد عدل الى واحد ميت...جسد بلا روح...اليوم عرفت من ازهار انه راح تجي نور، كيفت بس بعدين ازهار هبطت معنوياتي كالعادة...مراح تحبك...نور مو الك...نور متريد تشيل مسؤولية...نور بعدها صغيرة...واني الزواج مو بنيتي حالياً...
ولكني اريد اطمأن انه نور الي ومتروح لغيري...

نور...
وصلنا لبغداد...وطبينا للبيت...چان الكل موجود بالبيت...امي، ابوية، اسيد، اسيا...طبعاً شي اكيد ابوية وابو اية راح يگعدون سوية، وكالعادة حديثهم الاول والاخير السياسة...
امي التهت ويا اختها...ونحنا البنات بصفحة، كلنا ندردش سوية، بس اسيد...من شاف اية حولّت عيونه...
جنا واكفين بالمطبخ نحنا البنات وييانا امي وخالتي...
ـ اسيد...مرحبا...يا جماعة.
ـ ام اية...صلوات علنبي والله ماعرفتك...فدوة لهطول وهالجمال.
ـ ام اسيد...تعيشين خييه ربي يحفظلج البنات.
و باوعلنا اسيد نحنا البنات:
ـ اسيد...نور محتاجة شي.
ـ نور...لا ما محتاجه.
ـ اسيد انتو يا بنات....امانة عليكم اذا متگولون.
ـ سما...لا ممحتاجين شي.
ـ اسيد (چان يحجي ويباوع لاية)...امانة عليكم ترا اذا محتاجين شي ومتگولون ترا روحي الكم.
جان اسيد يحجي ويقصد اية بالحجي...وطول ما احنا كاعدين يجي علينا...يحجي ويانا...وكالعادة...يباوع لاية، وبعد يوم جان وكت العصر، وبابا وعمو ابو اية مموجودين طالعين...وخالة مسوية كيك بالككو يخبل...بحيث لمن اكله ما احس انه اني دا اكل كيك...احس روحي دا اكل ككو سائل...
رحت اسوي كبتشينو، والكل گاعدين بالصالة...
وسما نازعة الشال لان اسيد مموجود، بس اية ماكو...احسبها دتغسل او شي...المهم... طبيت للمطبخ سمعت صوت اسيد...بس اني متاكدة انه طالع...رجعت وكفت يم باب المطبخ الخارجي...وهنا تاكدت بالي جنت احس بي...

ـ فدوة اروحلچ اني...ولج اجيتي يمنا يومين تخبلت بيج...هاي اذا تزوجنا شيصير بيا.
-اسيييييد...ترا بعد وگت...
-بعد وگت ايش بطيخ ايش.
-لا حبيبي الله عليك اذا تحبني من صدگ تاجل السالفة بين ما اتخرج، اصلا هاي السنة اتخرج اني.
ـ ماشي اذا تريدين هشكل اني بأمرج.
ـ ما يامر عليك ظالم.
ـ اني لخاطر ايوتة اسوي كلشي...صدگ...اليوم بالثنتين بالليل اخابرچ...لا تنسين.
ـ اوك حبيبي يالله اني افوت لان لا يدورون عليَ...وانت همين يدرون بيك طالع من البيت.
ـ يالله حبيبتي باي.
نور...
من سمعت راح تطب البيت اني وخرت ورحت سويت نفسي عالاساس اسوي الكابتشينو، وبهاي اللحظة تتاكد من احساسي، اسيد واية يحبون بعضهم، ماكو شي يخلينا نمنعهم، الگلب وما يهوى ويحب، بس اذا سوو شي غلط وتعدو حدودهم شي اكيد راح نمنعهم، اذا نحنا ما حضينا بحب ليش نمنع غيرنا من الحب، الحب شي خارج عن السيطرة، شي مثل الادمان، بس الفرق بين الادمان والحب انه الادمان نگدر نعالجه بمصحة بس الحب منگدر نتعالج منه...الا ما رحم ربي...وطبت اية...
ـ ها اية انتي هنا.
ـ ها...اي طلعت شوية للحديقة اتشمس...تدرين هسة الوكت عصر والجو طيب برا.
-اي كلش طيب.
-اساعدچ بشي.
ـ اي بس طلعي المگات.

اللقاء في البارت القادم...
شتتوقعون يصير ويا نور...
ويا ترا گلبها راح يخونها ويخليها تحجي ويا ادم...
لو راح تسوي العكس ومتتبع گلبها؟؟؟؟؟؟؟؟؟
متحمسين للبارت الجاي؟؟
لا تنسون التصويت والتعليق...