MARAICIN 'YA MACE

BABI NA ASHIRIN

MARAICIN 'YA MACE

Rubutawa
Phirdaucee Jeeboh

NAGARTA WRITERS ASSOCIATION

BABI NA ASHIRIN

Kwankwasa gate ake yi, mai gadi ne ya lek'o dan ganin waye ke kwankwasa masu gate da farar safiya, ganin Kawu Aliyu yasa ya bud'e mashi k'ofa yana washe mashi baki, shiga Kawu ya yi a mutunce suka gaisa da mai gadi.

"Hajiyar na ciki?"
Kawu Ali ke tambayar mai gadi.
"Eh tana nan."
"Jeka ce mata ina san ganinta."
"Ka shigo daga ciki mana."
"Karka damu kaje ka gaya mata."

Wuce wa mai gadi ya yi cikin gida, parlor ya had'u da Falmata.
"Yauwa Falmata jeki gaya ma hajiya ga Kawu Ali nan yazo nemanta."

Wuce wa Falmata tayi d'akin Mummy, sallama tayi amsa mata akayi da ta shiga, tana shiga ta tsugunna.
"Hajiya dama Mai gadi ne yace kawu Ali yana san ganinki."

Cikin mamaki Mummy ta kalleta.
"Mi Ali yazo yi gidannan?."

Rashin samun amsa yasa tace mata
"Kice ya kai shi babban parlor gani nan zuwa."

Tashi Falmata tayi, tunani Mummy ta shiga yi
"Miya kawo Ali gidannan? Kodai Nafeesah ta fad'a mashi halin da muke ciki? An ya Nafeesah zata iya fad'a mashi."

Rashin samun amsa yasa ta tashi ta d'auki gyalenta ta nufi hanyar fita

Babban parlour ta iske kawu Ali tsaye, ganin da ta mashi yasa gaba d'aya zuciyarta ta tsinke.
"Malam Ali ka zauna mana."

Zama ya yi ba tare da ya kalli in da take ba, wuri ta samu nesa dashi ta zauna.
"Ina kwana malam Ali?"
"Lafiya"
Ya amsa a tak'aice, zaman shi ya gyara yana fuskantar ta.
"Nasan zakiyi mamakin zuwana gidanki ko? To ba abun mamaki bane ba, nazo ne na jaddada maki yaranki muke iko dasu bake ba."
"Malam ban fahimci maganarka ba ya kamata ka fad'an miye ka zo dashi."

Zama ya gyara ya saki wani murmushi wanda shine kawai yasan ma'anarshi, ganin irin murmushin da ya yi yasa gabanta ya fad'i.

"Ada kinyi galaba akanmu kin aura ma yaranki wanda kike so ba tare da izinin mu ba, to a yanzu ba zaki ci wannan galabar ba, ni Malam Aliyu na zab'a ma Nafeesah mijin da zata aura kuma ba wani bane ba illa Habeeb Nafeesah bata da mijin da ya wuce Habeeb nayi bincike na gane mutumin kwarai ne dan haka Nafeesa zata auri Habeeb in shaa Allah."

A zabure ta kalleshi.
"Kasan mi kake shirin yi? To wallahi baka isa ba Nafeesah ba zata auri talaka ba bazan tab'a had'a zuri'a da talaka ba."

Murmushi ya yi ya k'are mata kallo sama da k'asa.
"Zamu gani mu da ke wanda ke da iko dasu, ke har kina da bakin da zaki kyamaci talaka? Ko kin manta daga in da kika fito? Dama can da kika ga muna d'aga maki ba wai dan muna tsoro bane ba kawai dan azauna lafiya, amma yanzu tun da yarinya ta kawo wanda take so kin ce ba zata aure shi ba to ki sani wallahi baki isa ki hana wannan auren ba. Magana ta k'arshe kuma zan saka auren Nafeesah nan da wata biyu in shaa Allah masu zuwa."

Yana gama fad'in haka ya zaro wayarshi ya danna, kira ringing biyu aka d'auka.

"Kizo parlour bak'i in san ganinki."

Jim kad'an Nafeesah ta shigo parlour da sallama, wuri ta samu ta zauna tare da gaida Malam Ali, amsawa ya yi cikin sakin fuska.
"Kice ma Habeeb yaje gobe ina san ganinshi."