قصة هوانا

البارت الثاني

-يالله نور اكعدي وراج مدرسة.
-مممممممم.
-شنو مممم،وج اكعدي للتاخرين.
-كعدت اسيا كعدت.

اليوم كعدت متاخر مادري ليش، يجوز لان البارحة نمت متاخر واليوم لازم اكعد بالستة ونص، المهم رتبت فراشي وغسلت وبدلت اليوم لبست ملابس الدوام لبست صدرية وقميس المدرسة والشال، وترتبت كولش وكمت ادعي ياربي اشوف ادم، مادري شصار بية من شفته البارحة، ما دا اكدر انساه، مادري شنو هذا الشعور، يا تره هذا حب لو شنو؟؟؟؟ معقولة اني احبه....زين وازهار....وتعوذت بالله وطلعت من الغرفة، ورحت للمطبخ، وجانت ماما تسوي بيض بالطاوة، طبعا اني كوبل حطيت ايدي على خشمي وطلعت من المطبخ لان لا البيض يعجبني ولا ريحته تنجرع، رحت طلعت رقائق كورن فليكس و بهاي الاثناء ماما اجتني كالتلي راحت ريحة البيض، وكعدنا نتريك كلنا واجاني الخط ورحت للمدرسة واخذنا دروس شوية ومريت على هذا الحال لمدة اسبوع، وكل يوم اشوف ادم لان يجي يوصل ازهار، مادري ليش هو يوصلها، قابل معدها خط، وكلما اريد اسالها انسى.

بعد اسبوع من الدوام:-

-وج نور والله خايفة من هذا الامتحان.
-ادري هو بعبع تخافين منه؟.
-وج مدا اتذكر شي، شكد البارحة قريت واليوم نسيت.
-وج زهيران هذا اول امتحان كولي يالله.
-يا الله بس والله خايفة.
-لتخافين....كومي دك الجرس لاتجي صبحية تهججنا.
-وج نصي حسج لتسمعنا تدرين بيها اذاناتها درادارات، جنهم اذان الفار.
-يالله كومي ترا الامتحان اول درس لنتاخر.
-يالله كومي.

بيومها جان عدنا امتحان تاريخ، وجانت المادة سهلة والاسئلة جانت بعد اسهل....الاسئلة كولش سهلة ونصدمت وخلص الامتحان ودك الجرس و لمينا الاوراق وجان ازهار دكلي:-
-ولج نوارة شفتي الاسئلة شكد سهلة.
-اي مو كتلج سهلة كولي يا الله وانتي تكليلي خايفة.
-يي والله بصراحة الكل كالولي سهلة بس اني مصدكت، وج حتى البارحة ادم كعد يقريني.
-أ...أ...اد.....ادم؟.
-يي ادم شبيج كمتي تعلسين.
-لامابيه شي.
-وج هذا كلما تشوفينه وجهج ينطي الوان احمر اخضر اصفر، شبيج ولج بس لا تحبينه.
-انلصمي ازهار انلصمي وصيري ادمية....بعدين اكول...شو ادم ديوصلج يومية؟.
-يي ولج سيارة الخط الي نروح بيها عطلانة، وخطية ادم يومية يوديني ويجيبني ويضرب محاظرات علمودي.
-ليش هو بيا كلية؟.
-تربية قسم تاريخ.
-يي ومتشتركين بغير خط، خو الا هذا مجلبين بي.
-وج اهلي ميرضون بغير خط يكولون هذا نعرفه من زمان وولد مؤدب وخلوق، يكولون شهر واحد ادم يوصلج وبعدين يرجع هذا.

وخلصت المدرسة و شفت ادم، اول مشفته حسيت راح ادوخ ويصير بيا شي، بس دعيت من ربي لا اتفشل كدامه، رادت ازهار تصعد بالسيارة وصيحتها من بعيد، وبعدين اجيت يمها ، كتلها:-
-ازهااااااار.
-ها نونو شكو.
-يمكن دفتر العربي يمج.
-لا مو يمي.
-شوفي.
-هسة.....هاااااا، اي هياته.
-اوك، الحمدلله موجود يمج.
-اني مخليته.
-يجوز اسماء حطته وتوهمت بالجنط.
-يييي يجوز.
طبعا كل هذا الحديث جان ادم يمنا ويبواعلنا، وطبعا اني خليت الدفتر بالجنطة مالتها حتى اختلق حديث وياها ويكون ادم يمنا ويبواعلي، حسيت راح اوكع بيدينه، وكبل ما امشي من يمهم باوعتله واني كلني ثقة وكتله:-
-اسفة....اخرتك هواي.
-لا لا لا عادي لتهتمين.....امشي ويانه اوصلج(طبعا جان كلبي راح يوكع من مكانه من كالي هيج).
-لا لا مشكور هياته الخط مالتي....مع السلامة.
-الله وياج.

طول الطريق اني افكر بي، ورجعت للبيت تغديت ونمت شوية ورجعت قريت وماترضى سيرته تنشال من راسي، اووووووووف يربي شلون بلوه، لا اني الي اضمها واسكت وانساه، ولا اني لحاجيه لازهار عنه وتلكالي حل، لا لاااا....عزة شلون احجي غير اتفشل فشلة عمري، بس والله هي دتشك بيا، مرت 3ايام على هالحالة وما اكدر اشيله من راسي، بهاي الايام جنت استدرج ازهار بالحجي علمود اعرف شنو اخبار ادم، وبيوم من الايام مسكت موبايلي وفتت للكوكل وكتبت كيف نعرف اننا واقعين بالحب، وفعلا جان الكلام ينطبق علي حرفيا، واجاني شعور ماعرف شنو هو جنت قلقه وفرحانة بنفس الوكت، ومر اسبوع كامل واني على هاي الحالة ومرة من المرات مسكت الموبايل مالتي ردت افتح يوتيوب وجان يجي بابا ويكلي:-

انتظروني بالبارت القادم وشنو متوقعين راح يصير ويا نور؟  اكتبولي توقعاتكم بالكومنتات ولا تنسون التصويت.