قصة هوانا

البارت العاشر

نور:ـ
رجعت للبيت وخطية بالي كله يم هذا الولد الي صارت عليه الكهوة، خطية والله بس لا تاذى كلش، حجيت لخالتي عنه ونقرت بس كالت يالله مو مشكلة على كولتها لا يخلو الامر من المصائب، وحجيتلهم همين عن اسيا، وهمَ معزومين اكيد، راح يصير العرس بعطلة نصف السنة، والولد قابل تكمل كلية، واني كلش استغربت على استعجالهم، حسب ما فهمت انه هو الوحيد لاهله، واسمه يزن، وخالتي كلش فرحت لاسيا.

بعد يوم واحد:ـ
ـ السلام عليكم نور شلونج.
ـ وعليكم السلام ورحمة الله مهند انتَ شلونك، شلونه الحرگ خوما قوي.
ـ لا يمعودة گولي يا الله، اصلا خفيف كلش.
ـ اي هم زين والله البارحة كله ظل بالي يمك...انا صدك اسفة.
ـ ما صار شي.

مهند:ـ
جنت دا امشي وقابلت نور، وحجيت وياها وسالتني عن الحرگ وگتلها خفيف، هو قوي اصلا مو خفيف، بس علمود نور مستعد مو بس احترگ بالگهوة، مستعد امشي عالجمر حافي، تعمدت كلما احجي وياها ما اكللها اختي، لان ما اريدها تكون مثل اختي، اريدها تكون زوجة الي ومن نصيبي، بس شلون بيها تگلي اخوية، لو عليَ من تكول اخوي اكللها لا ناديني باسمي، اني مو اخوج...ولا راح اصير

نور:ـ
جنت كالعدة بالحديقة اراجع شوية بالملزمة واجتي اثنين بنات كعدن يمي وبصراحة اني ضجت كلش حجو وياي وكالولي:ـ

ـ تسنيم...هلاو يابنت اشونكي.
ـ نور...مرحبا اهلا...منو حضرتجن؟.
ـ تسنيم...اني تسنيم.
ـ مها...واني مها.
ـ نور...اي.
ـ مها...لهجتكي ما مال وحدي من الموصل.
ـ نور...اني من بغداد.
ـ تسنيم...هلا بيكي هلا...نورت الموصل والله، اش تحتاجين شي نحنا كلتنا هوني اخوتكي وخواتكي امانة الله لا تستحين.
ـ مها...ولي تسنيم البنت ما تفتهم مصلاوي احكي معاها بلهجتم.
ـ تسنيم...اي والله تمام...بس هسة نعلما تحكي مصلاوي قحي.
ـ مها...عوما نحنا ردنا نتعرف عليج ونصير ثلاثتنا صديقات.
ـ نور...(من سمعت بيهم كالو يريدون يصيرون صديقاتي استغفرت ربي شلون ظنيت بيهم ظن السوء چان حسبالي يريدون يگعدون يسمعوني حجي ويتسخفون براسي، لان صارت وياي قبل ثلاثة ايام، كلت بيني وبين نفسي الحمدلله اجوني صديقات لان ماعندي ولا وحدة هنا وياي بالكلية وبنفس القسم)...اهااا اهلا بنات...اسفة حجيت وياكم بخشونة اسأت الظن بيكم حسبالي مثل البنات الي حجو وياي ذاك اليوم، عموما اني نور.
ـ تسنيم...ياهلا بنور...يا هلا.
ـ مها...الف هلا بيج.
ـ نور...بالمهلي وردايات.

نور:ـ
طلعو هذولي البنات كلش حبابات عكس ما توقعت، تعرفت عليهم ومشت الايام ركض ولا درينا بيها، وظليت وياهم، صارلنا شهر ونص من داومنا، واني كلش فرحانا وياهم، احس من جيت هنا للموصل تعلمت اعتمد على روحي، وبديت اكوّن صداقات، ودرجاتي كلش زينة، وتعلمت على بيت خالتي وصرت اروح وياهم ازور كرايب ماما، وحسيت الحياة هنا كلش حلوة....بالنسبة لازهار فأنا يوميا احجي وياها، وظلينا صديقات، مرات گلبي يحاول يخوني ويريدني اسال عن ادم، بس ما انصاع لقرارات گلبي الطايشة، احاول اخلي الفوز لعقلي، احس عقلي وگلبي بتحدي وحرب، وانا الشخص البريء الواگع بنصهم، بس لا...مستحيل اخلي گلبي سيد الموقف، لان اذا مشيت ورا قرارات گلبي راح اتندم، والندم ما ينفع بعد فوات الاوان.