الا حبذا...حبذا...حبذا...
حبيبٌ تحملتُ منهُ الاذى...
الا حبذا...حبذا...حبذا...
حبيبٌ تحملتُ منهُ الاذى...
بنفسيَ مَن اشتكي حُبَهُ...
ومن ان شكى الحُبَ لم يكذبِ...
ومن لا ابالي رضا غيرهِ...
اذا هو سُرَ ولم يغضَبِ...
الا حبذا...حبذا...حبذا...
حبيبٌ تحملتُ مِنهُ الاذى...
الا حبذا...حبذا...حبذا...
حبيبٌ تحملتُ مِنهُ الاذى...
-ياربي شگد احب هاي الاغنية، عبالك ماكو اغنية غيرها.
(اندگ الباب).
-يالله نور، يالله يمة اگعدي.
-فوتي ماما فوتي، اصلا اني گاعة من الخمسة الصبح.
-گالو اول يوم دوام الج بالخامس، بس مو هيچ تصحين من الخمسة.
-لا مو بس علمود الدوام بس مَإجاني نوم.
-اهوووووو...هاي همين اغنية الا حبذا، كل يوم تگعدين من الصبح تسمعيها، صارت روتينچ الصباحي.
-(ضحكت على كلام امي) اي يمة احبها، احس راح تصيري قصة وياها، بس مادري شنو هي.
-ادري هسة الناس تگعد من الصبح تسمع فيروز، انتي تسمعليلي الا حبذا، على كل شسوي مخلفة بنية مثلج، يالله يالله استعجلي للتاخرين عالخط.
اعرفكم بنفسي:-
اني نور، طالبة خامس ادبي، واليوم اول يوم دوام الي بهاي السنة، طبعا اني ماحب العلمي، لان اني ماحب الفيزياء والكيمياء، واميل للحفظ اكثر، اني عندي اخ واحد اسمة اسيد، واخت وحدة اسمها اسيا، واني الصغيرة، وبعد كم شهر افوت بالـ ١٧، من ناحية الجمال فاني جمالي عادي، لاحلوة حلوة حلوة، ولا العب النفس، باختصار طبيعية.
-يمةةةةةةة، وين قميصي الاسود؟.
ـ بكنتورك، بغرفتك، اسيد تره انت صرت رجال، ولك صرت سنة ثالثة بكلية الهندسة، وبعدك اطشر غراضك.
ـ اييي يمة، راح ارتب غراضي منا وجاي.
-صوت ثالث:- هههههههههه ولك اسيد ضحكتني هوايا، هاي كل يوم نسمع هالكليشة.
ـ انتي انطمي رجاءا، ما الج دخل.
ـ بسسسسسسسس، اسيا...اسيد، بس اسكتو كااااافي.
نزلت من الدرج واني اسمع صوت اسيا واسيد يتعاركون، وامي كالعادة تهدي بيهم، بزعووو عيشتي، بس صدگ اني احبهم، لا لا اموت عليهم، عندي اختي اسيا هاي اول سنة الها بالكلية، نقبلت تربية رياضية، واني وهي مشتركين بنفس الغرفة بس هي تگعد من النوم گبلي فولهذا ماخذا راحتي باغنية الا حبذا، اجيت افوت للمطبخ سمعت صوت بابا وراي يصبح عليَّ.
- صباح النور يا نور كلبي.
- هههههه.صباح الخير يا بابا يا بعد عيني.
-اسيد:- وج نور انتي شكد لوكية.
-ماكو الوك منك يا مبهدل.
- انطمي احسنلج.
-ابو اسيد:-ولكم والله مو مال الواحد يكعد وياكم، اريد اطلع...اطفر...اهج منكم...اروح على شغلي.
- يمعود ابو اسيد عوفك منم، خلي يولون.
- هو هم هيج...واني شلية غيرهم.
-اسيا:-اروح فدوة لابوية، مايزعل علينا.
-الاب:-اكول اسيا، شنو متحمسة للدوام بالجامعة والحياة الجامعية.
-اسيا:- والله بابا بصراحة اني كولش متحمسة للدوام، حتى اكثر مما تتخيلون.
-نور:-اووووووف اشوكت اخلص واروح جامعة وافوت كلية قانون واحقق حلمي.
-الاب:-ان شاء الله بنيتي...ان شاء الله ترفعين راسنا بالعالي.
-الام:- نور يالله كومي اجاج الخط، لتنسين تسلميلنا على ازهار.
-اي يمة يصل ان شاء الله.
ورحت للمدرسة واني الطريق كله افكر بصديقاتي، وبالاخص ازهار، طبعا نسيت احجيكلم عنها، مراح احجي هواي لان يمكن ميكفي اذا اكوللكم هي اختي الماجابتها امي، وامي تعرف امها لان بيوم من الايام تمرضت واجت زارتني هي وامها، وهي دائما تجيني واني دائما اروحلها، طبعا اني اليوم لبست ملابس مخالفة يعني مو مال مدرسة لان تدرون اول يوم دوام يكون تمسلت بتمسلت، ووصلت للمدرسة وكبل ما اطب يعني بعدني بالشارع شفت ازهار صاعدة بسيارة من كدام والسايق ولد كولش حلو، فنزلت من السيارة وما احجيكم عن لقائي وياها شكد جان حلو، تصولو نحنا كمنا نتحاضن بالشارع😂، وفجاة سمعت صوت شاب وراي ديكول:-
-حبيبتي زهورة، من تكملين مدرسة خابريني اجي عليج مدام الموبايل يمج اليوم.
-اي ادومي ان شاء الله.
وعافنا وراح واني عيوني ما انزاحن من عنه لحد ما طلع من شارع المدرسة، ونحنا طبينا لجوة المدرسة.
-وج نوارة طالعة اليوم تخبلين، ما عرفتج.
-ههه...ولج انتي الي تخبلين.
-اووووووي فدوة لتخجليني😊.
-يمة فديت اليخجل....اكول منو هذا الوصلج؟.
-ولج شبيتج ثولة هذا ادم اخوي....معجبة بي صح؟.
-انطمي ازهار....انطمي.
-اكلج يالله خلي نفوت، دك الجرس، وسمعت ست علياء راح ادرسنا جغرافية.
-اوووووووووووي عوع منها....امشي امشي لايكون الدرس الاول جغرافية ونتاخر وماتطببنا للصف.
وخلص اول يوم دوام وكلش جان حلو لان ولا درس فاتولنا، هو هيج اول يوم دوام بالعراق، رجعت للبيت كلش تعبانة، اول مطبيت باوعت لكيت ماما تدسوي غدا، اخخخخخخخخخ يايمة على طبخج، واليوم جانت مسوية كبة موصل، هي طبخها ولا اطيب منه لان هي مصلاوية، سلمت عليها وبوستها، وسالتني عن يومي شلون جان، حجيتلها عنه ومنو الي راح يدرسونا، المهم ورا ما خلصت طلعت فوك طلعتلي تراك وغسلت وبدلت، جان تجي اسيا وخبصتني بالكلية مالتها، وكولش فرحتلها خطية، ووراها بعشر دقايق اجا اسيد ووراه بربع ساعة اجا بابا. ورحنا اني واسيا للمطبخ نساعد امي بتحظير الغدا، وتغدينا وطلعت لغرفتنا ونمت، وكعدت بالخمسة ونص العصر، غسلت وجهي وسويت جاي، بهذا الوكت بابا يطلع من البيت، يروح لاصدقاءه او فد مكان واسيد همين ميظل بالبيت يطلعون هو واصدقاءه اما للكافتيريا او للملعب يلعبون طوبه او مايرحون بمكان يتجمعون عد واحد ويسولفون، بعد هاي حياة الشباب، المهم، صار الجاي وماما جانت مسوية كاستر وعدنا بقلاوة، فكعدنا نحلي اني وماما واسيا، وكضى الوكت وصار وكت العشا ورجع بابا واسيد وتعشينا وحضرت جدولي مال باجر، وكعدنا اني واسيا نغلف الكتب مالتي بالغلاف الحراري وطلعنا فلم اجنبي على mbc2 مال توم كروز بدبي اسمه المهمة المستحيلة، وصارت 12 بالليل وكلمن راح لفراشه.
تعليق+ تصويت بليييييز.
انتظروني بالبارت القادم.....
وباااااااي.
أنت تقرأ
قصة هوانا
Romanceنشعر بأن الحياة تصنع لنا ما نريد، وبعدها نكتشف العكس. نحب بجنون، ونشعر بأننا سكنا قلوب من نحب، وبعدها نكتشف العكس. نصل الى نهاية صبرنا، ونشعر بأن الحياة قد اغلقت ابوابها بوجوهنا، وبعدها نكتشف العكس. ويبقى السؤال....هل القادم اجمل؟....هل نستطيع ان نج...
