قصة هوانا

البارت التاسع والثلاثون

(مرحبا حبايب كليي
شلونكم
اجيتكم ببارت جديد من الرواية
اتمنى يعجبنكم
حبيت انوه انه مابقى شي ونختم الرواية
بس اريد تفاعل حتى انزل اسرع
ماطول عليكم
اعوفكم وي بطلتنا
الرائعة نور)

#قصة-هوانا
بقلم:-
#ضي-الدليمي

مهند، نور سمعيني زين، وضعنا ما ينحمل، اني موافق على كلشي انتي اختاريتي بنفسج، بس مرضيان عنه، راح اسايرج واهدي لعب وياج، لان اني ادري بكسرة كلبج، وفوك كل هذا احبج، وراح اخلي الايام تثبت حبي الج.

نور، مهند انتَ متاكد؟.

مهند، اي.

نور، مهند اني اشكرك على تفهمك لوضعي ولظرفي، شكرا، شكرا على كل شي.

مهند، ماكو داعي تتشكريني، ماكو شُكر بينا.

نور...
فاجأني بقراره، انصاع لرغباتي، حسيت ربي عوضني بي، تصرفه هذا وياي تصرف رجال مسؤول، يحب من كل كلبه، ميحب على جسد، يحب على الروح، قبل بكلشي اني اختاريته، واذا غيره ميتحمل قراراتي هاي، هاي اول خطوة لدخوله لكلبي، ونجح بيها.

مهند...
بعد طول تفكير، اتخذت قرار، اصبر عليها، لاني احبها، ومقدر وضعها، ماكدر اكللها لا، مو لاني مجنون بيها وكاتل روحي، مثل المراهقين، لا...لاني مقدرها، مقدر وضعها، ومتاكد انه راح يجي يوم وتحبني، وتشيل طليقها من كلبها، وتخليني بداله، بالنسبة الي، هذا هو الحب، مو حب جسد وعلاقات فقط، ولكن حب الروح، حب الداخل، هو هذا الحب، حب الشكل ميسوى شي شي كدام حب الروح.

***

اسيا، حبيبتي نور، اليوم اني وانتي نكتب كلشي محتاجته انتي كبل عرسج، حتى نروح للزوك ونشتري.

نور، لاحبيبي لا، ممحتاجه شي، لتعبين روحج.

اسيا، هاي شنو نور، اولا اني اختج ثاني شي شلون ممحتاجة شي، حبيبتي انتي عروس، ومحتاجة صالون ومكياج وملابس، شنو قابل عجوزة حتتزوج.

نور، حبيبتي عيوني كلبي، كتلج ممحتاجة شي.

اية، نور شهل حجي هذا، عروس ممحتاجة شي؟ لا حبيبتي شنو قابل حتروحين لبيت زوجج، بملابس قديمة.

نور، اه، لاااا، اتفقنا اني ومهند نشتري من الموصل.

اية، والصالون؟.

اسيا، ناخذها ويانا للصالون مو بكيفها.

نور...
مر الوكت بسرعة وعبالك ديركض بينا ركض، ورحنا للصالون اني واية واسيا، وبعد يومين عرسي، او بالاحرى المجهول، مادري شنو وشراح يصير، هل يا تُرى راح اكدر اتهنى بحياتي وابلش صفحة جديدة ويَ مهند ؟؟؟، ولا راح ابقى معندة ومتمسكة بالماضي؟؟؟، اسئلة هواي ابالي، ومن هاي الاسئلة هو نور، بنت مهند، شلون راح تتقبلني، راح تحبني، لو راح تكرهني، زين واذا كرهتني ومحبتني؟ شنو الحل؟ شراح اسوي؟، وزين اذا مهند بردت مشاعرة تجاهي، شراح اسوي؟ راح اتقبل الموضوع، لو راح تنكلب الدنيا راس على عقب؟، محتارة انا، ومظل شي ويودوني لمجهولي، وصار اليوم المنتظر.