عمك المك ميرغني قال للبشرى .. والله يا البشرى بتك عجبتني بلحيل .. ياخي والله انا ندمتني على كليماتي القلتهن ليك .. والله الكلمة الجات قالتها لي بالرضا دي.. انا فاقدها من بناتي ..
وعاينت لها البارح العصر .. جاية تشيل موية بالجردل من الماسورة .. والله الساعة العاينت لي كدي وبسمت معاي ..حسيت بيها اقرب لي من بناتي ..
يا البشرى اخوي بتك دي نعمة حرررم .. اها انا داير اتكلم مع عمر ولدي .. لكن ما ادس عليك عمر مسوي لو قصة مع بت خالو الامين .. الصغيرة ..والحقيقة انا ناس الامين كلهن مون عاجبني ..
لكن طبعا مابقدر اعترض عليهو .. اربي لي عدواوة وكراهية مع عمر ومع امو ..
لكن اكان قدرنا انا وانت . نلم عمر ولدي وثويبة بتك بكون ده حققت مناي في الدنيا ..
البشرى قال ليهو.. والله يا ميرغني اخوي ده يوم السعد .. لكن طبعا الولد والبت ليهن اختياراتهم ..
قالو انا عارف .. انت قايلني جاهل؟.. . انا عارف انو البت لو جبروها على زول ..العرس بكون باطل ..
بس انت يا البشرى حاول انضم مع البنيه .. وانابنضم مع عمر والبسويهو الله كلو نحن راضين بيه.
البشرى قاليهو انا داير شنو غير بتي تكون في بيتك ومع ولدك . انا زاتي ده مناي ..
وانا بوعدك ياميرغني اخوي اعمل كل مافي وسعي ..
والبشرى وصل الجماعة الزلط.. وطلب ليهم امجاد توصلن الموقف بتاع الباصات ..
وودعهم ورجع .. وطول الطريق من الزلط لي بيتو .. كان بفكر في كلام البشرى وبالو مشغول ..
وهو عارف مرت ميرغني واخلاقها الصعبة .. وعارف انو صعب على ثويبة تسكن في البلد ..
وكمان صعب انو عمر يسكن في الخرطوم .. وصعب انو زينب تتقبل الموضوع ده من اساسو ..
لكن كونو ثويبة تكون في بيت عمها ميرغني . دي اضمن حاجة .. اها ياربي تهدينا للحق والصواب . والحكاية جاطت في راسو شديد ..
وقال انا هسي مابتكلم مع ثويبة لامن ادور الموضوع في راسي كويس ..الصباح بهرج والدنيا فتحت .. وثويبة قامت ولبست اخوها وسريع سقتو الشاي .. وجهزت ليهو مويتو في الزمزمية ..
وساقتو وطلعت تغشيهو المدرسة وتطلع على الشركة ..
اول ما دخلتو وطلعت من المدرسة عشان تركب على الشركة لقت .. عامر واقف قدام باب المدرسة بي عربيتو ..
استغربت جدا" وقالت .. الزول ده حيعمل لي موضوع .. وانا الليلة لازم اقطعو معاهو ..
جات ماشة زي الماشايفة العربية .. هو دور طوالي وجا واقف قصادا كدا ونزل القزاز وقال ليهو ثويبة .. ارح اركبي الزمن اتاخر انا منتظرك ..
قربت من العربية وقالت ليهو معليش ياعامر اعذرني انا عندي رغبة اركب المواصلات..
انا اسفة والله مابقدر .. وعليك الله ماتاخد في خاطرك مني ..
وما انتظرت ردو طوالي مشت ..
عامر ده زعل طبعا واتحمق شديد . واستغرب انها هي امس ركبت معاهو ..طيب الليلة الحصل شنو؟
وشخخخخ فحط بالعربية ..لامن ملا الحتة غبار ولف كدا .. ومشى ..
ثويبة خافت انو الزول ده يعمل ليها مشكلة او يطردها من الشغل ..
لكن كانت مصممة انها ما ممكن تركب معاهو وتخلي الناس ينضمو فيها.. .. لانها المرة الفاتت عرفت انو الناس اتكلمو في ركبتها معاهو ..بدليل كلام قرشي ..
المهم ثويبة طيلة الطريق للشركة كانت .. متوترة وخايفة من نتيجة رفضها ده ..
لمن جات الشركة لقت الشركة دي كلها متوترة ..واي زول مكبس في شغلو ومرة مرة بعاينو لي بعض ..
عرفت انو في حاجة حاصلة ..
سلمت ودخلت مكتبها .. لقت قرشي يادوب جا ..وهي جات متأخرة زي عشرة دقايق من الزمن المحدد ..
سلمت على قرشي ..
قال ليها الليلة الزول ده جاط الشركة وشاكل ليهو تلاتة موظفين بدون سبب .. وجا على غير العادة في غير مواعيدو .. وقال والله تاني زول يتاخر من الزمن اوريهو النجم بالنهار ..
طبعا" هنا ثويبة ازداد خوفها من الجاي ..
اول ما طلعت ملفاتها ..وقرشي مدا ليها كم فاتورة كدا.. ومعاها تفاصيل ومستندات .. تبع الشغل ..
جا واحد من العمال .. قال ثويبة مطلوبة في مكتب المدير ..
ثوبة سريع قامت طلعت مشت للمدير .. اللهو سيادتو عامر .. لقتو براهو قاعد وزعلان ومتوتر ..
لامن بتهوزز في الكرسي ..
قالت السلام عليكم ..
قال ليها عليكم السلام .. اسمعي يا بت ..انا التاخير ده مابنفع معاي .. بعدين كونك تطلعي خبر في الشركة.. انك عندك علاقة معاي..ده ما بخليك تهملي في شغلك ..
قالت ليهو انا؟؟
طلعت خبر ؟؟ زي ده ؟ سبحان الله.. والله ياعامر ده ماحصل .. وريني القال ليك منو؟
واجهني بيهو .. قال ليها .. مابقول ليك ..
انتي المرة الفاتت ركبتي معاي في العربية ؟ والليلة عملتي فيها تقيلة.. ممكن اعرف السبب ..؟
قالت ليهو بس المفروض الحاجة دي.. تأكد ليك اني انا ماقلت كدا ..
لاني لو فعلا طلعت خبر زي ده ..المفروض افرح لمن تقول لي اركبي .. واكون مبسوطة ..وناس الشركة يشوفوني نازلة معاك .. عشان كدا حيصدقو الخبر ..صح ولالا؟؟
قال ليها ثويبة الله يخليك ما تعملي لي طشيش في مخي.. انتي قصتك شنو؟..
قالت ليهو وريني انت .. انا الماقادرة افهم حاجة .. والله ..
قال ليها بس انتي بتمشي تعملي لي مشكلة .. قالت ليهو ابدا والله ..
قال ليها .. امبارح دليا جاتك في المكتب؟
.. قالت ليهو نعم ..
قال ليها وقلت ليها نكون اصحاب عشان في حاجات في الشركة مافاهماها ؟
قالت ليهو نعم ..
قال ليها زي شنو المافاهماهو ..
قالت ليهو كدي ياعامر كمل لي الكلام .. داليا قالت ليك شنو؟
قال ليها داليا اتصلت علي هسي وانا في الشارع بعد ما فت من عندك وخليتك جنب المدرسة
وقالت هي امبارح جاتك في المكتب وانتي قلتي ليها ..
ماقادرة تفهمي عامر مع انو بحبك وعايز يعمل معاك علاقة ..
وقالت انتي بتحبيني شديد وعايزة العلاقة تستملر لكن عايزة تعملي غلاوة ..
ثويبة قالت ليهو .. طيب ياعامر . انت بتصدقني ولاأحلف ليك ؟؟
قال ليها .. بصدقك قالت ليهو والله أنا ماقلت ليها كلام زي ده ..
ولا كان في فرصة عشان اقول ده كلو .. وانا والله مابفكر فيك غير انك المدير وبس ..
وابيت اركب معاك لانو امبارح سمعت كلامات في الشركة عن ركوبي معاك ..
فرفضت الليلة عشان ما اجيب ليك كلامات واجيب لروحي وانا في اول ايام ..
لكن والله داليا كذبت عليك .. وانا مستعدة اعمل معاها مواجهة ..
عامر سكت ساااااي .. وقال ليها لالا مافي داعي انتي اتعاملي معاها عادي وزي الماوصلك كلام شوفي تاني عايزة تتصرف كيف وحتقول ليك شنو؟
قالت ليهو معليش انا طبعا لايمكن انقل ليك الكلام البتقولو لي .. دي فتنة صح ؟
انا لازم ابعد منها وبس ..
قال ليها والله ياثويبة انا مازول كعب ولا بتاع بنات .. حتى لو هم اتكلمو عني كدا .. هم مابعرفو عني حاجة ومافي زول بقدر يثبت علي اي حاجة اناب بتحداهم ..
كلها اتهامات فاضية .. انا ماعايزك تشكي فيني لمجرد الظن ..
قالت ليهو .. طيب ممكن اسألك سؤال ؟ قال ليها اتفضلي .. قالت ليهو انت داليا . البخليها تقول ليك كلام زي ده شنو؟
يعني بينكم علاقة غير الشغل ؟ قال ليها دي قصة طويلة ..انسي هسي امشي على شغلك ..
قالت ليهو حاضر بس . انا طالبة منك طلب تاني ..
عليك الله ياعامر تاني ماتطلب مني اركب معاك انا ما بحب احرجك انت انسان طيب ومابتستاهل كسر الخاطر ..
ثويبة بقت مافاهمة ايحاجة من البيحصل ده .. وخصوصا الصدمة العرفتها في شخصية داليا ..
وطيف اتقربت ليها .. وهي ناوية تدمرها ..
قال ليها قبل ماتمشي عايز اسألك .. منو الاتكلم امبارح في الشركة عنك .. قولي لي .. قالت ليهو والله ماعارفة بس سمعت كلام ماياهو ..
قال ليها يعني ماحتقولي لي .. قالت ليهو انت براك لو سألت بتعرف ..
قال ليها اسأل منو ..؟ قالت اصدق زول في الشركة .. قال ليها مافي غير قرشي وسوزان .. الباقين كلهم كلهم كلاب ..
قالت ليهو سوزان ياتها .. قالت ليهو سوزان البت بتاعة الكمبيوتر ..
قالت ليهو مابعرفها والله ..
قال ليها اتعرفي بيها دي بت ممتازة .. قالت ليهو الله يكرمك يا استاذ وطلعت ..
وهي طالعة كدا قابلت .داليا داخلة لي جوة .. سلمت عليها كيفك يا داليا اصبحتي كيف؟
قالت ليها كويسة الحمد لله ..
كدي زحي لي كدا من الطريق ..
زحت ليها كدا و قالت ليها اتفضلي يا داليا .. وطبعا عامر بعاين ومراقب الدرامة دي..
قال ليها تعالي راجعة ياثويبة ..
الى اللقاء ..
