قصة هوانا

البارت الرابع

نور:-
كعدت الصبح وضايجة شوية من كلام اسيا، بس دعيت من ربي تعدي السالفة على خير مو سهلة العيشه ويا شخص يشك بافعال كل الناس الي حواليه....كدرت اعدي السالفة على خير....وحسيت بندم اسيا بدلت وتريكت واجو ازهار وادم وطلعت بالسيارة وسلمت عادي وعالمرة محطيت مكياج بالجنطة ولاحطيت مرطب....اذا فعلا يريد يحبي، خلي يحبني بلا مكياج وضحك، بس من اشوفه كلبي يوكع وطول اليوم افكر بي.

ادم:-
نور صديقة ازهار عجبتني كولش....البارحة حجت وياي هوايا بس متعدت حدودها اليوم طلعت بالسيارة وسلمت سلام بارد كلش، عكس البارحة جانت متلهفة حيل حسيت بيها ضايجة ومع هذا محبيت اسالها خفت لايكون شي خاص بيها ومالي دخل واخجل وياها.

-نور.
-ها.
-بيج شي؟؟؟اشو اليوم مو على بعضج ضايجة؟.
-لا مابيا شي.
-اكيد؟؟؟؟.
-اي خوما اجذب كليج.
-ردودج معاجبتني....انتي مو هيج، تردين وتفصلين بالحجي، اليوم اكيد بيج شي.
-لا ازهار سدي الموضوع.

نور:-
ازهار عرفت انه اني مو على بعضي....ردت احجي وياها...بس شكللها؟ اكللها اختي تخاف علي من اخوج....احسها صدك فشلة، بلعت السالفة وضميتها بكلبي، ورجعت للبيت وهمين نفس الحالة من اشوف ادم كلبي يوكع بين رجليا، مر على هذا الحال 10 ايام، صدمت ومحبيت احجي الي بداخلي، شكول مثلا؟ احب؟احب ادم؟ احب اخو صديقتي؟ احب واني عمري 16 سنة؟ لا لا كلش واكفة، زين المن احجي؟ احجي لاسيا؟ حتى تدفني بارضي؟ وسويني اني صاحية الصوح والذنب؟ لو احجي لازهار؟ اكللها اني احب اخوج؟ لا لا شنو احبه....لا اني مغرمة بي، وضايعة بنظرات عيونه، كلت احسن شي اضم السالفة بكلبي.

-نور.
-هااااااا.
-ووجع كبر حتى كبر، هيج تردين علي واني اختج الاكبر منج؟.
-شتردين؟.
-شبيج؟.
-ما بيا شي انتي شبيج؟.
-لا انتي فعلا مو على بعضج.
-اييييي مو على بعضي، هو هذا الترديه، بس مو على بعضج، اي اي اي اني زعلانة وضايجة.
-شبيج ضايجة من شنو؟.
-تعرفين شنو عيوبكم بهذا البيت؟؟؟؟؟متخلون الواحد يعيش زعله وضوجته لوحده، الا تحاولون تتدخلون لادق تفاصيل مشكلته.

اسيا:-
اليوم اختي مجانت على بعضها....احس بيها شي، ومن يوم الي حجيت وياها علمود ادم متغيره وياي، احسها دتبتعد عني شوية شوية، اني مجان(ما كان) قصدي اضوجها بس هذا كله من خوفي عليها، بس اني جنت اشك بيها معجبة بادم، بس هسة متاكدة، سالت روحي شلون راح اعرف؟ لكيت الحل الوحيد انه احجي ويا ازهار، واجر لسانها بالحجي، بس شلون راح احجي؟؟؟؟؟.

-نور تعالي.
-ها اسيا.
-تعالي اكلج.
-شكو.
روحي ساعدي ماما بالعشة.
-يييي وتعالي وتعالي اكلج كل هذا علمود اساعد امي بالعشة رايحة اصلا بدون متكليلي.
-شوفي هسة انتي متخليني احجي وتاكليني بكشوري.
-تفضلي احجي.
-اريد موبايلج.
-ليش؟.
-تعرفين انه اني معندي ذاكرة بموبايلي ومعندي برنامج سناب تيوب وعجبتني اغنية فجيبي موبايلج احملها وانقلها عندي واسمعها بين ما ارتب الملابس بالكنتور.
-اي بس يشرط.
- شنو هو؟.
-ترتبين كنتوري همين.
-حاضر جيبي الموبايل وانزلي ساعدي ماما.
-هاج اخذي اني نازله.

واخذت موبايل نور وهي نزلت واني استغليت الفرصة ودورت على رقم ازهار بالاسماء ولكيته جانت كاتبه عليه زوزايا وفعلا نقلت الرقم وحفظته وخفت لا نور تكشفني فرحت حملت اغنية، حيالله اغنية ونقلتها عندي وحطيت الموبايل على جربايتها(سريرها) وعزلت الكنتور مالتها الي هو اصلا جان معزل ومرتب بس تريد تضيع وقتي، ونزلت تعشيت ومخليت نور تحس انه اني ماخذه موبايلها بغير شغلة، وكملت العشا ورحت للغرفة وحدي حجيت ويا ازهار بالفايبر.
💬 مرحبا.
💬مراحب منو وياي.
💬اني اسيا اخت نور.
💬اهاااا اهلا وسهلا بيج.
💬شلونج حبي شلون دراستج؟.
💬زينة الحمدلله.
💬الف الحمدلله.
💬هاي اول مرة تحجين وياي خير خوما نور بيها شي؟.
💬لا حبي ما بيها شي بس اريدج بموضوع.
💬تفضلي احجي حبي.
💬بس ما اريد نور تعرف بإلي راح نحجي.
💬ماتعرف ووعد مني.
💬نور صارلها فترة مو على بعضها تشرد هواي ومرات تبتسم على غفلة....البنية خبلتني ومزاجها يتكلب هواي، اكو شي صاير بينج وبينها.
💬وياي نفس الشي، بس مصاير شي بيني وبينها ممتزاعلين.
💬اهااا، حيرتني.
💬والله حتى اني همين.
💬عوفينا من نور، انتي شخبارج؟ اخبار اهلج؟ واخبار اخوج ادم الي يوصلكم؟.
💬زين الحمدلله.
💬نور دائما تحمد بي وتكول خوش ولد.
💬اي حتى هو يكول خوش بنية وحبابة وطول الوكت يسالني عنها(من كالت هيج عرفت انه نور وادم واحد يحب الثاني).
💬الله يحفظه الكم، استرخصج حبي.
💬الله وياج.

عرفت انه نور وادم واحد معجب بالثاني، لازم اخلي اختي تناسه بس شلون؟؟؟؟،شنو الحل ؟؟؟؟ لازم تحجي وياها واصارحها، لازم اكللها انتي بالطريق الغلط، بس اخاف تزعل مني وتكول دتجسسين علي، بس اني اعرف شلون اخلي نور تبتعد عنه، واني ادري بنور تكره الشباب الي يحطون الف وحدة بكلبهم.

نور:-
حبي لادم ديكبر يوم بعد يوم ما اعرف شسوي وشلون انساه، مر على دوامنا بالمدرسة شهر، واني اسال ازهار عنه بس بدون متحس، اخاف من عيوني تفضحني، لحد ما يوم من الايام سمعت اسيا دتحجي عنه ونصدمت من عرفته على حقيقته.
-ولج نونو هذا الي جان يجي عليج ياخذج هو نفسه اخو ازهار؟.
-اي نفسه ليش؟.
-سكتي ماكو داعي احجي.
-ش....ش....شنو شكو؟.
-شبيج نونو ماريد احجي.
-احجي وبعدين انتي منين تعرفيه؟ ومنين شايفته؟.
-تتذكرين من جان يجي عليكم حنت اطلع وياج اروح لصديقتي الي وياي بنفس الخط.
-اي اتذكر.
-جنت اشوفه واعرف شكله كلش زين.
-اي هسة شبي؟.
-ولج والله هذا حيرني ممخلي بنية بالجامعة ميمشي وياها، بزعني كل يوم ويا بنية كاعدين وصوت ضحكهم وكل يوم الزمه ويا وحدة.
-شنووووو؟؟؟؟.
-شبيج نصدمتي عيني، اي ادم فد واحد ساقط، عكس اخته.

من سمعت اسيا دتحجي هيج جمدت بمكاني، مادري شسوي، ركضت للحمام ووكفت جوا الدوش ودموعي نخبطت ويا الماي، هو هذا الي حبيته؟؟؟؟ اوووف يربي ليش اخترت الشخص الغلط، لازم انساه، ومو بعد شوية من هسة لازم انساه، يا ادم يا حقيييير اثاري طلع فد واحد ساقط، بس اني ليش كارهته هيج هو بالاول والتالي ممصارحني بحبه ولا شي، واكول ليش جان يحجي وياي ولازك بيا، اثاري يريدني اصير وحدة من هالبنات الي يريد يضحك عليهم، بس لاااااا....يحلم اكون واحدة منهم.

اسيا:-
الحل الوحيد انه اطلع اشاعة عن ادم، بس اني ادري حرام، بس شسوي، ماكو غير هذا الحل، وماريدها تفوت بمشاكل الها اول وما الها تالي، وبالاخص اختي مراهقة وينضحك عليها بسرعة، الولد حسب ما اعرف حباب ومبي شي، بس هذا الحل الانسب، لازم اسوي كلشي حتى اخليها تكرها، لازم اخليه بعينها الجحيم الاسود، ولازم يوم عن يوم اكرهها بي.

الى اللقاء في البارت القادم.