قصة هوانا

البارت التاسع والعشرون

(مرحبا حبايبي شلونكم؟؟؟...
اجيتكم ببارت جديد من روايتي قصة هوانا...
واحب اشكر كل الي ديدعموني وديتفاعلون وياي بروايتي...
ما اطول عليكم...
اعوفكم وي نور...)

#قصة- هوانا.
بقلم:-
#ضي-الدليمي

نور...
الدنيا تجبرنا ندفع ضرائب اعمال غيرنا، مثلي اني، لمن الدنيا جبرتني على انه ابقى عقيمة للابد، بسبب فعل ادم، لمن ما اخذ رأيي بقرار يخصني وحدي...
ولمن الدنيا جبرتني ادفع ضريبة غلطة اسيا الطائشة...
ولمن الدنيا جبرتني ادفع ضريبة الحب، حبي لادم، بس هاي الضريبة جانت من كلبي، الي اتبعته ويا ريتني ما اتبعته...
علاقة زوجية يكسوها الكره، كره كل منا للطرف الاخر، ولكننا نعيش مع بعضنا على قيد التمثيل، لاننا مجبرون على تحسين صورة الحب، وافضل طريقة لتحسين تلك الصورة، هي السكوت، و تحمل اعباء تكذيب مشاعرنا...

بعد خمسة اشهر ونصف...

نور...ادم.

ادم...نعم.

نور...عندي حل لسالفة العقم مالتي.

ادم...شنو هاي كل يوم تجي ابالج فكرة...
اتفضلي احجي.

نور...اسوي زراعة رحم.

ادم...نعم؟.

نور...زراعة رحم، شوف هي متصير بالعراق، مدامنا بامريكا...
اسويها...

ادم...ماشي بس شكد تطلع تكاليف العملية؟.

نور...هي غالية، بي لتهتم، احجي وي امي تبيع الكاع الي عدها بالموصل، واسويها واخلص عاد.

ادم...لأ.

نور...ليش؟.

ادم...كلت ﻷ.

نور...ليش بس فهمني.

ادم...اني شخصيا معندي تكاليف عمليتج.

نور...لااااا، لا ادم، اداين التكاليف من امي، ومن يصير عدنا ارجعهن الها، بعدين احتمال اصلا متعتبرها دين، بالتالي هي كلبها ديحترك عليا.

ادم...بين ميصير عندي تسويها، مو هسة.

نور...لاااا، الله يخليك ادم، اني متاكدة انه امي مراح تعتبرها دين، بعدين انت بس وافق، ويصير خير.

ادم...نور كلت لا يعني لا.

نور...مو جديدة عليك، كلمة ﻷ، اصلا عادي، صرت اتوقع كلشي منك...

ادم...نوووووور، بلا مشاكل ترا مالي خلكج.

نور...يمته صارلك خلك الي.

ادم...نور كافي عاد.

نور... خلاص ساكتة، بس يكون ربي يعدي هالشهرين على خير.

نور...
جنت كاعدة ماسكة اللابتوب مالتي واكلب عالنت، شفت تقرير عن زراعة الرحم، بصراحة عجبتني السالفة، وكلت اجرب احجي وي ادم بكلت يقتنع ويفكني، حجيت وياه، وكالعادة، ﻷ...
ماكو بعد حلول، سلمت امري بيد ربي هو وحدة قادر يريحني من هالطلابه...

ادم...نور نور.

نور...ها.

ادم...ازهار جابت بنية.

نور...شنووووو...

ادم...ازهار جابت بنية...

نور...اوووووووي فدوة الف مبروك، ما ادزلك صورها حباب بلكت اشوفها.

ادم...هسة راح تحجي ويانا فيديو وبعدين ادزهن.

نور...خوش.

نور...
واخيرا سمعت خبر حلو من جيتي لامريكا لحد الان، ازهار جابت بنية، طبعا اني كلش فرحانتلها لان مو بس حماتي، هي صديقتي الي مراح يكررها الزمن قبل متكون حماتي، كلش فرحتلها، ومتشوقة لشوفت البنوتة، تمنيت اني احس بشعور الامومة، تمنيت اعيش حالي حال كل هالاناث هاي، يكون عندي طفل والجنة تحت اقدامي...
حجينا وي ازهار فيديو، وكلش فرحانة جانت و عسى ربي يهنيها ويحفظها  وان شاء الله تشوفها عروسة، عرفت منها انه ممختارين اسم للبنية، ادم كال سميها مريم، بصراحة اني عصبت منه وبعد مسدينا الخط...

نور...ادم ليش كتلها يسمونها مريم.

ادم...واذا.

نور...تعرف انه مريم بنتنا، راح نسميها مريم.

ادم...نور حبيبتي سمعيني...
ترا لازم تقتنعين وتتكيفين وي وضعج، انتي بعد ميصيرلج اطفال، لا ولد ولا بنية، وانتي دتعذبين روحج هيج لمن تشوفين اشياء للاطفال بلسوك وتاخذيها وتكولين لبنتي، ولمن تكولين مريم بنتي، وكذا...
نور...
انتي مرات تفقدين وعيج وتنسين الشي الي صار، اني اريدج تنسين، بس لتنسين انه انتي مراح تصيرين ام، افهمي عاد، مريم مو بنتج مريم بنت ازهار، وكافي ترا تعبتيني ديروح شبابي من وراج،هسة اني شنو ذنبي اظل اقنع بوحدة انه هي بعد متجيب اطفال...

نور...
جرحني، آذاني، كل كلامه جان صح بالنسبة الي، الا الجملتين الاخيرات الي كالهن، قهرني، طبيت للحمام ونزلت جوا الدوش، وظليت ادعي بيني وبين نفسي انه ربي يقدملي الخير واخلص من عذابي...

يتبع...
554 كلمة...