عامر حس بي انو الكلام دخل الحوش ، والحاج ده شكلو مصر اصرار شديد..
قال ليهو حاضر يا ابوي ، بس انا اصل البيت ومافي اي مشكلة من الناحية دي ، ابشرك ..
انا رضاك عندي فوق كل شي ..
وطبعا بقى راسو يودي ويجيب .. ياربي اتصرف كيف ؟ ياربي اتصرف كيف؟ .
مشى لي ثويبة في المكتب قبل ماتطلع ،
قال ليها اها انا ممكن اوصلك .. الليلة ولا لا .؟
قالت ليهو طبعا" ممكن مافي مشكلة وانا لاقية ؟..
انت ماعارف مقدارك جواي قدر شنو؟ ، قال ليها والله عارف .. والحمد لله انو في اخر المطاف لقيت الانسانة الصادقة العفيفة .. الممكن الزول يثق فيها ، ويطلع من البيت وقلبو مطمئن .. على بيتو ، وعلى عرضو وعلى حياتو ..
خلاص انا عندي كم حاجة اخلص منهم ، واجي اوصلك وامشي البيت ..
لانو عندي مهمة كبيرة في بيتنا .. ومسألة مصيرية بالجد ..
انا لازم انتصر فيها واشيل كاس .. قالت ليه خلاص امشي خللص سريع ، انا قربت اخلص ..
وبعدين موش بعيدة عليك تمشي الثورة وتجي راجع المنشية
قال ليها مع الكزس تنطوي مسافات الطريق ويسهل الوعر ..هه
المهم ..خلص حاجاتو سريع وجا ساقها وداها الثورة .. وهي جواها امال بدت تستفيق ..لكن برضو هي طبعا ماعارفة الاصرار المصرو عمك مصطفى ..
في الطريق قال ليها غايتو يا ثويبة انا لو ربنا بحبني في الدنيا دي ..
يقسمك لي في حياتي .. والله انا واثق انو ربنا بحبني .. ومتأكد انو ما حيخذلني ..
انا بصراحة خشيت في علاقات كتيرة مع البنات ..
والله ياثويبة . الزول يفتش لامن راسو يدوش بت متصفة بصفات الصدق والامانة ..
والاخلاق الطيبة والحنية .. العندك دي مايلقاها بالساهل ..
قالت ليهو بس في النهاية بلقاها .. وامة محمد بي خيرا يا عامر ..
انا عندي صاحبتي .. معاي في الحلة والله تشوفها تقول دي جاية من زمن الصحابة ..
طبعا" صاحبتا دي انتو بتتذكروها الجاتها يوم وفاة احمد تصبر فيها ..
البت المربوعة المنقبة ديك ..
اها هي قالت ليهو عارف ياعامر .. انا طبعا" ماندمت على حاجة في حياتي ابدا"
لكن الحصل علي معاك انت بالجد الندم سيطر علي شديد ..
يعني انا رديتك من حياتي عن انسانة مابتستاهل .. وكذبت عليك بود عمي ..
وفي النهاية لمن حسيت بقلبي اتملا بحاجة اسمها عامر ..
لقيتك خلاص اتجاهك مشى حتة تانية ..
قال ليها ليه ياثويبة بتقولي كدا زي الكانك قنعانة من الموضوع ..
انا قلت ليك ان شاء الله انا بعمل المستحيل واقنع ابوي .. بانو الموضوع ده ماعايزو
وقصة انو افشل في الحتة دي عندي 20في المية فقط
المهم يازول وصلها البيت .. قالت ليهو دقيقة ماتمشي عشان خاطري اجيب ليك موية تشرب .. لامن دخلت جوة مالقت زول في البيت .. وحتى يوسف ماجاء .
وابوها مافي وامها مافي .. وعامر رجع ..
استغربت الناس ديل وين ياربي .. جابت ليهو الموية جوة وقالتلو .. ناس البيت كلهم مافي ماعارفة الحاصل شنو انا قلبي ماكلني شديد ..
قال ليها اتصلي عليهم .. قالت ليهو اول انا عندي تلفون .. حليلو هو يايمة ..
قال ليها طيب ثويبة مايكون عندها تلفون تاني اصلا مافي بت تستحق تشيلها تلفون في يدها ..
دقيقة بس .. فتح الطبلون عندو تلفون ماشغال بيهو .. طلعو وقال ليها اشتغلي بالتلفون ده لغاية بكرة .. دقيقة افرمطو .. جبق جبق فرمطو واداهو ليها ..
قال ليها مليااااااااان رضيد .. لغاية بكرة نشتري تلفون جديد ..
قالت ليهو طبعا لو من اي زول تاني مابشيلو لكن انت غير مع السلامة ..
وفات طوالي خلاها بتحاول في رقم ابوها ..
ونحن ماشين مع عامر البيت ..
عامر يازول ماشي في الشارع ويغني ساي .. ويهز في اكتافو ويتبسم براهو .
احساسو بقول مجرد انو ثويبة حبتني ده براهو مكسب في حياتي ..
المهم وصل البيت .. زي الساعة تلاتة عصر كدا ..
بيت ناس عامر فاتح في شارع النيل ، قريب من كبري المنشية ، فاتح على الشارع الرئيسي ..فيلا كبيرة وفيها حوش جنينة حدادي مدادي .. من البلكونة بتعاين للبحر لغاية الضفة الشرقية ..
البناية مطلية بالبصلي ..وكل مناسبة بغيرو ليها لون الطلاء .. غايتو جنس شي !
ووقف العربية برة .. وقبل مايدخل ضرب في تلفونو . الاداهو لي ثويبة ردت عليهو ..
قال ليها الزول الجميل اخبارو شنو؟
قالت لي فاقدك بس والله وبتمنالك الخير والسعد والعافية ..
قال ليها ..
انتي الفرحة يا عطر السعادة الزاكي ..
ليك في قلبي احلام يوم أجيب ذكراكي ..
بالجد ياملاك انا من زمان كت شاكي..
الا النسمـــة يادوب قاصـدت شباكي.
.
الليلة الفرح في روحي فارش وردو..
بــ ثويبة الملاك محن المساهر عدو..
في زينتك تجي ويتحيرو البتحدو ..
تقدلي في البلاط ست البلد لاحدو.
.
قالتلو ربنا يخليك
عامر قالا ..اها . اها ناس الحاج لقيتي منهم خبر؟.. قالت ليهو ايوه .. كان عندنا جارتنا اتضايقت ومافي زول معاها ابوي وامي ودوها للدكتور ..
قال ليها ايوة انتو كلكم كدا مفطورين فطرة على الكرم والشهامة ..
ويوسف وين ؟ قالت ليهو يوسف ساقوهو معاهم عشان مابقعد في البيت براهو بطلع الشارع طوالي ..
قال ليها طيب انا اتصلت عليك داير دعواتك.. قالتلو ربنا يوفقك لرضاء الله ورضا والديك ..
اها يازول دخل على ابوهو لقى ابوهو قاعد براهو قالليهو ياعامر .. انا منتظرك نتغدى سوا ..
حاضر حاضر .. جابو الغدا .. وبدا ابوهو الكلام . عارف ياعامر انا اصلا عايز اربطكم بي عمتكم .. لاني شايفها بعيدة منكم .. ومابيناتكم اي تواصل . لكن عارف لو عرست البت دي .. تاني العلاقة بتكون وطيدة ..
قال ليهو يا ابوي الله يبارك في ايامك . نحن عمتنا مابنفرط فيها .. وبي عرس بلا عرس انا بوعدك .. اسافر ليها في الديوم وازورها . واجيبها بي عربيتي من هناك ..
قال ليهو انت بتلف وتدور داير تقول ماداير البت ولاشنو؟
لكن قسما" عظما يا عامر .. تلحق تقول ليك كلمة كدا ولا كدا . لي عمتك ولا بتها .
وللا يشعرو انك رفضتها .. انت لاولدي ولابعرفك ..
قال ليهو لالالا يا ابوي معقول؟ البتقولو يا ابوي يمشي .. انا البت عاجباني ودايرها عديل .. خليني اتكلم معاها واشوف شعورها تجاهي شنو؟
قال ليهو خلاص .. بعد تتغدى وتشرب الشاي وتروق شوية .. سوقها وامشي بيها كدا على طرف البيت .. في الجنينة القدامية .. اقعدو واتفاهمو كويس ..
قال ليهو مافي مشكلة ..
اها يازول فعلا عامر مشى خت كرسيين . هناااااك .. والمراة كلمت بتها .. قالت ليها عامر ود خالك دايرك يتكلم معاك شوية ..
قالتليها دايرني في شنو كمان ؟ .. قالت ليها امشي اسأليهو انا شن خبرني ..
المهم جاتو ماشة زي مشية الأوزة .. البت زاتها ماشاء الله تبارك الله ..
عاين ليها كدا .. وقال ليها اتفضلي يا تغريد .. قعدت .. قال ليها .. انتي عارفة جايبنك هنا الخرطوم عشان شنو؟
قالتليهو ماني خابرة .. كدي قولي انت ..
قال ليها ياستي ابوي وامك .. اتفقو انهم يجيبوك هنا .. عشان انا اشوفك .. وكان عجبتيني اعرسك .. اها انتي رايك شنو؟
قالت ليهو انا اصلي غنماية جالبني في السوق؟ .. وليه ماكلموني ..؟ وانا ماعندي راي زي البنوت ولاشنو؟
قال ليها يازولة الكلام الكتير ما عندو فايدة .. بس انتي قولي عشان نتفق على كلام .. والكلام البتقوليهو لي انا بمشي عليهو .. سيبي الفلسفة ..
قالت ليهو والله بالله ؟ .. انت قايل روحك شنو يا اخوي ؟
اقول الحقيقة .. انت اصلا ماراكب لي في راسي .. ولاناس بيتكم ماحبيتكم كلو كلو ..
بتتعاملو بفشخرة كدي .. التقول اول مرة تشوفو القروش ..
وابوي اصلا مابحبكم .. وانت عارف كدا كويس .. وامي بتتكلم ساي .. هسع وكت نبقى في الجد .. ابوي هو الليهو الكلمة الاخيرة .. وابوي هسي لو سمع بي حركتها اعمتها دي بقلب الدنيا فوق راسها .. لانو مستحيل يقبل بيكم انتو .. قاليها خليهو ابوك .. انتي رايك شنو ؟ .. قالت ليهو انا ياشاطر مع ابوي طبعا" ..
قال ليها غصبا" عنك وعن ابوك انا بعرسك .. انا لازم انفذ كلام ابوي ..
قالت ليهو يا سسلام ؟؟ حلاتك دي يايمه ..وانا ماعايزاك ياحلوو .. النشوفك بتجبرني كيف .. بالله عان ده كمان .. انت قايلني هينة ولاهينة ..
وهو طبعا" من جواهو مبسوط انو الامور مشت بالطريقة دي ..
قال ليها خلاص بعرسك بالحسنة .. عليك الله ترضي بي .. اموت ليك انا هسي ايييي..
قالت ليهو وانا برضو بعرف الاستهتار والحقارة .. سيب الاستهبال والاستخفاف .. مع السلامة .. قال ليها بالجد انا خلاص جنيت فيك .. ماتمشي قولي لي رضيانة .. قالت ليهو اقسم بالله لو السما انطبقت على الارض ماتمسك يدي ..
.. قال ليها ماتمشي انا بنصدم انا بموت .. قالت ليهو بالله روح عليك الله .. وقامت ماشة وصارة وشها حلات صرة ههه ..
وعامر من واهو مبسوووط قرب يفقها ضحكة .. وقال والله دي تكون دعوات ثويبة .. احبك انا ياثويبة ..
الى اللقاء ..
