طبعا دالية اتفاجأت بدخول عامر العشوائي جدا .. وثويبة شكلها زعلت من عامر .. ولاشنو ماعارف .. قامت قالت ليها دالية خلاص عن اذنك انا ماشة ..
وماردت على عامر سؤالو .. بقت ثويبة طالعة وعامر خاشي ..
طبعا ثويبة طوالي مشت على البيت ..
وعامر وقف في خشم الباب بتاع المخزن .. دالية قالت ليهو انت لسه ياعامر شاكي فيني ..؟
انا والله ماشة الصحافة لي بت خالتي الليلة سمايتها ..
وحتى كمان بلاقي امي هناك .. ولو مامصدق ارح وصلني وشوف براك ..
قال ليها انتي عارفة انا اصلا زمان ماشكيت فيك لمجرد ظنون .. اناشفت بعيوني رسايلك معاهو ..
وكيف كنتي بتتكلمي معاهو عني انا بالذات ..اعملي البريحك يا دالية ..
المهم خلاها ومشى ..وطلع على البيت ..
بعد وصل البيت واخد ليهو شوية انجمامة كدا .. واستحم ومنتظر الغدا .
وفكرو شغال في ثويبة .. وطبايعها وحاجاتها الغريبة .. مرة يقول البت دي ملايكة .. ومرة يقول البت دي هبلة .. وحتدخلني تاني في دالية ودوامة مشاكلها المابتنتهي ..
وبدا يتخيل في شكلهم وهم بتكلمو مع بعض .. وكيف دالية ارتبكت لمن هو قال لي ثويبة اساليها ماشة الصحافة لشنو؟ .. وطبعا قبيل راودو الشك انو دالية بتكذب ..
لكن مشى ليها الموضوع.. اها البقنع ثويبة منو انو داليا حياتها كذب ومراوغه ..
دي كلها افكار وخواطر جايلة في في مخ عامر ..
يازول فرترب قام علي حيلو.. وسريع لبس وغير .. ودور العربية واتوجه على بيت ناس دالية ..
ولقى عمي الامين وسلم عليهو .. وحق الله بق الله ..
عامر قال ليهو ياعم الامين.. انا فجأة كدا قررت اجي اتغدا معاك .. لاني اشتقت ليك والمشغوليات ما .. مخلية لي وكت عشان ازورك بشكل منتظم ..
وين خالتي؟ .. قال ليهو جوة .. طبعا" زي ماكان متوقع لافي سماية ولاغيرو ..والام القالت دالية تلاقيها في الصحافة قاعدة في بيتها تسوي في غداها ..
وكلعادة دالية بتكذب .. ولمن عامر سأل امها .. قالها دالية ما وصلت ؟؟ ..قالت ليهو دالية .. الصباح قالت بتتاخر في الشركة .. لغاية المساء كدا .. عندها جرد في وحسابات .. وحاجات كدي قالتن انا مابعرف شغلكم ده ياعامر ..
قال ليها ياخالتي دالية طلعت من الشركة يمكن قبل ساعة ونص ..
وقالت ماشة الصحافة .. البت دي ياخالتي بتكذب .. وانتو لازم تختو بالكم ليها .. قاعدة تمشي وين .
وانا بس ماعايز اقول لعم الامين .. هو طبعا عيان والحكاية الزي دي ممكن تأثر عليهو ..
امها مسكينة وطيبة قالت ليهو خلاص .. انا بتكلم معاها ..
هنا عامر اتاكد بما لايدع مجال للشك انو دالية مازالت على علاقة بالود القيافة الساكن الصحافة ..
وبقى متضايق من الجهود العايزة تقوم بيها ثويبة ..
ولمتين يجي الصباح عشان يكلم ثويبة .. بالحربوية دي ..
اها يازول ..باختصار باكر الصباح طوالي نادى ثويبة .. في المكتب .. وحكى ليها الحاصل ..
ثويبة قالت ليهو بس انت اصبر ياخي .. اديني فرصة ..
انت كدا ما اديتني اي فرصة .. المواعيد بتاعة الصحافة دي كانت ماخداها قبل ما الاقيها انا ..
انت ماواثق فيني ؟؟ كدي انت اصبر بس ..
وعامر ماعايز يغلط على ثويبة .. ويثبت ليها انو هو كعب .. وماعايزها تمشي في الطريق ده ..
وحاسي انو ثويبة حتضره اكتر مماتنفعو ..
لكن هو طبعا بريد ثويبة شديد وبخجل يرفض ليها طلب ..
اها طبعا امس بعد ماجات دالية البيت من مشوارها داك .. امها شاكلتها . وورتها انو عامر جاء هنا وقال وقال ..
اها يازول دالية طبعا الليلة جات الشركة .. واصلا ما ظهرت بس مكرنة في المخزن ..
وماعايزة تلاقي عامر ..
في المكتب ثويبة قالت لي قرشي ..عليك الله اتصل على دالية واديني ليها ..
.. قالت ليها اسمعي يا دالية .. انا اللية شغلي كتير وباكر الجمعة .. يعني رايك شنو نتلاقى بكرة يا اما تجيني او اجيك ..
داليا قالت ليها خلاص بوصف ليك تعالي لي انتي ..
وفعلا وصفت ليها .. دالية من سكان بحري
اها يازول بالاختصار وتسارع الاحداث ثويبة يوم الجمعة.. مشت لدالية في البيت من بعد الفطور ..
اها طبعا ثويبة بقت تحكي لي دالية حكايات خرافية واكاذيب .. عن علاقتها بعمر ود عمها ..
وورتها انها بتحبو حب شديد .. وانها ما ممكن تتخلا عنو مهما كانت الظروف ..
وقالت ليها انا عمر ود عمي ياداليا مالي روحي فرحة وسعادة .. وقريب حنتزوج وانتي تكوني الوزيرة ..
يلا طبعا داليا هنا اطمأنت طمأنينة شديدة .. انو ثويبة ماعندها حاجة لي عامر جواها .. واخدت راحتها في الحكايات .. و حكت لي ثويبة كل التفاصيل الدقيقة بتاعة قصتها ..
قالت ليها .. اولا حاجة انا كنت عندي علاقة بي عزو من الجامعة.. عزو ده الود القيافة الساكن الصحافة .. ^_^ .. وبحبو اكتر من روحي..
بس هو زول فلسان وماعندو الحبة .. ولمن اتعرفت بي عامر .. وعرفت علاقة ابوهو بابوي ..
واني حأكون معاهو في الشركة .. فكرت فيهو من ناحية مادية بس ..
وطبعا انا لو اتزوجت عامر .. حاكون صاحبة املاك .. وبريح امي وابوي ..
لكن بكون فقدت عزو .. اللهو بالنسبة لي نفس وحياة .. والله ماعارفة اسوي شنو زاتو ..
ومع مرور الوقت بقيت بريد عامر وبريد عزو .. واي واحدة تجي في الشركة .. تحاول تتقرب من عامر تولع فيني نار ..
قالت ليها يعني هسي لو اتزوجتي عامر مابتقدري تنسي عزو؟
قالت ليها انا بالجد قدر ما حاولت ابعد من عزو ماقدرت .. وهسي كلمتو قلت ليهو انا مابقدر اتزوجك .. لكن انت بتفضل حب حياتي وخيار قلبي ..
وهو قال لي اتزوجي العايزاهو انا مراة بتدخل حياتي غيرك مافي ..
وانا قلت ليهو .. حتى لو انا اتزوجت وبقيت حبوبة .. مابقدر اتخلا عنك ياعزو ..
انا ياثويبة لو عديت يومين وماشفته عزو بموت ..
قالت ليها طيب يادالية انتي ليه ماتتزوجيه بي حالتو دي لو كنتي بتحبيهو قدر ده ..
وبعد الزواج ربنا بفتح عليكم وتبنو حياتكم كأحسن مايكون ؟؟
قالت ليها هو حق العرس ماعندو ..
وقاعد عاطل ..
ثويبة قالت ليها والله انتي في مشكلة حقيقية .. لكن انا ماعايزاك تظلمي عامر .. عامر انسان طيب.. ومابستاهل تظلميهو ظلم قدر ده .. تتزجيهو وقلبك مع انسان تاني ..
بعدين انتي كدا مابتسعدي في حياتك ..
قالت ليها يابت الزمن ده السعادة بقت في القرش .. والفلس ملعون .. قالت ليها .. والله يا دالية فعلا انتي زولة مسكينة ومافاهمة الحياة ..
لو القروش مهمة في السعادة تعالي شوفي بيتنا .. انا والله السعادة البحسها في بيتنا .. في قصور الملوك مااظنها في .. انا ابوي ياداليا عامل بسيط في طرمبة .. ودخلو بس قدر الاكل والشراب .. وطبعا" اهو ظاهر علي مامحتاجة احكي ليك .. جزمة بتلاتين جنيه ماقادرة اشتريها .. لكن والله السعادة الحاسنها .. لو في زول عارفها يحسدنا عليها ..
في النهاية انتي مخيرة .. انا بنصحك تتمسكي بي حب حياتك .. لانو السعادة معاهو مامع القروش .. غايتو انا كان بقيت في محلك .. بقيف مع حبيبي .. وما ببدلو باي انسان تاني .. مهما كان غنى ..وفي النهاية لازم تقرري .. واحد في الاتنين ..
والبتبقي عليهو انا بقيف معاك والله ...
وعايزة اسالك يادالية القصة دي كلها عامر عارفها ولالا .. قالت ليها ابدا ما عارفا .. بس عارف اني عندي علاقة مع واحد ساكن الصحافة .. بس ماعارف التفاصيل دي ..
وانا كلمتو مرة قلت ليهو خليتو ..
لكن والله ياثويبة حاولت كتير اسيبو عشان عامر.. بس ماقدرت ..
زي العصر كدا مشت ثويبة لاهلها وهي حزينة ومتأثرة لحالة عامر اكتر من داليا ..
وحاسة انو عامر مظلوم ظلم حقيقي .. وبقت شايلة هم اكتر من الاول ..
وبعد ماكان هدفها تلمهم الاتنين صممت انها تبعد داليا من عامر باقصى سرعة ..
بس تعمل شنو؟ غايتو جنس حالة !!
الى اللقاء ..
