الصباح شايل عجايب .. وعندو بسمات سخرية .. في الشركة .. والوضع عادي والشغل ماشي زي الساعة ..
وكان في زحمة عملاء .. وثويبة كانت كايسة ليها فرصة .. تتكلم مع دالية .. اول مالقتت ليها عشرة دقايق فاضية .. برضو قالت لقرشي .. اضرب لي دالية .. قال ليها شنو ياجماعة ماتسوو ليكم تلفونات .. انا تلفوني ده بقت تجيهو حساسية من دالية دي ..
قالت ليهو خلاص ياقرشي .. ولايهمك بمشي ليها براي .. قال ليها لالا يابت تعالي بهظر معاك ..
ما اشتغلت بيهو مشت ليها طوالي .. اساسا هي لفة الشارع بس لانو الباب الداخلي الصباح بكون مقفول .. بفتحهو اخر اليوم ..
ثويبة قالت لي دالية .. كيفك وكيف صباحك اها جبتي البتاعات ؟ قالت ليها جبتهم بس في مشكلة .. اتصرفت في ال 230 .. قالت ليها مامشكلة تتحلا برضو بعد تفضي شوية جيبيهم وتعالي لي بيغادي ..
ومشت .. اها يازول ثويبة شافت عامر مرتين تلاتة بمر بي قدام مكتبها .. ولا سلام ساي مابسلم .. ياربي الزول ده مالو معاي؟ .. المهم اتعمدت تطلع تلاقيهو .. وهو كان مشى على مكتب الكمبيوتر .. وهي طلعت من مكتبها زي كانها ماشة لسوزان هناك .. في مكتب الكمبيوتر ..
قبل ماتصل هو كان طلع واتصادفو في الممشى ..
سلام عامر ..
قالها عليكم السلام ثويبة .. كيفك وكيف ناس البيت ..
قالت ليهو الحمد لله.. عامر ممكن سؤال ؟
قاليها اتفضلي .. قالت ليهو في شنو ياعامر؟ انت ماطبيعي..
قاليها ابدا والله ياثويبة الموضوع عادي ..
قالت ليهو طيب .
بس انا شايفاك ما راعيني اي اهتمام ..
قال ليها صراحة في موضوع شاغلني شوية.. بحكي ليك مرة تانية ..
قالت ليهو خلاص بعدين توصلني؟ .. قال لالا اسف مابقدر والله ..
قالت ليهو طيب مر علي اخر اليوم في موضوع ضروري.. لازم اكلمك فيهو ..قال ليها انشاء الله وخلاها واقفة وفات ..
الزول ده فعلا ماياهو اول مرة يتعامل معاها بالطريقة دي ..
رجعت مكتبها وبقت منتظرة دالية .. وبقت منتظرة داليا تجيها ..
قالت لي قرشي ياقرشي الحمد لله القروش اتلقت ..
قاليها الشالا منو؟ قالت ليهو دي داليا .. لكن شالتها بس مكازاة لي انا عشان ترميني في مشكلة مع عامر ..
مفتكرة بيني وبينو حاجة.. لكن هي اساسا لاسراقة لاحرامية..
قال ليها كويس .. لكن والله الموضوع ده انا مابمشيهو ساي .. قالت ليهو عشان خاطري ياقرشي كانك ما سمعت حاجة .. سكت ساي ودنقر في شغلو ..زي الساعة واحدة كدا ..
جات دالية وشايلة حاجة ملفوفة في قرطاس اصفر زي الجلاد بتاع الكتب الزمان داك ..
جرت كرسي وقعدت قريب من ثويبة .. عشان قرشي مايسمع ..
قرشي لمن حس بي كدا شال ليهو ملفات وطلع ..
قالت ليها اهو دي القروش.. بس الله يخليك انا ماعايزة الكلام ده يصل لابوي .ولايصل لعمي مصطفى .
قالت ليها طيب انتي عامر ماشايلة همو شايلة هم ابوهو ..؟
قالت ليها دي صداقة سنين بين ابوي وعمي مصطفى .. ماعايزة اخربها ..
ثويبة قالت ليها انتي لو مانفذتي البقولو ليك انا البمشي اكلم عمي مصطفى والله العظيم ..
قالت ليها عليك الله ياثويبة لا .. انتي بس قولي لي انا بدون ماتهدديني بسمع كلامك اقسم بالله ..
ثويبة قالت ليها انتي كلمتي كم موظف وقلتي ليهو .. عماد غشاني وخلاني ؟
قالت ليها اربعة بس .
عبد القادر وتوفيق وقرشي وصديق . وفي بتين سابو الشغل .
قالت ليها هسي تكلمي قرشي تقولي ليهو كلامي القلتو في عامر ماصح .
وتطلعي فوق تكلمي عبد القادر وتوفيق ..
وصديق الليلة ماجا .. بكرة تكلميهو قبل انا ما اعمل ليك البراءة من التهمة دي .
قالت ليها حاضر.. باختصار داليا بدت التنفيذ في نفس اليوم . وقرشي وكت كلمتو وقالت ليهو الرسايل الجات للبنات زاتها رسلتها انا.. عشان اطفش البنات . قالها انا كشفت انك كضابة لكن للاسف اكتشافي كان متأخر انتي زولة رمة امشي عليك الله ..
عليك الله هسي انتي ماخربتي سمعتك .. كونك تقولي كدا .. في النهاية عامر ولد ومابضرو الموضوع زي مابضرك يا مقفلة ..
والله لو ما انا قرشي وعيب علي اضرب بت .. اقشطق كف كدا ..تقولي وقعت فوقي حيطة ...وعبد القادر كان عايز يضربها بي علبة الختم .. قالها طيري من قدامي
اعوذ بالله منك ياشيطانة ..
البت بقت مسكينة وحالتها بتحنن .. وثويبة ماسكاها من يدها البتوجعها .والجماعة بقو خجلانين من روحهم من الاتهامات الكانو لاصقينها في عامر بلا سبب ..
بس بي كلام البت الغريبة دي .. وده ياهو الغلط زااااتو ..
ومرة قال اللبيب ..
.
اوعك تظلم انسان بي كلام ناقلنو .
أطرد شك فؤادك ولا أكد ظنو.
إبقى تقربو وياذاكا قربك منو .
وامكن تنظلم بي ابتعادك عنو .
.
شن بتسوي بي خبر البعيد والداني .
غير ماساي تشيل هم الخلوق وتعاني .
كان جاك الخبر لازم تكون حقاني .
وان كان انت أفاك يبقى موضوع تاني.
.
بالااختصار ياجماعة .. دالية قدرت تمسح كل الافكار المسمومة الزرعتها في افكار الموظفين ضد الود عامر ..
كل الناس كانو مفتكرين انو عامر راجل تافه واستغلالي .. وكلة بي سبب كلامات دالية ..
وسبحان الله هو المسكين ماعندو اي خبر لا بالتهمة ولا بالبراءة .
لكن الله مع المسكين لانو هو ماجايب خبر .. وزول واجبات .. ربنا دافع عنه وحقق ليهو البراءة وهو غايب ..
اها يا زول في نهاية اليوم . عامر جا لثويبة .. في المكتب وثويبة قالت ليهو ياعامر انا طلبت منك كتير وانت ما رديت لي طلب عايزة اطلب منك اخر طلب ..
قال ليها قولي ياثويبة في شنو؟
قالت ليهو هوي هسي انت مالك منفعل كداوزهجان ومتضايق ..
قال ليها قولي مافي حاجة ..
قالت ليهو اوكي المهم ياخي دالية دي غلطت في حاجة معينة .. وانا عايزاك تسامحها ..
القروش الاتفقدت المرة الفاتت هي شالتهم ومحتفظة بيهم عشان تعمل مشكلة بيني وبينك .
بسبب الغيرة .يعني هي ما سراقة ولاحرامية ..
ولو كانت سراقة او حرامية كانت اتصرفت فيهم .. جابتهم كاملات وتامات ..
عامر زي المامركز معاها .. قال ليها خلاص خلاص ياثويبة .. انا كنت متأكد شالتهم.
خلاص مادام رجعتهم مكتملين يبقى مافي مشكلة .. .ورديهم وخلاص .. قالت ليهو طيب طلب تاني صغير تابع لنفس الموضوع ..
انا عايزة سلفية 230 لاخر الشهر اشيلها منهم وبنزلا في اليوميات ..
وبي كدا دالية مرقت من المشكلة زي السبيبة من العجين ..
لكن في مشكلة تانية ثويبة ما حتقدر تتلافاها .. وهي انو قرشي زعلان زعل شديد ..
وطبعا هو زول احمق مابقدر يتحكم في روحو نهائي ..
مشى طلع لي عبد القادر .. قال ليهو شفت الهبالة بتاعة الناس الكبار بتسوي شنو؟
هسي انت بتودي وشك وين من البت المسكينة الاسمها ثويبة دي.. بعد سمعتها الكلام داك .. انت عارف انها هي الاجبرت دالية تقول الحقيقة ؟
لكن والله انا الليلة لازم اطير دالية دي من الشركة ..
ياهي يا انا .. في المكان ده .. دي زولة سجم الله يقطعا ويقطع يوما ..
عبد القادر قال ليهو انت متنفش كدي داير تسوي شنو ؟؟وكت سيد الحق راضي ..وشايفها بتعمل في شنو.؟
قال ليهو سيد الحق منو ؟عامر كلتشي؟ عامر ماقادر يتكلم معاها خايف من ابوهو ..
انا بمشي بكلم ابوهو براي ..
واكشف ليهو كل عمايلها.. وحركاتها من طق طق للسلام عليكم .. واوريهو انو عامر فقد السيطرة على الشركة بسبب دالية .. و غرامها الاهوج ..
وانا من دربي ده بمشي ليهو حتى تاني امشي البيت..
وفعلا قرشي في نهاية اليوم طلع ومشى على بيت ناس عامر ..
ولقى عامر مافي.. زي الكأنو ما وصل البيت او غشا ليهو مكان.. ودي طبعا فرصة كبيرة ..
البيت طبعا عبارة قصر عجيب .. ومنظره من برة يجيب الخوفه ..
وقرشي اول مرة يخش فيهو.. وهو شغال في الشركة 3 سنوات.. مافكر يوم يمشي بيت ناس عامر مصطفى نهائي ..
اها سلم على عم مصطفى .. وهو طبعا بعرفو شديد .. لقاهو قاعد في صالة كبيرة .. فيها شاشة 50 بوصة .. ومشغل قناة الجزيزة والتكييف المركزي .يجيب الصقطة ..
قال ليهو كيف ياقرشي .. والله الليلة الجابك لي في البيت ده الشديد القوي ..
انت معروف مابتزور الناس في بيوتهم الا اقرباءك صح؟
قال ليهو بس ياحاج مصطفى انت زي ابونا .. ونحن فعلا مقصرين فيك ..
انا المفروض اجيك زيارة عديل .. بس الليلة والله جاييك بي مشكلة صغيرة كدا حاصلة في الشركة
في المقر الرئيسي في الخرطوم ..
للعلم ياجماعة الشركة دي عندها فروع في بحري وامدرمان ..
وكلهم عامر فيهم المدير العام وعندو مدراء فرعيين ..
وعامر بسموهو رئيس مجلس الادارة .
اها يازول قرشي بدا يحكي لي عم مصطفى .. عمايل دالية بت صاحبو الامين في الشركة.. وقلة ادبها واستهتارها ..
وتحمل عامر ليها مراعاة لي صحتك ولي علاقتك بابابوها .. وقاعد يحكي ليهو في حركاتها بالتفاصيل المملة ..
وقال ليهو الموضوع في يدك انت ياحاج.. شوف عايز تعمل شنو لانو ولدك بخاف عليك.. وهسي لو عرف انا حكيت ليك بغطس حجري ..
قال ليهو ماتشيل هم ياقرشي.. اعتبر الموضوع منتهي.. وانت لاحكيت لي حاجة ولاشي ..
اها نغير الموضوع انا عايز اسألك من حاجة ..
انا عايز عامر ده يعرس والله في العيد القدامنا ده .. وعندنا بت عمتنا في الدويم عندها بت زي القمر.. وانا امبارح اقترحتها ليهو ..
عليك الله كان انت قريب منو اتكلم معاهو في الموضوع ..
انا فتحت ليهو السيرة وهو قعد يطنطن .. انا قلت ليهو في بت في راسك؟ .. قال لي مافي .. انا كنت قايلو حاتي راسو مع داليا بت الامين دي .. اها مدام كدي انا باكر برسل لي بت عمتي تجيب بتها وتجينا زيارة ..
قرشي قالو يازول هو مابدور دالية دي كلو كلو .. اسالني انا ..
قاليهو اتكلم لي معاهو ياقرشي الله يبارك فيك.. ولازم نغتنم الفرصة دي قبل يمشي يسوي ليهو قصة مع بت تاني ..
والظاهر دي الحاجة المضايقة عامر قبيل .. يعني عامر كان راغب في ثويبة فعلا .. وثويبة لمن قالت ليهو عايزها ودعمها .. بقى ماعندو طريقة يرفض عرض ابوهو ..
ومامعروف لقدام بحصل شنو؟
الى اللقاء ..
