ثويبة قالت لي امها لالا ماحلمة كعبة انتي موش قلتي الحلم الكعب ماتتكلمي بيهو ..
دي سمحة شديد .. البشرى قال ليها احكي ياثويبة ..
خليني من زينب دي .. قالت ليهم .. انا شفت اني دخلت الاوضة بتاعة ابوي.. ولبست جلابيتو .. وطلعت الشارع .. وكان جيب الجلابية ملان بلح عجيب ..
مبالغة لونو وطعمو وشكلو حاجة تجنن ..
اها طلعت الشارع وبقت بوزع للمساكين من البلح .. وهم بياكلو بي استمتاع ..
وبتبسمو .. وبعاينو للبلح متعجبين في جمال شكلو وطعمو ..
اها كل مابوزع بحس انو البلح مابنقص ..
كانو في زول بكب لي حاجة مع البلح بتزبدو .. حاسة بكدا .. بس ماشايفة البعمل كدا منو ..
اها لمن الناس كلهم شبعو ومشو .. رجعت البيت لقيت جيبي ملان جواهر ودرر ..
واحجار كريمة ..
اها موش رؤيا حلوة ؟؟
البشرى قال ليها الله اكبر .. الجلابية دي تربية ابوك .. وتوزيع البلح اخلاقك وسعيك لمصلحة الناس .. اهو ربنا ح يكافيك مكافأة فوق حد التوقع .. ربنا يكرمك يابتي ..
امها قالت ليهو ان شاء الله من خشمك ولي باب السماء ..
..
اها اليوم ده كان ثويبة مبسوطة كدا ساي بدون سبب .. وحاسة برضا وأمال عجيبة ..
مع انو كل الخطوط مافي صالحها ..
ومشت الشركة وصلت متأخرة شديد .. وصلت اعتذرت لي قرشي .. قال ليها ولايهمك ياست الكل .. اكان غبتي اسبوع بسد ليك شغلك .. انتي زيك كم في الدنيا دي؟ .. اها ثويبة فهمت انو قرشي مواضيعو ظبطت .. واليوم كان طبيعي غير انو في حركة غير طبيعية بين قرشي وسوزان .. وابتسامات كدا عجيبة وغريبة ..
وكل مرة يطلع .. يمشي ليها ويجي .. والموبايل كل مرة توت توت رسالة ..
الجماعة ديل ياربي متين انشبكو ..
في نص اليوم كدا عامر رسل لي ثويبة .. ومشت ليهو .. ودقت الباب براااحة قال ليها اتفضلي ياثويبة ..
دخلت .. قال ليها طبعا" زعلانة مني ؟ قالت ليهو ابدا والله.. والله من اول يوم بس زعلة صغيرة كدا وراحت ..
ولايهمك انت كيف وصحتك .. ؟
قال ليها والله تمام .. وكيف عم بشرى؟ قالت ليهو في امان الله ..
تتكلم معاهو وقلبها شغال التف الت تف تف..
قال ليها والله ياثويبة.. انا مقدر احترامك لي ودفاعك عني وانا غايب .. وخجلان من هيجتي فيك شديد .. قالت ليهو بس انت تستاهل كل خير والله ..
قال ليها خلاص امشي بس انا ناديتك اعتذر ليك ..
واستمرت الايام .. والحال في حالو .. وناس الدويم اتأخرو شديد في الجية ..
والعلاقة بين عامر وثويبة علاقة عادية .. بس كل واحد جواهو اشواق وشجون لاتحتمل .. ومافي زول قادر يحكي للتاني ..
بس في يوم جا تلفون من البيت لعامر .. انو ناس الدويم وصلو.. الكلام ده بعد تقريبا عشرة او خمسطاشر يوم من الحلمة ..
طبعا لمن مشى البيت .. وسلم على عمتو وولدها .. ولاقى البنية .. اسمها تغريد .. كانت فعلا قمر واية في الجمال .. بس ماحركت اي ساكن جواهو ..
وشكلها مافاهمة جايبنها الخرطوم لشنو ؟؟
لكن هو طبعا" فاهم .. المهم كان مستاء .. بس قرر انو يوافق على اي عرض .. مادام فيهو رضا ابوهو .. خصوصا طبعا" البت مافي زول ممكن يرفضها ..
اها الايام مرت تلاتة اربعة يوم.. وكل يوم العمة ترسل بتها عشان تقعد شوية مع ود خالها .. تودي ليهو الشاي .. وتجهز ليهو هدومو .. وهو يعاين ليها بي طرف عينو .. واصلو مابتتكلم معاهو ..
المهم البت نقشت الحنك .. وعرفت انو جايبنها عشان كدا كدا ..
وكانت في محادثات سرية تجري في الخفاء .. بين . عمكم مصطفى ابوعامر .. وبين اخته ام تغريد ..
لكن القدر مخبي موضوع تاني ..
في يوم قرشي من الصباح جا لي عامر في المكتب.. وقال ليهو اقفل المكتب ده انا عندي معاك كلام سري للغاية ..
انت ياخوي مالك ماك داير تعرس .. ؟
قال ليهو والله ياقرشي بطني طامة من اي حاجة .. قال ليهو احكي لي موش انا بير اسرارك ..؟
قال ليهو والله طبعا ما ادس عليك.. انا كنت داير زميلتك.. بس هي ماعندها لي اي حاجة .. ومغرمة بود عمها في البلد ..
قرشي قال ليهو قوم علي حيلك يا كبير .. وتعال احكي ليك ..
اولا سوزان حكت لي حكاية غريبة ..
قالت ثويبة مافي ودعمها عايزها ولاشي .. ود عمها خطب بت خالتو .وعرسو في العيد . وهي قالت كدا عشان تجمع بينك وبين دالية ..
ولمن دالية اتلاشت .. قالو انت عايز بت عمتك .. وهسي هي محطمة لانها حست انك ضعت منها ..
قال ليهو ده شنو الوهم ابتقول فيهو ده ياقرشي ..؟
قرشي قال ليهو اقسم بالله .. زي ما اقول لك .. ولو انت مامصدقني ناديها أسالها ..
يازول عامر ده غلبو البسويهو .. قال ليهو ياقرشي لو كلامك ده طلع صح
بشارتك عندي عشرة مليون ..
قرشي قال الله اكبر .. بختك ياسوزي الموضوع اتسهل ^_^
هسع انا بمشي انادي ليك ثويبة واسألها ..
عامر قال ليهو دقيقة خليني اتلمه على روحي .. انا حاسي باني منهار من الفرحة ..
قال ليهو طيب وبت عمتك .؟
قال ليهو ده موضوع مقدور عليهو .. كدي نادي لي ثويبة ..
قرشي مشى قال ليها .. انا عايز اسدى فيك ياثويبة قالت ليهو في شنو؟
قال ليها امشي .. عامر قال عايزك ..؟ والليلة والليلة ..؟ قالت ليه في شنو ياقرشي ماتخوفني .. قال بس امشي انا ماعارف في شنو.
اها يازول مشت بنفس النسق ودقت الباب براحة قال ليها خشي ياثويبة ..
دخلت قالت ليه السلام عليك قال ليها عليكم السلام مالك خايفة ؟
انا بس عايز اسأل سؤال .. تجاوبيني بكل صدق وصراحة وانا عارفك مابتكذبي .
هل فعلا ودعمك عايزك .. سكتت مسافة وعيونها إتملن..
قال ليها انا منتظر اجابتك يا ثويبة .. قالت ليهو ابدا .. لا كان عايزني ولا انا كنت عايزاهو ..
انا قلت كدا لاني حسيت حأكون حجر عثرة بينك وبين دالية ..
قال ليها اها وبعد دالية مشت في حال سبيلا .. ليه ماكشفتي لي الحقيقة ..؟
قالت ليهو ليه يعني ؟
قال ليها بصراحة ياثويبة انا ماعندي وقت عشان عندي قرار مصيري.. لازم اتخذو الليلة .. انتي عندك رغبة ترتبطي بي ؟
قالت ليهو وانت عندك رغبة ترتبط بي .. ؟
قال ليها انتي انفاسي والله .. ومصدر فرحتي..
قالت ليهو وانا برضو انت بالنسبة لي كدا .. لكن برضو ما ممكن اكون سبب لي غضب ابوك عليك .. عشان كدا كلامنا ده مافي ليهو اي فايدة ..
قال ليها طيب رايك شنو لو ابوي نفسو اتصل عليك وطلبك .. قالت ليهو ان شاء الله الخير فيما يختارو ربنا ..
نحن بيدنا شنو . واكيد ربنا مابختار لينا الا الخير .. قال ليها خلاص امشي ربنا يحفظك ..
هي وصلت كدا وقرشي عاين ليها كدا لقا وشيها محمر من الخجلة ..
جاء راجع طوالي لمكتب عامر .. لقا عامر واقف متاكي الباب وبغني ويرقص في نص المكتب زي المجنون ..
الليلة عيدك ياقلب .. ترري تترري لالا..
الليلة فرحك ياقلب تررري ترري لالا ..
قرش يفتح الباب كش وقعد يضحك .. قال ليهو خلي ترري لالا .. جهز لي القريشات .. قال ليهو اجهز ليك شنو هاك .. طلع دفتر الشيكات كتب ليهو وشيطك قطع ليهو شيك بعشرة مليون ..
بس القدر مخبي حاجات فوق المعقول .. وعندو كلام تاني خالص ..
في نفس اليوم ده .. وعامر في قمة الفرحة .ابوهو اتصل عليهو تلفون وقال ليهو لازم الليلة تجي بدري لانو ناس عمتك مسافرين ونحن دايرين نحدد يوم الزواج ..
قال ليهو حاضر يا ابوي بس لازم اول حاجة اطلع مع البت براي ..
واتفاهم معاها واشوف البت دي بتنفع معانا ولالا ..
قال ليهو تطلع معاها شنو يعني .. في البيت ده اتفاهم معاها بي راحتك بس ادينا النتيجة اللية لانهم مسافرين ..
وبعدين النتيجة كدا ولا كدا بت عمتك ومجبور عليها .. عليك الله هسع دي بت بتتفوت ..؟
الى داير تعاكسني ساكت .. الى اللقاء ..
