ثويبة خلت داليا دخلت قداما ..وجات داخلة وراها طوالي.. قام عامر قال لثويبة ..يا ثويبة انا زي ما كلمتك بطلي الكلامات البتقولي فيها دي .. انا ماعندي معاك اي علاقة .. غير علاقة الشغل .. قالت ليهو انا بالجد ماقلت حاجة لاي زول .. قال ليها بس انا ما مصدقك لانو الكلام جاني من مصدر موثوق به .. دالية ساكتة ومقبلة على الباب وصارة وشها..
ثويبة هنا فهمت مقصد عامر من الكلام ده .. قالت ليهو خير يا استاذ .. ان شاء الله ماتسمع الا الخير .. وانا استاذن ..
وطلعت على طول .
مشت على مكتبها وبدت في الشغل ..واندمجت مع الحسابات ..ونست الموضوع .. لكن بيغادي الناس ماناسنها ..
طبعا داليا قالت لي عامر ..بالله شوف البت المابتستحي دي .. والله انا كان ماخايفة احرجها .. كنت هسي اقول ليها اسكتي ياكذابة موش امبارح حكيتي لي ..؟
لكن خليها مصيرها براها تكشف روحها ..
وبعد نهاية اليوم وقبل ما تطلع ثويبة من المكتب جاتها دالية تاني وقالت ليها ثويبة .. كيفك . انا طبعا الصباح لقيتك مع عامر .. وانتي طبعا بقيتي زي اختي وانا عايزة انصحك لوجه الله ..
طبعا عامر ده انسان تافه وبتاع بنات .. واي بت تجي جديدة تشتغل اول حاجة بستولى عليها .. ويطلع وينزل معاها .. ويستغلها استغلال سئ .
ويوهمها بالاهتمام والريدة والحنك العاضي ده .. يلا اول ما يشيل منها الحاجة العايزها .. والعلاقة تكون كملت سنة .. بفتح التوظيف الجديد..
وبجو بنات جديدين يقدمو.. عامر يعزل اسمح واحدة في البنات ويفتح معاها برنامج جديد .. بداية من التوسط يتوسط ليها عشان يوظفوها .. ويهتم بيها .. ويمشي ليها في البيت ويتعرف بي اهلها . ويكسب ثقتها .. اول ما تنزلق معاهو في المزلقان .. وياخد معاها زمنو تكون السنة الجاية جات وهاااااااكذااا .. كم من البنات .. طارو من الشركة بالطريقة دي ..
طبعا انا واحدة من الضحايا .. وهسي بصراحة انا بحبو جدا .. وهو خلاص قنع مني اخد العايزو وبطنو طمت مني .. وانا لمن سمعت انك حايمة حولو ..عايزة اطيرك من طريقي .. دي اول حاجة ثم ثانيا عايزه انقذك من الذئب البشري ده ..
وطبعا اول حاجة بكون عملها معاك .. بكون حذرك مني وقال ليك ماتصاحبيها ..صح؟
طبعا انا الصباح اتصلت عليهو.. وقلت ليهو البت الجديدة عايزة تبقى صحبتي ..وطبعا هو حيكون قال ليك زيادة كلام .. عشان يحسسك بالقرب . ودي عملية عملا مع كتيرات ..
معقول بس ياثويبة ..اكون انا غلط وكل الشركة غلط .. وهو وحدو الصاح؟؟
.. انا الصباح داخلة عليكم في المكتب سمعتو بقول ليك والله انا ماكعب .. الناس كلهم كلاب ..
لكن انتي ياثويبة براك الايام بتكشف ليك الزول ده ..
ثويبة قالت ليها انا اطمنك يا دالية .. انا الزول ده ماعندي ليهو اي حاجة .. سواء ان كان كلامك عنو ده حقيقية .. ولا غير حقيقي ..
ف انتي لو عندك اي كلام .. امشي قوليهو ليهو هو .. انا ماعندي جواي غير ابوي حبيبي ..
قالت ليها بس كدا تمام خليك في حالك انا هو قادرة عليهو ..
قالت ليها يادالية .. انتي لو فعلا بتحبيهو .. وعايزاهو يرجع ليك .. انا بوصيك .. انك تكوني انسانة واعية .. وما ترمي نفسك عليهو .. احترميهو في حدود الادب والتربية .. لكن ماتهيني ليهو نفسك بالجري وراهو .. وماتخليهو يحس انك خانقاهو وكاتمة على انفاسو .. مافي شي بنزل قيمة البت في عيون الراجل غير خفة البت واستهانتها بي نفسها ....
الرجال بقدرو البت المحترمة وحافظة روحها .. انتي عارفة لو في واحد في الشارع شاغلك .. معناها انتي هينة .. ومعروضة للبيع .. وعاملة في نفسك حاجة جايبة ليك الاهانة .. يا اما لبس او زينة ..
حتى المنقبات البشاغلوهن .. هن اللابسات العبايات والنقاب بطريقة مغرية ....
تلقي الواحدة منقبة وماشة بطريقة تلفت الانظار ..
بعدين زي عامر ده اول مايحس انك ميتة بي شوقو .. تاني بمل منك.. ويستغنى عنك ..
دي وصية واعملي بيها .. وشوفي براك النتيجة ..
قالت ليها بس يا ثويبة والله ماقادرة .. انا حاسة اني بقيت زي المجنونة .. بتصرف زي الما واعية ..
طيب ادعي لي معاك انتي بالجد اخت وصديقة عزيزة ..
طبعا" ثويبة بقت مافاهمة اي حاجة .. بقت زي الاطرش في الزفة ..
وبقت ماعارفة تصدق منو وتكذب منو ..
المهم طبعا مشت البيت وهي راكبة المواصلات بتفكر.. ياربي معقول عامر ده يكون بالطريقة دي ؟
اهو ناس الشركة كلهم بقولو عنو كدا .. تاني تقول .. هوي ياخي انا مالي ومالو ..
انا علي بي شغلي ..
بس لازم ابعد منو زي ماقال لي الاخ قرشي ..
اها لمن وصلت البيت لقت عامر قاعد في البيت ..
وبتكلم مع البشرى كلام براحة .. وشكلو قاعد ليهو اكتر من ساعة لانو مالص جزمتو ومتكي في السرير .. في الفي البرندة ..
والبشرى مبسوط بالونسة معاهو .. وشكلو متكيف منو شديد ..
المهم سلمت واول كلمة قالتها لابوها .. يوسف وصل كويس يا ابوي ؟.. قال ليها الحمد لله نايم جوة .. .. كيف احوالك انتي يا ثويبة ان شاء الله ما تعبتي ..
قالت ليهو الحمد لله يا ابوي .. كيفك استاذ عمر ..
وهي داخلة كدا على الغرفة الغربية الفيها اخوها نايم وامها في المطبخ .. عامر قال لي عم البشرى .. حتتكلم معاها هسي قدامي ولابعدين ياعم بشرى ؟
قاليهو لالا ..هسي ماينفع . بتكون مرهقة شوية خليها بعدين اتكلم معاها برواقة ..ثويبة قالت يتكلم معاي في شنو ياربي ..؟
الزول ده قصتو معاي شنو ؟؟والله انا مليت من الزول ده ..
اها يازول كانت زينب بتعمل ليهم في قهوة المهم شرب القهوة وطلع .. طوالي ثويبة جات طالعة لابوها قالت ليهو ابوي الحاصل شنو والزول ده عايز مني شنو؟
قال ليها هدي بالك يابتي هسع انتي منزعجة كدي مالك ؟ انا بحكي ليك .. الزول ده والله شكلو ود حلال ..
قال لي انا شايف انو ثويبة بتتعب كتير عشان توصل يوسف المدرسة . وتمئن عليهو حتى تمشي الشغل وبتجي متأخرة ..
فقال هو عندو رغبة يحول يوسف لمدرسة خاصة بالترحيل على كفالتو الشخصية ..
انا طبعا" على حسب انك انتي قلتي الزول ده زول كويس .. ما حبيت احرجو بس قلت ليهو الراي الاول والاخير عند ثويبة ..
وقلت ليهو نحن اي موضوع لازم نتشاور فيهو انا وثويبة وامها وندرس الاراء بمنطقية ..
ولمن كلمت امك قبل شوية قالت ماعندها مانع .. وفضل رايك انتي ..
وانا قلت ليهو الا تجي ثويبة واتكلم معاها في الموضوع ده واشوف رايها ..
ثويبة قالت ليهو .. انا طبعا ما موافقة بالموضوع ده .. وانت وامي لو مصرين تقبلو بالحكاية دي ..
لازم هو يكون عندو خبر انو الموضوع ده ضد رغبتي ..
انا قادرة اودي اخوي المدرسة واجيبو .. وان شاء الله من بكرة بقوم قبل الشرقة عشان يكون قدامي وقت كافي ..
عم البشرى قال ليها طيب هو زول بقول الحاجة دي ماعملها عشان نحن عشان مستقبل الولد .
وانا ماشايف مشكلة .. وانتي قلتي الزول ده زول كويس ودا الشي الظاهر من تعاملو معانا ..
قالت ليهو يا ابوي في حاجات وملابسات كدا انت ماعارفها .. بس انت خليك واثق في كلامي وارفض الموضوع ده .. قال ليها خير .. انا بثق في كلامك واعتبري الموضوع منتهي ..
شوية كدا يوسف صغير البيت قام من النوم.. وشو محمر ..وعندو حمى شديدة .. وماقادر يقعد على حيلو ..
وبدا يستفرغ ..
الى اللقاء ..
..
