قصة هوانا

البارت الثامن

بعد مرور اسبوع:-
نور:-
جنت اباوع للطريق، والسماعات باذاني دا اسمع اغنية الا حبذا، وفجاة دك الموبايل مال بابا:-
ـ الووو، هلا ابو اسيد شلونكم؟.
ـ هلا هلا ام اسيد، الحمد لله وانتو؟.
ـ بخير الحمدلله...اگلك وين وصلتو؟.
ـ بعدنا ببيجي، بعد ساعتين... ساعتين ونص نطب للموصل.
ـ اي خير ان شاء الله بالسلامة...امانة سلمولي على ام اية(خالة نور).
ـ ان شاء الله.
ـ اگلك انطيني نور احچي وياها.
ـ هاچ نور.
ـ نور...هلا يمه شلونچ.
ـ الام...بخير بنتي.
ـ نور...شلونهم اسيد واسيا.
ـ الام...بخير يسلمون عليكم...يمه اكلچ ديري بالچ على روحچ ماما، واتصرفي زين، وبيضي وجهي.
ـ نور...اي يمه ان شاء الله.
ـ الام...اكلچ نور سلميلي على اخواني وخواتي كلهم.
ـ نور...يصل...يصل ان شاء الله.
ـ الام...يالله بنيتي مع السلامة.
ـ نور...مع السلامة.

نحنا حاليا بالطريق نحو الموصل، متحمسة لشوف الموصل، يگولون عنها حلوة، بس ما ادري بعد ما وصلتها...على غفلة اني و دا اسمع الا حبذا اجا ببالي ادم، تذكرته، نسيته كل ذيچ الفترة، وتذكرت ازهار، اكثر شي ضجت منه انه اني راح ابتعد عن ازهار وما اشوفها دائما، بالمناسبة...ازهار طلعلها كلية تربية قسم انگليزي...وهي فرحت كلش لان هي تحب التعليم وتحب الانگليزي بالاخص...تذكرت اسيد...اخوي الوحيد...مسميته عالموبايل فلذة كبدي، ضحكت بگلبي على هذا الاسم...امي تريد تخطبله وتزوجه، بس هو ماريد، يكول بعدني صغير، واسيا ضايجة بدوني...ضليت افكر وافكر الى ان نمت، وسط زحمة تفكيري.

ـ يالله بابا نور...يالله وصلنا.
ـ ممممم.
ـ يالله بابا گومي اصحي.
ـ صحيت...صحيت.
ـ باوعي من الجامة للموصل شوفي شكد حلوة.
ـ اي دا اباوع...صدگ لو گالو ام الربيعين.
ـ بعد عشر دقايق نصل بيت خالتج.
ـ ليش هو بيا منطقة؟.
ـ بـحي الـ(·······).

نور:ـ
وفعلا بعد عشر دقايق وصلنا لبيت خالتي ام اية، وگفت السيارة گدام البيت ونزلنا، دگينا الباب وطلعلنا رجال بعمر ابوية...
ـ هلا...هلا...هلا بابو اسيد...الف هلا....ام اية تعالي وصلو.
ـ بالمهلي اخوية.
وطلعت خالتي وسلمت عليها...طبعا اني ما شايفتها صارلي فترة مو قليلة، ورحبت بينا وسلمنا على بعضنا وسلمت على عمو ابو اية زوج خالتي وهو كلش لطيف وياي حتى گام يسميني كتكوتة، وطلعو بنات ثلاثة...الجبيرة اسمها اية بگت اسيا والوسطانية اسمها سما وهي بگدي، والصغيرة عمرها سبع سنوات اسمها ريم.
ـ سما...هلااااو...هلا بنور اشونكي.
ـ نور...يعني شنو اشونكي؟.
ـ ام اية... يعني شلونچ.
ـ نور...اهااا...زينة وانتي؟.
ـ سما...مليحة.
ـ مدا افتهم على لهجتكم اسفة كلش.
ـ عادي حبيبتي عادي، اصلا يوم بعد يوم راح تتعلمين كلمات مصلاوية لتشيلين هم...وبالنسبة للبنات يحجون وياج بلهجتكم  لان من يشوفونا اني وابوهم ما نحجي وياج مصلاوي همَ همين يكومون يحجون مثلنا.
ـ اية...هلاو ببنت خالتي شلونج.
ـ نور...زينة...انتي تحجين بلهجتنا.
ـ اية...ههه...اي مو انتي تحجين بلهجة بغداد فلازم احجي وياج.
ـ نور...هم زين.
ـ ريم...مرحبا نور...اشونكي.
ـ نور…زينة.
ـ ريم...ماما اغشع هاي ما تحكي مثلنا؟.
ـ ام اية...ريومة لان هي ما مصلاويي فاكيد ما تعغف تحكي مثلنا.
ـ اهاااا...لكن اشون يوم اذا اغيد احكي معاها.
ـ هسة نعلما تحكي مثلنا...لا تخافين.
ـ اي هم مليح.

نور:ـ
بعد يوم ابوية رجع لبغداد واني ضليت هنا يم بيت خالتي، همَ حيل ينحبون ولطيفين، ومرت ايام على هاي الحالة وصارلي يمهم اسبوعين، طبعا صرت اتعلم لهجتهم وصرت زينة بيها، وهمَ همين يحجون وياي بلهجتي، بس ريمة خطية متعرف تحجي وياي الا بالمصلاوي بحكم انه هي صغيرة وما زايره بغداد كبل، صرنا نسهر اني وبنات خالتي سوا، طبعا اني واية بغرفة وسما وريم بغرفة، خطية جانت اية غرفتها وحدها وهما جابولي سرير وجرارات يعني حالي من حالها، اتفقنا اني والبنات على شي جديد، انه يوميا نطلع فلم اجنبي رعب بالساعة ١٢ بالليل ونتفرج عليه، بما انه اني مدمنة افلام اجنبية وبالاخص الرعب، فبيوم من الايام جنا دنباوع لفلم الشعوذة وصار مشهد مرعب وسما گامت تصرخ بعلو صوتها واية هبطت من سمعت صوتها وبلا وعي ضربتها راشدي، بس بهالموقف گمنا نضحك بشكل هستيري، واستمرينا على هاي الحالة وگام عمو احمد زوج خالتي يطلعنا ويودينا ورحنا للغابات وللاسواق، صدگ لو سموها ام الربيعين، تعجبت بالموصل هواي، بمحرد الطلعة لحديقة البيت تتغير نفستي نحو الافضل، وصار الدوام وظلينا نتواصل اني وازهار، وبالنسبة لادم شلته من راسي كليا، وگمت انتبه لدراستي ولجامعتي وكليتي، وبيوم من الايام جنت كاعدة بالحديقة بالجامعة واتصلت على ماما و سمعت خبر كلش حلو عن اسيا:ـ

الى اللقاء في البارت القادم.
لاتنسون التصويت والتعليق💗.