عم البشرى في البيت .. قاعد بحكي ليوسف الصغير في قصة ..
ثويبة جات .. ظاهر عليها مهمومه ومغمومة .. وحالتها بالبلا .
ابوها قال ليها الحاصل شنو ..؟؟ قالت ليهو مافي حاجة يا ابوي .. عندي زولة صاحبتي كدا واقعة ليها في مشكلة ..
قال ليها .. ايوة ده وقت الصديق بحتاج للصديق.. لازم تقيفي معاها للاخر ..وتحسي انو المشكلة مشكلتك ..
شوية كدا وعمر دقا الباب يادوب جاي .. وسلم ودخل بيغادي .. ثويبة حضرت ليهو الحمام والغيار النضيف.. والحاجة جهزت ليهو الغدا المتاخر .. المغرب قرب ..
البشرى طلع على الصلاة ،،
اها وكت عمر ثويبة جابت ليهو الاكل ..
قال لها .. ها بت انا ها .. انتي ما بتنضمي مالك؟ . قالت ليهو كيف ياعمر .. مابنضم؟ ..
بس مالقيت لي فيك فرصة .. والله ابراك بري انت قايلني هينة ؟
قال ليها والله بنات الخرطوم ديل مسلطات.. لكن انتي ما زيهن ..
هسع انا كنت داير اشاورك في موضوع .
لكن لقيتك مسكينة ساي بنوت البلد هناك افلح منك..
قالت ليهو بالله عليك ؟.
الماعارفو يقول عدس .. يا ما تحت السواهي دواهي ..
والناس البتمسكنو وكاتلين ضلهم ديل .. اعمل حسابك منهم ..
اها موضوعك شنو؟ ..
قال ليها انا حكيت لابوك .. انا داير اسما بت خالي.. وابوي واقف دوت ..
قالت ليهو ايوة انا سمعتك كان بتحكي لابوي ..
قال ليها كمان بتتسنطي؟
قالت ليهو انت اساسا مامحتاج لزول يتسنط .. بتكورك بطول حسك .. زي الشايل ليك مكروفون ..
الجيران ديل بكونو عارفين قصتك مع اسماء وابوك ..
قال ليها اها ..ابو الافكار .. انتي رايك شنو؟ والله انا في ضيقة شديدة ..
وبقى يهضرب .. واسماء .. واسماء .. هسع انا مامشتاق لي حاجة في البلد الا اسماء .
انا كان ماعرست اسماء بحن ..
قالت ليهو .. انت ليه شايل هم قدر ده؟ انت ماعندك ايمان انو ربنا مقسم الامور دي من زمان ..؟
يعني ياخوي خليك مرتاح ..الزولة دي كان مقسومة ليك بتلقاها .. وكان مقسومة لزول غيرك . قدر ماتنطط مابتلم فيها .. احسن توفر الافكار والتعب ..
ولو عندك سعي اسعى في حدود المعقول والصاح..
المهم ثويبة عرفت مدى التمسك المتمسكو عمر بي اسما بت خالو .. وكيف هو بحبها ومخلص ليها واتكيفت جدا من القصة دي ..
قالت ليهو انت لمن حكيت لابوي قالك شنو؟
قال ليها ابوك ده والله نعم الرجل .. انا كل مرة بتمنى انو يكون ابوي ماعمي ..
ممكن نتبدل ؟ اديكم ابوي واشيل ابوكم؟
قالت ليهو .. بتبالغ لكين نتبدل كيف ..ونحن ابونا ميرغني ..وابونا بشرى الاتنين ..مابنستغنى عن اي واحد فيهم ..
اها ماقلت لي قال ليك شنو ؟؟
قال ليها.. ابوك قال لي انا بتصرف ..وان شاء الله مايحصل الا الخير ..
قالت ليهو طيب خلاص .. ده ابوي وانا بعرفو ..موضوعك اعتبرو منتهي ..
دي اول مرة عمر يلقى فرصة يتكلم مع ثويبة ..
اعجب بي شخصيتها جدا.. بس الزول قلبو ملان زوت مافيهو نفس .. اسما جايبا ليهو اكتفاء نفسي..
اها يازول البشرى جا لقا ثويبة قاعدة بتتونس مع عمر .. ويوسف راقد ليها في كرعينها .. وكانت بتحكي لعمر عن صاحبتها في الجامعة كانت امها رافضة خطيبها ..
المهم البشرى جا وقعد والونسة جرت .. وعمر لسه بهضرب بموضوع اسماء ..
ومن خلال الونسة.. البشرى عرف انو عمر حكا مشكلتو لثويبة ..
اها البشرى قال لي عمر ياعمر ..تلفون خالك بدوي .. كم؟ قاليهو اكتب .. ملاهو ليهو ..
البشرى ضرب لي بدوي ابو اسماء وخال عمر طبعا"..
اها ثويبة . وعمر ..
سامعين كلام البشرى ..
لكن كلام بدوي ماسامعينو ..
البشرى .. السلام عليكم يالبدوي الكبير شيخ المشايخ ..
كيف الحال .. وان شا الله طيبين .. ..
...-
- البركة في الجميع ..
-.....
والله انا عندي معاك موضوع وماعارف ابداهو معاك كيف ..
بس اهم شي في الموضوع ده السرية التامة ..
...... (اطنو قاليهو سرك في بير ^_^)..
طبعا" ثويبة وعمر بسمعو في المكالمة فاتحين خشومن ..
واصل البشرى وقال ..
طبعا قبل ايام جوني ناس ميرغني اخوي للعزاء وميرغني .. اتكلم عنك كتير وقال هو بعزك معزة كبيرة ..
وقال نفسو يزيل الجفا .. ويجي يطلب اسماء بتك لي عمر ..
لكن هو شايفك انت متباعد منو ..
وحايف يجيك وانت تحرجو .. انا يابدوي بطلب منك طلب الاخو من الاخو ..
دايرك تمشي تسجل زيارة لي ميرغني .. وتطيب خاطرو .. وبي افكارك وذكاوتك تحاول تصفي البيناتكم ..
وده طلبي الوحيد .. وما اظنك ..تخيب ظني ..
عمر اليومين دي معانا بيجاي ومافي خشمو سيرة غير اسماء ..
وبتك مافي زول بسعدها زي عمر الاصم ود اخوي ..
بشري سكت يسمع و بدوي اتكلم كتير .. والبشرى يتبسم ..
وقال ليهو الله يجزيك خير يابدوي وياها المحرية فيك .. ياخي الله يكرمك ..بس اهم حاجة تقسم لي هسع اتصالي ده مافي زول يعرفو ..
اها الله يسلم الله يبارك فيك ..وقفل التلفون..
وعاين لي عمر وقال ليهو ابشر يا المبروك .. دي اول خطة في خطة عمك البشرى المابتجلي ولابتخيب ..
نشرب الشاي ونضرب الضربة التانية ..
والله عمر ده فرح فرحة ..ماقادر يتنفس ..بقى يبلع في ريقو ويرمش زي الضارباهو كهربا ..
بعد الشاي وكانت الونسة سمحة سماحة ..
شال البشرى التلفون وضرب لي ميرغني اخوهو ..
قال ليهو ميرغني اخوي كيف حالك والله عمر اليومين ديل معانا بيجاي .. وجايب لنا الفرحة والخير ..
والامور ديك ماشة تمام.. الحمد لله بس لسه مافي حاجة واضحة كدا ..
لكن شكلو الزول صاحبنا باقي على قديمو ..
طبعا" ثويبة وعمر مافاهمين اللغز ده يعني شنو؟
قاليهو عارف ياميرغني..صاحبك بدوي ضرب لي هسع داير يعزيني .. وسعلتو منكم وقال لي ..والله .. انا اكبر خسارة لي في الدنيا .. الجفا البيني وبين ميرغني ..
وقال لي انا داير امشي ليهو .. لكن خايفو يحرجني .. عارف ياميرغني اخوي الزول ده بعزك.. انا اول مرة اكتشف الموضوع ده.. عشان خاطري كان جاك انت جبل الكرم المابوصوهو..
ميرغني ........برضو اتكلم كتير
بشري .: قال ليهو والله ياها المحرية فيك يافارس المدرعات هع عفيت منك اخوي ..
الله يسلمك وتصبح على خير ..
وقفل التلفون ..
وقال لي عمر ابشر يابوعميرة الموضوع انتهى خلاص .. وبراك بتشوف سحر عمك البشري
كيف بياكل جبل العداوة بي نارو ..
ومرة قال اللبيب..
كريم الطبعة ديمة بلمــلم المفروق ..
وكان ما اصلح الناس من هموم مابروق ..
اوعك من منافق فعـــــلو كلو فروق .
يقول للشـر هلا .ومن السمح محروق.
..
وزي ماشايفين اخونا ابوعميرة امورو وضحت .. وربنا يتمم ليهو مراده ..
وسبحان الله .. شوف جايبنو لشنو .. والحصل شنو؟..
صباحات الله بي خيرا باكر نشوف الشركة ودراماتها ..
الى اللقاء .. —
