كل الامور ماشة في الشركة بالطريقة المقلبنة دي .. نحن هسي في العصرية .. في البيت ثويبة ..
كانت اليوم عندها حالة بتاعة توتر ..ماعارفة سببها شنو؟
وزهجانة بطريقة غريبة خلاص .. وقالت لامها يا امي انا حاسة بنفسي متضايقة ..وقلبي واجعني شديد .. امها قالت ليها قولي بسم الله يابتي ..بتكوني اتذكرتي اخوك ..
قالت ليها لالا والله الموضوع ماكدا .. بس ماعارفة مالي ..
قالت ليها قولي بسم الله ..امشي اخدي ليك نومة ..بكون من الارهاق .. واليوم داك كلو ماقدرت نامت .. ومقلقة بس ماحكت لابوها .. وابوها كان مشغول بالونسة مع عمر وعمر احتمال يسافر باكر اوبعد باكر .. وامها كمان نست تحكي لابوها عن خالة ثويبة دي .. وافتكرت الموضوع طبيعي ..
ثويبة بالليل قامت صلت وقعدت ..
ورقدت في السرير ..جواها افكار كدا بتنازع فيها منازعة عجيبة ..
بقت تفكر في الحاجة المضايقاها ..اكتشفت انها الطريقة الكان بتعامل بيها عامر معاها في الشركة ..والحالة بتاعة الاهمال الحست بيها ..
وكل ماتفكر في طريقة كلامو معاها تقرب تبكي .. وتاني تقول لنفسها يعني شنو..
انا بالنسبة ليهو شنو؟
ماهو المدير وانا موظفة عادية ..
انا مالي كدا؟ .. والبحصل علي ده شنو ياربي ..؟
انا هسي عايزة انقذو من شرور دالية.. مافي مشكلة كان اهتم بي او ما اهتم بي ..
قامت علي حيلا والساعة تقريبا 3 صباحا . ويوسف نايم جنبها . ولعت النور وبقت تفتش في دولابها ..
وطلعت دفتر قديم كدا من زمن الدراسة ووجابت قلم وقعدت تكتب ..
كنبت " مال قلبي يئن ..ولماذا اشعر به يحترق شوقا".. لقربك ياحبيبي ..ماذا الذي جرى عليك ايهاالقلب المسكين .. مالي اراك بدأت تتحرك بعد ركود طويل ..
ماذا فيه حتي يجعل تعاني كل هذه المعاناه ..
لقد كان قريبا منك .. وكان يحوم حولك .. بعد ان صددناهو بدأت تعذبني وتناديه ..؟
ايها القلب الكسير .. لم يجور عليك احد .. انا التي ظلمتك بنفسي.. فاربط جاشك .. وتوكل على ربك .. فليس في الكون امر الا بتدبيره ..
يا الهي ماهذه الحسرة التي اتذوق مرارتها ؟..ماهذا الشعور الذي يتملكني؟
..بعد ان حسبت انني قوية كالجبال ..اخيرا اصابني مابصيب غيري من الوله .
يا الهي ماهذا الشوق الذي لا أعرفه ..
قفلت الدفتر وسرحت كدا مسااااافة واخدت ليها بكية وقامت ..
رقدت شعرت انها ارتاحت شوية ..
واخدت ليها نومة ما اكتر من ساعة .. وبدأ اليوم الجديد ..
وطلعت من البيت سريع وطبعا كم يوم كدا .. يوسف بوصلو ابوهو للمدرسة.. لانو البشرى اليومين دي .. في اجازة .. افتعالية ..
اها يازول ثويبة مشت الشركة على طول ..وطول الطريق مافي فكرها ..شي غير انها تشوف عامر ولو لبرهة .. في قلبها احساس بالعطش لرؤياهو ..
مع انها بتحاول المستحيل انها تطلع الشعور ده من جواها.. لكن ماقادرة ماقادرة ..
وكل ما تتذكر كيف كان متمسك بيها وعايزها ..وهي ماعندها تجاهو الا القليل من الاحترام والتقدير .. تتحسر .. بس ده شنو الشي الجاني مؤخرا ..؟
وبقت تتذكر انها كانت بتفرح لما تشوفو .. وبتتوتر لما يكون مافيش في الشركة ..
وعرفت انو كانت دي بدايات المرض الغريب الاسمو الحب ..
واكتر شي طبعا مضايقها انها قفلت عامر .. بي ود عمها .. لانها كانت عايزاهو يرجع لداليا ..
ولمن اكتشفت انو داليا مابتستحق عامر .. كان الزمن فات .. وعامر خلاص بقى في عالم تاني ..
لانو قنع منها ..
اها يازول .. مشت على مكتبتها وبدت الشغل عادي ..وبقت بتحاول كل الوقت انها تركز في الشغل .. اها طبعا قرشي طوالي بدا معاها الكلام ..
قال ليها طبعا ياثويبة انا مبارح مشيت لبيت ناس عامر وقابلت ابوهو..
قالت ليهو خير ان شاء الله عل مافي عوجة ..
قال ليها الحقيقة مشيت كشفت ليهو بعض الامور ..ووريتو الحاجات البتعمل فيهن داليا ..
لانو عامر بقى ضعيف قدامها وماقادر يتصرف ..
ونحن صراحة تاني مابنقدر نتعايش مع الزولة دي في شركة واحدة ..
قالت ليهو والله ياقرشي بالغت شديد .. ليه ياخي بتعمل كدا .؟
قال ليها الزولة دي مضرة .. وممكن تضر الشركة ..وتضر عامر ..وتضرك انتي وتضرنا كلنا ..
وبعدين لازم تتعاقب على الظلم العملتو ..
انتي ما متذكرة انها قطعت معيشة بتين .. وشوهت سمعة عامر وسرقت وووو ..
ده كلو يمر ساي .. نحن ارحم من رب العالمين الفرض العقوبات من السماء ..؟
بعدين نحن لو بقينا نضاري ليها .. كدا بنضر عم مصطفى في شغلة التعب عليهو عمرو كلو ..
بي سبب بت لابتساوى حجر ولا طوبة ..
قالت ليهو بس انت شايفها ندمت ..وبدت تصلح في الحاجات .. ورجعت القريشات .. وصححت المفاهيم ..
يعني لمن الزول يرجع من الغلط ..نحن بدل ندعمو ..نخليهو يندم على الحقيقة ؟
بس غايتو ياقرشي تاني التوبة ..ما بدخلك في اسرار ..ولا بكلمك بحاجة ..
اها طبعا .. عامر لمن جا رسل لثويبة .. وكت الود العامل كلمها وقال ثويبة مطلوبة في مكتب المدير .. ثويبة هجمت عليها مشاعر عجيبة وغريبة .. فرحت وخافت وقلقت في لحظة واحدة .. وقالت لي قرشي اهو عامر بكون ابوهو كلمو بكلامك .. قال ليها ..لا مابكلمو وعدني انو مايكلمو .. قالت ليهو طيب حيتصرف كيف؟ .. قال ليها امشي ليهو سريع .. في باقي كلام ماقلتو ليك .. لمن تجي راجعة بحكيهو ليك ومحتاج لمساعدتك .احتمال تقدري تساعديني ..
اها مشت لي عامر .. دقت الباب برااااحة ..
قال ليها خشي ..خشي ياخ ..
وكت شافها جاتو داخلة .. كان شكله مستاء .. وبمسح في وشو بيدو كدا ؟؟
ومتكل كوعين يديهو علي الطربيزة ومتكي ..
عاين ليها لقاها مبتسمة ابتسامة صغيرة كدا ..
عاين ليها كدا معاينة بتاعة غضب وزهج شديد .. وحست بي اكوام كراهية مرسومة على وشو ..
غيرت ابتسامتها سريع .. وقالت ليهو السلام علي قال ليها .. مرحب اتفضلي اقعدي ..
انتي كلمتي زول بي حاجات دالية البتعمل فيها دي ؟
قالت ليهو ابدا" ليه في شنو؟
قال ليها ماتكذبي علي ياثويبة . قالت ليهو انت احكي لي ..
قال ليها في مزامنة غريبة في الاحداث ..مع الاعتراف بالسرقة.. ابوي امبارح اتكلم معاي ..قال لي انا دالية بت الامين دي ماعايزها تواصل شغل في المقر الرئيسي..
حولها تشتغل في الفرع بتاع بحري .. عشان هو قريب ليها ..
وانا طبعا" بعرف ابوي كويس .. لمن يكون في راسو في حاجة وماعايز يقولا ..
قالت ليهو ياعامر طبعا انت عارف.. انو دالية قصدها اصلا تنتقم منك ..وده الكلام الانت قلتولي . وموظفينك كلهم عارفين الحتة دي ..
بس ليه انت بس اتهمتني انا ؟
قال ليها بس لانو الاحداث اتزامنت مع بعض .. وانا حاسي بانك مشغولة بيها اكتر من اللازم ..
قالت ليهو مشغولة بيها؟؟ انا ؟؟ سبحان الله ..
باختصار شديد ياعامر انا اصلا ماعندي شغل بالموضوع ده من اساسو ..
وبراي بديت اتحشر في مالايعنيني.. الكان مفروض يعنيني هو اني ابرء نفسي من السرقة وبس.
بعدين انت عارف انو داليا مضرة.. وانت متضايق منها.. وكنت اصلا على حسب كلامك خايف من انو كلام يصل ابوك.. ويزعل والحاجة تأثر عليهو ..صح؟
طيب لما في زول خدمك خدمة قدر دي ..وبلغ ابوك بالحقيقة بدون تحصل اي اضرار .. انت متضايق مالك ..؟
قال ليها ب.. انا كنت عايز اعرف منو الكلم ابوي وبس ..
قالت ليهو انا قلت ليك انا ماعندي علاقة بالموضوع .. امشي اسأل غيري .. وعن اذنك والله انا عندي شغل ..
قال ليها ياثويبة انتي مالك .؟ هسي كلامك حار كدا ؟
دي ما من طبايعك نهائي ..
قالت ليهو انا اديك مراية تشوف وشك؟ قابلتني كيف؟ .. ورديت علي السلام كيف .
واتكلمت معاي بياتو طريقة ..
سبحان الله .. انت مفتكر اني سيئة وكذابة ؟ ومتضايق مني للدرجة دي ..
قال ليها ابدا انا ما متضايق منك .. انا في موضوع تاني جايب لي توتر وكاره نفسي ..
قالت ليهو خير ربنا يعينك انا ماشة ..
وطلعت طوالي وهو بنادي فيها ثويبة انا بتكلم معاك .. ابدا" ما التفتت عليهو تاني ..وحاسة في غصة واقفة ليها في حلقها ..واتاثرت شديد ..
لما وصلت المكتب .. قرشي قال ليها احكي ليك باقي الكلام ؟..
قالت ليهو لالا ماتحكي لي اي شي .. انت دخلتني في مشكلة لا ليها اول ولا ليها اخر ..
وعامر اكتشف انو في زول مشى شكى لابوهو ..
ومتهمني انا عندي يد في الموضوع ..
قال ليها يتهمك انتي كيف يعني؟؟ هو ممكن يتخيل انك انتي تمشي تكلمي ابوهو ؟
ده ود اهبل ولا شنو؟ والله فعلا عامر كلتشي ..
قالت ليهو لو سمحت يا قرشي.. انا مابسمح ليك تتكلم عنو اي كلمة جارحة ..
قال ليها ليه ياختي بديتي تقعي في غرامو ؟ قالت ليهو القصة ماكدا يا شاطر ..ده في النهاية مديرنا .. ونحن شغالين تحت خيرو .. المفروض على الاقل يكون في وفاء ولو بسيط ..
قال ليها نحن شاحدينو؟ .. ماشغالين بعرق جبينا ..
قال ليهو ماح تفهم ياقرشي ..انا عايزة اشتغل ..
قالها : يعني ما احكي ليك؟ . .. قالت ليهو لا ماتحكي لي ..
قال ليها بس بكون ده الموضوع المضايق زولك احسن ليك تعرفيهو ..
قالت ليهو لا ماعايز اعرف وبس ..
اشتغلت شوية وما طلعت للفطور الناس كلهم طلعو الفطور وهي مكبسة في الشغل ..
بعد خلصت من الفي يدها مشت لداليا في المخزن ..
نادتها بعيد قالت ليها داليا لو سمحتي ياداليا ..انا محتاجة للمبلغ باقي القروش ..
قالت ليها هسي ماعندي والله .. قالت ليها المهم باكر بعد باكر بالكتير تجيبيهو لي ..
لانو انا ماعندي حاجة اسددو بيها ..
داليا قالت ليها عامر عرف انو انا شلت القروش يا ثويبة ؟
قالت ليها ايوة عرف .. ماكان في زول تاني ممكن نتهمو بيها .. طبعا لكن انا اتكلمت ليك معاهو ودافعت عنك بوارك .. وما ح يسالك ..
بس جيبي القروش ده كلو موضوعي ..
دالية قالت ليها ثويبة انتي مالك الليلة .. والله ماطبيعية ..
قالت ليها مافي حاجة ..
دالية قالتلها .. لالا في حاجة .. انتي الليلة ماثويبة البعرفها انا ..
لما جات راجعة من دالية سمعت في مكتب عامر في نقاش حاد
وعامر رافع صوتو وهايج في زول ..
وكت دخلت مكتبها لقت قرشي مافيش ..
معناها الشكلة بين قرشي وعامر ..
غايتو الشركة دي فيها جنس دفسيبة ..
ربنا يجيب العواقب سليمة ..
الى اللقاء
....
